Read lumasaaba Matayo 11 Bible Online

Matayo 11 - lumasaaba bible

Matayo 11

¹Nga Yesu waamalile aryo khuleekela baleekelwa beewe liikhumi na babili, waarura mu shiifwo isho waatsya khuleekela naluundi ni khuboolela mu biriimba bye Galilaaya.

²Ne Yokana Umubatisa nga ali mu mapuusu n'awulila byoosi byeesi Kristo aba ali khukhola, warumanayo baleekelwa beewe isi Yesu,

³ari batsye bamureebe bari, “Iwe niye uyo abe isi khuliindilila uli khukhwiitsa, namwe khuliindilileyo ukuundi?”

⁴Yesu wabeelamo ari, “Ni mutsye muboolele Yokana Umubatisa byeesi muwulile ni byeesi muboone.

⁵Baabofu babona, babaalemala bakyeenda, abo babaali ni bulwaale bwe bikeenge bawonesebwa, bamiinyi bekukha mu maru baawulila, baafu balamusibwa, ni Kamakhuuwa Kamalayi kaboolelwa isi bataambi.

⁶Ne ali ni khabi umuundu yeesi ukhantsikanakana ise ta.”

⁷Ne baleekelwa ba Yokana Umubatisa ni baaba nga batsya, Yesu wakanikha isi kamatuuli ke babaandu bibiwaamba khu Yokana mweene, nga aloma ari, “Inywe ni mwatsya isi Yokana mu mubiimbi, shiina sheesi mwatsiililila khubona? Khubona lukholo luluteengasibwa ni mbewo?

⁸Ne mwatsiililila khubona umuundu ufwaana aryeena? Umuundu ukwaarire tsingubo tsitsinyenanyena? Bona ibo babakwaara tsingubo tsitsinyenanyena bali mu lwaanyi lw'omuyiinga.

⁹Ne ilala mwatsiililila khubona shiina? Khubona umuŋoosi? E e, ilala imbaboolela ndi niye afuurira ilala umuŋoosi.

¹⁰Yokana oyu niye isi bibyaronebwa bikhosefu bilomakho biri, ‘Indirumana umurume wase iburaangisi woowo, ulikhuŋoonaŋoonela intsila yeesi ulikyeendelakho.’

¹¹“Ilala imbaboolela ndi, mu baandu boosi babasaalikha khu shiibala khuno, mbaawo na mutweela ufuura Yokana Umubatisa ta. Ne khurusakho uyo ufuura bukyeekhe mu Buyiinga bwe mwikulu niye umukhulu khufuura Yokana mweene.

¹²Khukhwamila ilala khu bifukhu bya Yokana Umubatisa khukhwoolesa shaleelo, Buyiinga bwe mwikulu babwinjilamo ni khurekana, ni naabo babarekana nibo babuwaamba ni kamaani.

¹³Bitabo bye baŋoosi ni kamakaambila ka Musa bikanikha khu Buyiinga bwe mwikulu khukhwoola khu Yokana Umubatisa.

¹⁴Ne muba nga mumukana khufukiilila, Yokana uyo niye Eliya abe isi mwaliindilila.

¹⁵Uyo uuli ni kamaru ke khuuwulila n'awulile.

¹⁶“Ari babaandu be kumuboolo kuno imbakyelaase na shiina? Bafwaanana nga babaana babekhaale mu khatale, nga balaangana ni bashaawe bari,

¹⁷‘Ifwe khwabakhupila kimilele ni inywe mwaalekha khukana khushiina ta, ifwe khwabakhupila tsimuungu ne inywe mwaalekha khwantsuwa ta.’

¹⁸“Yokana Umubatisa eetsa nga abuya intsala nga s'alya biilyo namwe nga s'anywa iviini ta, ne babaandu boosi baloma bari, ‘Ali ni shisaambwa shiibi.’

¹⁹Ne Umwaana w'Omuundu n'etsa nga naalya, naluundi nga anywa, babaandu tsana baloma bari, ‘Ali ni kumukhabyo naluundi umumeeli, umusaale we babuusanisi be kumusolo ni babonaki babaandi.’ Ne kamakyesi ka Wele kokyesanisibwa ni nebyo bibyaama mu makyesi keeneko.”

²⁰Aryo Yesu waarakikha khukhwikiitsa biriimba mweesi aakholela bye kamakaanga bibifuura bukali, ne byaalekha khukhwibiiyisa ta. Kila aloma ari:

²¹“Nga she kumutaambo isi iwe Korazini! Nga she kumutaambo n'isi nawe Besusaida! Lwekhuuba bye kamakaanga bibyakholewela mwiinywe biba nga bibyakholewela i Tuulo ni Sidoni, khali bebiiyisa bibyoonako byaabwe khaalekho, bekhala nga bakwaarire bitsina, behanyakakho likokhe, khukhwokesanisa bari bebiiyisile bibyoonako.

²²Ne ari imbaboolela ndi Wele aliwaambila Tuulo ni Sidoni shiisa khu shifukhu she khuukhalilakho kimisaango khufuurisa inywe.

²³“Ni nawe Kaperunaumu, wakana khukhwiniinisa wamweene mwikulu? Ulikhisibwa aasi i makoombe. Lwekhuuba bye kamakaanga bibyakholewela mwiiwe biba nga bibyakholewela i Sodoma, khali shiriimba isho shishiiliwo khukhwoolesa ni shaleelo.

²⁴Ne ari imbaboolela ndi, Wele aliwaambila shiisa shiriimba isho Sodoma khu shifukhu she khuukhalilakho kimisaango khufuurisa inywe.”

²⁵Mu saawa iyo, Yesu waaloma ari, “Paapa, Umukasya we mwikulu ni shiibala. Ikhusiima, lwekhuuba bibiindu bino byoosi wabibisa babaandu be kamakyesi ni baleekele. Ne wabibimbulila ibo babaali babusheele busa.

²⁶Niabweene Paapa wamweene washisiima uryo.

²⁷“Paapa wase waayimaambisa ise bibiindu byoosi. Naluundi mbaawo umuundu yeesi umanyile Umwaana ta, khurusakho Paapa yenyene. Naluundi mbaawo umanyile Paapa ta, khurusakho Umwaana yenyene, ni babaandu boosi beesi Umwaana akana khubabimbulila bibiwaamba khu Paapa.

²⁸“Aso, inywe mweesi babaaluwile, luundi babaasitowelelwe ni mwiitse is'ise, ni nase kane imbawe inywe khuuwola.

²⁹Ni muyile shisutwa shase, mushitwiikhe, muryo mwiyikile khwiise, lwekhuuba ise ndi umukwalaafu luundi umuwolu mu mwoyo, ni nanywe mulinyoolela kimyoyo kyeenywe shiwolelo.

³⁰Lwekhuuba shisutwa shase sishili shisiro ta, naluundi shili shishaangu.”