Read lumasaaba Matayo 10 Bible Online

Matayo 10 - lumasaaba bible

Matayo 10

¹Yesu walaanga baleekelwa beewe liikhumi na babili, wabawa bunyala bwe khuwoonatsaka kimisaambwa kimibi, ni khuwonesatsaka buli ndwaale, na buli butsiina bwoosi.

²Ni kamasina ke baarume beene liikhumi na babili niko kano: uwanyoowa niye Simoni (ulaangiwa Petero) ni wandaaye Andereya; Yakobo ni wandaaye Yokana, nga boombi babaana ba Zebedaayo;

³Filipo ni Batolomayo; Tomasi ni Matayo, uwaba umubuusanisi we kumusolo; Yakobo umuwana wa Alufayo; ni Tadewo;

⁴Simoni uwaba atsiinikhila naabi linaambo lyeewe (beesi balaanga bari Zelote); ni Yuda Isikalyoti, niye uwalyamo Yesu luwomelo.

⁵Yesu waarumana basaani bano liikhumi na babili, nga abalomela ari, “Mukhatsyakho mu shisiintsa shoosi she Banaambo ta, namwe mukhenjilakho mu shiriimba shoosi she Basamariya ta.

⁶Ne shilayi mutsye isi kamasheese kakakoraana ke mu ntsu ya Isiraeli.

⁷Ni muba nga mutsya, mulaangilile muri, ‘Buyiinga bwe mwikulu bwolele ambi.’

⁸Muwonese balwaale, mulamuse baafu, muwonese ibo babaali ni bulwaale bwe bikeenge, naluundi muwoonatsake kimisaambwa kimibi. Inywe mwawebwele busa nga mbaawo sheesi musasuule ta, ni nanywe muryo ni muwanatsake busa.

⁹Mukhasuta izaabu, namwe ifeeza, namwe tsinusu musutilo tseenywe ta.

¹⁰Namwe mukhasuta isutilo ye lukyeendo ta, namwe tsingubo tsibili ta, namwe bilaalo ta, namwe imiimbo iye khukhwitiila ta. Lwekhuuba umuraambi akhila kumukheemba kweewe kweebyo bibimwakhila.

¹¹“Ne mu buli shiriimba namwe shishaalo sheesi mwinjilamo, mutsya muweentse umuundu umulayi, unyala wabakaanila, mumenye w'omweene uyo, khukhwoolesa ni mururayo.

¹²Ni muba nga mwinjila mu ntsu, musheesatsaka abo babaakilimo.

¹³Ne mu ntsu umwo ni mubamo babaandu babaabakaanila, khuusheesa khweenywe khwe lukoosi khurame khu nibo. Ne ni baba nga sibaakhila ta, khuusheesa khweenywe khwe lukoosi khukobolatsake isi muli.

¹⁴Ne muungo mwoosi, namwe shiriimba shoosi isi bekaana khubekhoyela, namwe baalekha khubawulilisa bilomo byeenywe ta, ni muba nga murura mu ntsu iyo, namwe mu shiriimba isho, musisakulatsaka lufuumbi luluuli khu bikyele byeenywe.

¹⁵Ilala imbaloma ndi, khu shifukhu she khuukhalilakho kimisaango, Wele aliwaambila babaandu be mu shiriimba Sodoma, ni Gomora[7] shiisa khufuurisa babaandu be mu shiriimba isho.”

¹⁶Yesu weloosela waabalomela ari, “Bona ise imbarumana nga kamasheese akari mu bitsuutse. Nashiryo, ni mube ni kamakyesi nga tsindemu, naluundi mube baawolu nga kamawuusi.

¹⁷“Ne ni mwiliinde babaandu, lwekhuuba balibawaamba babawaaneyo isi tsimbuusano tse Bayudaaya, naluundi babakhupile tsimiimbo mu ntsu tsye khukhwisaayilamo.

¹⁸Ni lwe khuubafunisa ise, balibakhweeselesa, babayile isi bawuli, ni bayiinga, nio mube bajulisi baase isi nibo, ni isi Banaambo.

¹⁹Ne ni kane babawaaneyo, mukheyembelela lwe byeesi munyala khukanikha ta, namwe isaambo isi munyala khuukanikhamo ta, lwekhuuba mu saawa inyene iyo, muliweebwa byeesi muliloma.

²⁰Lwekhuuba bilomo byeesi muliloma sibiliiba bibyeenywe ta, ne bilyaama isi Umwoyo wa Paapa weenywe, nga niye ukanikhila mus'iinywe.

²¹“Babaandu baliwaanayo babandaayabwe khukhwiribwa, ba paapa balikhola shishiindu sheene nisho shitweela isi babaana baabwe, ni babaana nabo balinyukhila basaali baabwe babeere.

²²Babaandu boosi balibabiiyila inywe, lwe khuubafunisa lisiina lyase. Ne uyo ulihandalala khukhwoolesa ibumaliliso, niye uliwonesebwa.

²³Ne ni balibataambisila mu shiriimba shitweela, mwilukhila mu shiriimba shiindi. Ilala imbaboolela ndi Umwaana w'Omuundu aliitsa nga mushiili na khumalilisa kumulimo kweenywe mu biriimba byoosi bya Isiraeli ta.

²⁴“Mbaawo umuleekelwa ufuura umuleekeli weewe ta, namwe mbaawo umwakaanisi ufuura umukoosi weewe ta.

²⁵Ne umuleekelwa shiba shimumala, n'aba wekyelile nga umuleekeli weewe, n'umwakaanisi khukhwikyela nga umukoosi weewe. Baryo babaandu ni baba nga balaangile umweene muungo khuuba Belizebuli, sibalifuurisakho naabi khulaanga be muungo mweewe baryo!

²⁶“Nashiryo, mukharya babaandu ta. Lwekhuuba mbaawo shishabiimbiwakho shishikhalibonesebwa ta, namwe shishabisibwa shishikhalimanyikha ta.

²⁷Ise sheesi imbaboolela mu shilima, mushilomatsaka mu lubuula; ni sheesi muwulilila mu shimoonyo mushilaangilila khu ntsu khu ngaaki.

²⁸Mukharya ibo babeera kumubili ne baalekha khunyala khukhwiira kumwoyo ta. Khurusakho ni muryatsake uyo unyala khuwesa kumubili ni kumwoyo kweene atweela mu mulilo kukukhasima ta.

²⁹Banamundyoole babili sibanyala khukulisibwamo liŋooti litweela? Ne mbaawo na mutweela khu nibo unyala wakwa aasi nga Paapa weenywe akhumanya ta.

³⁰Ne inywe ni litsuune liliili khu mirwe kyeenywe lyoosi lyamala khaale ni khubaliwa.

³¹Ni nashiryo, mukharya ta, inywe be lisuno likali khufuura banamundyoole bakali.

³²“Aso, buli muundu yeesi uwibuula ari ali uwase mu moni tse babaandu, ni nase ndyo indimubuula isi Paapa wase uli mwikulu.

³³Ne buli muundu yeesi uwuntsikaanila mu moni tse babaandu, nase ndyo indimwikaanila mu moni tsa Paapa wase uuli mwikulu.

³⁴“Inywe mukhambaasa muri ise neetsa khuureera lukoosi khu shiibala ta. Ne ise neetsa khuureera lurima lwe khukhwawukhana.

³⁵Lwekhuuba ise neetsa khureerawo khukhaandisana akari o mwaana umusiinde ni paapawe; akari o mwaana umukhaana ni maayiwe, akari o mukhaana umumasaala ni maayiwe umumasaala.

³⁶Ni basiku boowo babafuura buubi kane babatsake be mu ntsu yoowo.

³⁷“Umuundu yeesi ukana naabi paapawe namwe maayiwe, namwe babaana beewe besiinde, namwe be khaana, khufuurisa ise, s'akhila khuuba umuleekelwa wase ta.

³⁸Ne uyo ukhakane asute kumusalaba kweewe anoondelele ise, aba s'akhila ni khuuba umuleekelwa wase ta.

³⁹Uyo ukhakakho khuwonesa buulamu bweewe, alibufwilwa, ni nooyo ufwila buulamu bweewe khu lwase, alibunyoola.

⁴⁰“Umuundu yeesi ubakaanila inywe, aba wantsakaaniile ise, ni nooyo uwuntsakaanila ise, aba wakaaniile uyo uwanduma ise.

⁴¹Umuundu yeesi uwakaanila umuŋoosi lwekhuuba ali umuŋoosi, alifuna shiwaanwa shishaakhila umuŋoosi. Ni nooyo uwakaanila umuundu umukwalaafu lwekhuuba ali umukwalaafu, umuundu uyo alinyoola shiwaanwa shishaakhila umuundu umukwalaafu.

⁴²Ne buli muundu yeesi uwakho mutweela khu bakyeekhe bano kameetsi kamanyire ke khuunywa lwekhuuba bari ali umuleekelwa wase, ilala imbaloma ndi, umuundu uyo alifuna kumukheemba kweewe.”