Read lumasaaba Malaki 1 Bible Online

Malaki 1 - lumasaaba bible

Malaki 1

¹Buno nibwo buurume bweesi Umukasya aawa Malaki, ari aboolele babaandu be mu Isiraeli.

² Umukasya aloma ari, “Ba Isiraeli, ise Umukasya, imbakana inywe naabi. Ne inywe mwireeba muri, ‘Umukasya akhukana ifwe musaambo shiina?’ Muli ni khuushebulila muri Esau abe ali wandaaye uwa kuuka weenywe Yakobo. Ne ise nakhalawo, naarobora khuukana Yakobo,

³mu shifwo sha Esau. Waakila ise nashuusa liloba lye bikiingi mweesi lisaaye lya Esau limenya, khukhwikela busuumbu, mweesi tsisolo tse mwirome bimenya.”

⁴Ikhaba nga be lisaaye lya Esau, babaamenya mu Edomu baloma bari, “Khwaamanyile khuri biriimba byeefwe byaamala khaale khukhwoonakisibwa. Ne shitweela busa khukheelemo khwiyoombakhe bushaakha.” Ne ise Umukasya inoma indi, “Abe bakheesamo boombakha bushaakha, ne ise ikhaaboonakise luundi, khukhwoolisa babaandu babaandi balome bari, babaandu be shibala isho bali baboonaki kila Umukasya akhaakamisa khuubakhalalila ta.”

⁵Inywe ba Isiraeli nga mwaaboone bino mukhaalome busa muri, “Ikhaba mu bibala bibiikhali bye ba Isiraeli ta, Umukasya okesanisa kamaani keewe.”

⁶Umukasya alikho alomela basaayi ari, “Busheele babaana beesamo paapa waabwe shiriifwa; ikhaba umuraambi esamo umukoosi weewe shiriifwa. Bona ise ndi paapa weenywe, naluundi indi umukoosi weenywe, khulwashiina kila mukhaantsisamo ise shiriifwa? Inywe mundeekelesa ise, ate mwashuukha mwereeba muri, ‘Ne khumulekelesa mu saambo shiina?’

⁷Inywe muwaanayo tsisaayilo tsye kumusilo khu sheeso shase. Mukhola bino ne shitweela busa mwereeba muri, ‘Ne Umukasya khumuwaambisa kamaŋaanyu musaambo shiina? Uutsi shisheeso sh'Omukasya nasho nisho shiina?’

⁸Inywe mwambaasa muri muba simwaakholile bibyoonako, ni mureera shishaayo shishafwa tsiimoni, namwe shishiili shilwaale, namwe shishalemala, mwaashiwaanayo isi ise nga isaayilo ta? Khakakho muyilile gafana weenywe bibyaayo nga bibyeene ibyo, mubone oba binyala byaamusangaasa khubone! Bibyaayo nga ibyo binyala byaakila waabawa inywe buyeeti?”

⁹Inywe basaayi, ari ni muloombe Umukasya, akhuwaambile ifwe shiisa. Ne nga muli ni biwaanwa bibifwaanana nga ibyo, mwambaasa muri kane abenaanekho?

¹⁰Umukasya aloma ari, “Ise nikoomba ndi abe uri ikhabawo mutweela khus'iinywe, utsya weekalawo kimilyaango kye Lisaayilo lyase, alekha khuubawo na mutweela khuutsya khuuwaambisa kumulilo kukuukhalimo kumukaso ukwo ta, khu sheeso shase! Basaayi, inywe byeesi mukhola, sibiisangaasa ise ta; ise singane nakaanile biwaanwa byeesi mureera ta.

¹¹Khukhwaama mamilimili khukhwoolisa inyaanga n'iikwa, kamanaambo koosi khu shibala karuuya lisina lyase. Buli aandu oosi, bantsokhela ise bubaani, naluundi bandeerera biwaanwa bibifukiilisibwa.

¹²Ne ikhaba inywe mumuubeele basaayi, mwandekelesa ise nga muloma muri, ‘Umukasya naye nisho shiina? Ikhaba tsisaayilo tsino sitsilimo liisuno ta.’

¹³Inywe mwiilomela muri ise imbaluwisa busa, waakila mwantsyuluusa ise. Mu shifwo she khuureera biwaanwa bibiifukiilisibwa, inywe mureera shishaayo sheesi beebile busa, namwe shishiili shiileme, namwe shishiili shilwaale. Inywe mwambaasa muri ise ifukiilisa biwaanwa nga bibyeene ibyo?

¹⁴Umuundu uuli ni bibyaayo mu litaala lyeewe bibiifukiilisibwa khuuwaanibwayo isi Umukasya, ne wawaanayo ibyo bibiikhafukiilisibwa ta, kane afune shiitsubo. Khulwekhuuba ise ndi Umuyiinga uwe angaaki naabi, naluundi babaandu boosi beesamo lisina lyase lukoosi.”