Read lumasaaba Malaki 3 Bible Online

Malaki 3 - lumasaaba bible

Malaki 3

¹Umukasya, uwe kamaani aloma ari, bona ise ndikho isiindikha umurume wase khuutsya ibweeni wase, khukhuuŋoonaŋoonela ise kumukhoosi. Nio khaangukho, Umukasya isi muweentsa kane engile mu lisaayilo lyeewe. Umurume isi inywe mwikhoyela uwe ndakaano, ali khu ntsila, alikho eetsa.

²Ne naanu unyala wekhaliilikha shiifukhu sheesi akheetsilekho? Namwe nga umurume uyo waabonekhile, naanu unyala waarama nga weemikhile khu ngaaki? Khulwekhuuba ali busa nga kumulilo kumubile naabi, kukwoosha bibiindu byoosi.

³Umweene uyo akhekhale khu shitsoloŋo, abe busa nga kumulilo kumubile naabi kweesi bayengulilamo ifeetsa, aryo apyeluuse babaana ba Levi. Akhaabapyeluuse nga ni bapyeluusa izaabu n'ifeetsa, khukhwoolisa nga ni bawaanayo biwaanwa bibyaakhila khuuwaanibwayo isi Umukasya.

⁴Ni nashiryo, akile biwaanwa bibyaama mu Yuda ni mu Yerusalemu, biikhoyese Umukasya, nga ni shabatsaka amataayi.

⁵Umukasya, uwe kamaani aloma ari, “Nio lwanyuma ise nisyeende aambi, ikhale kumusaango; nga ingukhalila abo babaakhola bye khuuloka, babaakhola bye buheyani, ni naabo babetsuba busa mu bikhalimo ta. Ikhaba abo babaamiinikhilisa naluundi baalyakhana kimikheemba kye baraambi baabwe, babaamiinikhilisa banamulekhwa ni baafuubi, abo babaakhenaanayo khu beetswa ta, ni naabo babaakhaantsisaaya ise ta.

⁶Khulwekhuuba, ise Umukasya, sinyala nashuukhakho ta; naluundi nisho shishiikila inywe lisaaye lya Yakobo mwaaba nga mushiiliwo; nga simuwawo ta.”

⁷Umukasya aloma ari, “Khukhwaama nga bakuuka beenywe bashiiliwo baalamu, inywe mwaayantsukha kamakaambila kaase, mwaalekha khuukaloondelela ta. Ni mukobole isi ise, ni nase kane ingobole isi inywe muli. Ne inywe mwireeba muri, ‘Ne kane khukoboleyo isi Umukasya, musaambo shiina?’

⁸Umuundu anyala walyaakhana Wele? Ne bona inywe mulikho mundyakhana ise. Shitweela busa mwireeba muri, ‘Ne khulikho khumulyakhana khuryeena?’ Mundyakhana ise khuubirira mu khuunyima shitweela she likhumi khu biindu byeesi mufuna ni mu biwaanwa byeenywe.

⁹Isho nisho shishiikila kila linaambo lyoosi lilikho shiitsubo; khulwekhuuba inywe mundyaakhana ise.”

¹⁰Umukasya aloma ari, “Inywe ni mureere shitweela she likhumi sheenywe khu byeesi mufuna, nio inyalise khuubawo biilyo mu ntsu yase. Inywe khakakho busa mureere ibyo khane, kane mubone nase sheesi inabakholela. Ni muukhake ise, mubone nga ise ni kane nikulewo kamatirisa ke likulu, imbafuumulile tsiikhabi tsya khutweela khutweela.

¹¹Ise ikhaarusewo kimikuuku kikiilya biilimwa byeenywe nga bili mukuunda, naluundi kimizabibu kyeenywe singane kiniaale kilakale nga kishiili khuwaangala ta.”

¹²Umukasya aloma ari, “Kamanaambo koosi kane kababone inywe khuuba nga be tsiikhabi naabi, khulwekhuuba ise ikhekhoyele mu shibala sheenywe.”

¹³Umukasya aloma luundi ari, “Inywe mwaanganikhilekho ise bibiindu biibi naabi. Ne shitweela busa mwireeba muri, ‘Khwaamukanikhilekho buubi nga khuloma khuri shiina?’

¹⁴Inywe mwaaloma muri, ‘Imbaamo kumukaso kwe khuuba babaakaanisi ba Wele ta. Ifwe ni khuuloondelela kamakaambila k'Omukasya, uwe kamaani, naluundi khwaaba babewombeekha, khwaamisamo shiina?

¹⁵Ifwe khubona abo babeyiinga, nga abo babaali buulayi. Baboonaki bali ni buyiindifu, naluundi nga baakhakilisile Wele, ne imbaawo shishibakholikhakho ta.’

¹⁶“Lwanyuma, abo babesaaya Umukasya baakanikhana khu biindu bino bonyene na bonyene. Umukasya waabarekeeresa, waabeelamo. Kila barona kamasina kaabo babesaaya Umukasya, naluundi baamwisamo lukoosi.”

¹⁷Umukasya aloma ari, “Babaandu abo kane babe babaase samweene, babe shishiindu sha buraawa khu shifukhu khweesi ise ikhaakhalilewo, indekhe khubawa shitaambiso ta, nga umusaali n'atseeta umwaana weewe.

¹⁸Nio lwanyuma, inywe mubone intsawukhana iliwo akari o muundu uuli umukhosefu, ni nooyo uli umwoonaki; akari oyo uwakaanisa Wele, ni nooyo ukhamwakaanisa ta.”