Read lumasaaba Matayo 1 Bible Online

Matayo 1 - lumasaaba bible

Matayo 1

¹Buurone bwe luruungo lwe bakuuka ba Yesu Kristo, umwitsukhulu wa Dawudi, umwitsukhulu wa Iburayimu. Khukhwaama khu Iburayimu khukhwoola khu Dawudi, luruungo nilwo luno.

²Iburayimu asaala Isaaka, Isaaka wasaala Yakobo, Yakobo wasaala Yuda ni babandaaye.

³Yuda wasaala Perezi ni Zela mu mukhasi Tamali, Perezi wasaala Kezironi, Kezironi wasaala Ramu,

⁴Ramu wasaala Aminadabu, Aminadabu wasaala Nahasoni, Nahasoni wasaala Salumoni

⁵Salumoni wasaala Bowazi mu mukhasi Rakabu, Bowazi wasaala Obedi mu mukhasi Ruse, Obedi wasaala Yese,

⁶ni Yese naye wasaala Dawudi umuyiinga. Khukhwaama khu Dawudi khukhwoola khu bifukhu khweesi babaandu ba Isiraeli baawuyisibwila bayilibwa i Babulooni; luruungo nilwo luno: Dawudi asaala Solomoni, mu mukhasi uwaba mukha Uriya.

⁷Solomoni wasaala Rehobowamu, Rehobowamu wasaala Abiya, Abiya wasaala Asa,

⁸Asa wasaala Yehosofati, Yehosofati wasaala Yolamu, Yolamu wasaala Uziya,

⁹Uziya wasaala Yosamu, Yosamu wasaala Ahazi, Ahazi wasaala Kezekiya.

¹⁰Kezekiya wasaala Manase, Manase wasaala Amoni, Amoni wasaala Yosiya.

¹¹Yosiya wasaala Yehoniya ni babandaaye mu bifukhu byeesi baawuyisibwa khuutsya i Babulooni.

¹²Lwanyuma lwe khuwuyisibwa khuutsya i Babulooni, Yehoniya wasaala Seyaluteli, Seyaluteli wasaala Zerubabeli,

¹³Zerubabeli wasaala Abiudi, Abiudi wasaala Eliyakimu, Eliyakimu wasaala Azoli,

¹⁴Azoli wasaala Zadoki, Zadoki wasaala Akimu, Akimu wasaala Eliudi,

¹⁵Eliudi wasaala Eliyazari, Eliyazari wasaala Matani, Matani wasaala Yakobo,

¹⁶Yakobo wasaala Yusufu, uwaba umuseetsa wa Malyamu, maayi wa Yesu, ulaangibwa Kristo.

¹⁷Kiryo kimiboolo kyoosi khukhwaama khu Iburayimu khukhwoola khu Dawudi, kili liikhumi na kine. Ni khukhwaama khu Dawudi khukhwoola khu khuwuyisibwila i Babulooni, kimiboolo liikhumi na kine. Ni khukhwaama nga ni baawuyisibwila i Babulooni nakyo kimiboolo liikhumi na kine, khukhwoola khu khusaalikha khwa Yesu Kristo.

¹⁸Khuusaalikha khwa Yesu Kristo khwaba musaambo yino: Maayi weewe Malyamu n'aba nga ashikanikhisibwa ni Yusufu, nga bashiili khuyilana ta, aanyoolekhana nga ali shisoombo sh'Omwoyo Umukhosefu.

¹⁹Ne lwekhuuba Yusufu umuseetsa weewe abe ali umusaani umukwalaafu, waalekha khukana amuwaambise kamaŋaanyu mu baandu ta, aryo kila ambaasa khuumulekha mu shimoonyo.

²⁰Ne n'aaba ali khukhwaambaasa aryo, malayika w'Omukasya wamubonekhela mu marooro, nga amuloma ari, “Yusufu, umwitsukhulu uwa Dawudi, ukharya khuuyila Malyamu nga umukyelema woowo ta, lwekhuuba shisoombo sheesi ali nasho shili sh'Omwoyo Umukhosefu.

²¹Alisaala umwaana umusiinde, ni nawe ulimutwiikha lisiina uri Yesu, lwekhuuba niye uliwonesa babaandu beewe khukhwaama mu byoonako byaabwe.”

²²Bino byoosi byabawo khukhwoolelesa bibyalomewa n'Umukasya mu muŋoosi biri;

²³“Bona, umukhaana uli indungubaasi aliba shisoombo asaale umwaana umusiinde, balimutwiikha lisiina bari Imanueli,” lilimanyisa liri, Wele ali ni nafwe.

²⁴Yusufu n'asiisiimukha mwiilo, waakhola sheesi malayika w'Omukasya aamuloma, waayila Malyamu ingo nga umukyelema weewe.

²⁵Ne niye s'etubaasakho ni naye ta khukhwoolesa n'asaala umwaana weewe umusiinde, ni Yusufu waamutwiikha lisiina Yesu.