Read lumasaaba Matayo 12 Bible Online

Matayo 12 - lumasaaba bible

Matayo 12

¹Mu bifukhu ibyo, Yesu waaba nga abira mu nimilo tse ŋaano[8] khu shifukhu sha Sabato. Baleekelwa beewe intsala yaba ibalya, baryo baaba nga bakusa bikala bye ŋaano baalya.

²Ne Bafarisaayo ni baabona shino, baloma Yesu bari, “Bona, baleekelwa boowo bakhola shishiindu she mbikho khu shifukhu sha Sabato.”

³Naye Yesu wabeelamo ari, “Inywe simwakhusomatsakakho sheesi Dawudi aakhola niye ni babaandu beewe beesi aba ni nabo, intsala ni yabalya?

⁴Niye enjila mu ntsu ya Wele, ni babaandu beewe, baalya kumukaati kukwawongewa isi Wele, ikhaba nga shaba she kumusilo niye ni babaandu beewe khuulya kumukaati kuno. Basaayi bonyene aba nibo babafukiilisibwa khukulya.

⁵Namwe inywe si mwasomakho mu makaambila ka Musa, nga buli lwa Sabato, basaayi babaaba mu Lisaayilo Likhulu, bafuniaaka likaambila lye khu Sabato, ne nga sibali ni kumusaango ta?

⁶Ne ari imbaboolela ndi, iliyo shishiindu shikhulu shishifuura Lisaayilo Likhulu.

⁷Muba babamanya, khali mumanyile kamakhulu ke shisharonebwa shishiloma shiri, ‘Mu shiifwo she tsisaayilo, khali mubeele be shiisa isi babaandi.’ Muba babamanya sheesi shino shimanyisa, khali simukhaliile kumusaango ibo babaakhali ni kumusaango ta.

⁸Lwekhuuba Umwaana w'Omuundu niye Umukasya wa Sabato.”

⁹Yesu waarurayo iyo waatsya mu ntsu iye khukhwisaayilamo iye Bayudaaya,

¹⁰mu bweenemwo mwabamo umusaani uwaba ni kumukhono kumuleme. Ne babaandu balala babaakana khuwabilayo Yesu lwe khukhola shishiindu shishikhali shilayi, kila bamureeba bari, “Shifukilisibwa mu makaambila iwe khuwonesela umuundu khu shifukhu sha Sabato?”

¹¹Yesu naye wabareeba ari, “Naanu khwiinywe n'aba ni lisheese lyeewe litweela ne lyaakwa mwilowo khu shifukhu sha Sabato, ukhatsya walirusamo?

¹²Umuundu afuura lisheese aleeyi naabi! Nashiryo shili shilayi khukhola bulayi khu shifukhu sha Sabato.”

¹³Lwanyuma kila Yesu aloma umusaani tsana uwe kumukhono kumuleme ari, “Kolola kumukhono kwoowo.” Umusaani n'akukolola, kwaaba kwawonele, nga kuli nga kukwashe.

¹⁴Ne Bafarisaayo barura ibulafu, bakanikhila atweela, nga ni bakane bamwiire.

¹⁵Aryo Yesu n'amanya khu luwomelo luno, waarurayo waatsya, ni babaandu bakali bamuloondakho, ni naye wabawonesa boosi babaaba balwaale.

¹⁶Ne waabakhoonyakilila ari balekhe khuboolelakho umuundu yeesi ta.

¹⁷Shino shakholekha nio shinyale khukhwoolelesa sheesi umuŋoosi Yisaaya aloma ari,

¹⁸“Bona, umwakaanisi wase isi narobola, niye isi ingana, naluundi niye uwuntsikhoyesa buulamu bwase, indimurakho Umwoyo wase, ni naye alilaangilila khuukhala kumusaango khwa ŋali isi kamanaambo,

¹⁹Niye s'alilomanakho, namwe s'aliyokesakho ta. Mbaawo umuundu yeesi uliwulilakho likono lyeewe mu mikhoosi kye mu shiriimba ta.

²⁰Niye s'alifuniaaka lukholo lulwifuumbilemo ta, namwe s'alisimisa lutaambi lulukana khuwakho kumulilo ta. Shino alishikhola khukhwoolesa nga kumusaango kwa ŋali kwaamalile khuukhaliwa.

²¹Ni babaandu be kamanaambo koosi balimuramo bubwiyikinwa bwaabwe.”

²²Lwanyuma babaandu babaandi baamureerayo umuundu mutweela uwaba ataambisibwa ni kimisaambwa, nga ali umubofu naluundi nga ali wawuma. Yesu waawonesa umusaani uyo, aryo waanyalisa khuukanikha ni khuubona.

²³Kamatuuli ke babaandu boosi beyaanga, nga baloma bari, “Manya umusaani uyu anyala khuuba umwitsukhulu wa Dawudi?”

²⁴Ne Bafarisaayo ni bawulila shino, baloma bari, “Umusaani uyu awoona kimisaambwa kimibi khuurura, lwekhuuba Belizebuli umukhulu we kimisaambwa kimibi niye umuwa bunyala ibwo.”

²⁵Yesu waamanya byeesi baaba bambaasa kila abaloma ari, “Buli buyiinga ni bwawukhanamwo bwonyene, buhela. Na buli shiriimba namwe muungo ni mubamo khukhwawukhanamwo, ibawo khuukwa.

²⁶Nashiryo Sitaani n'aba nga esoolanisa umweene, aba wawukhanilemo umweene, buyiinga bweewe bunyala buryeena khukhwiimawo?

²⁷Ne noola ise imboona kimisaambwa kimibi khulwe bunyala bwa Belizebuli, ne baloondeleli beenywe babiwoona khulwe bunyala bwa naanu? Baryo nibo balibakhalila inywe kumusaango.

²⁸Ne noola ise imboona kimisaambwa kimibi khulwe bunyala bw'Omwoyo wa Wele, Buyiinga bwa Wele bwaamalile khaale khubeetsila inywe.

²⁹“Namwe mbaawo umuundu unyala khuufuna luundi wenjila mu ntsu y'omuundu uwe kamaani, wanuula bibiindu byeewe, khurusakho nga wanyooyile khumubowa, aryo nio wanyalisa khunuula bibiindu.

³⁰“Umuundu yeesi ukhali khu lubeka lwase ta niye aba umusiku wase. Ni nooyo ukhabuusanisila atweela ni nase ta, aba asalanisa.

³¹Ni lwe lomo yino mbaloma ndi, babaandu baliyakhilwa buli shonako shoosi, ni khukhoma khweesi bakhomamo Umwaana w'Omuundu. Ne shiibi she khufwotsola Umwoyo Umukhosefu, sishiliyakhilwa ta.

³²Buli muundu yeesi ulikhoma Umwaana w'Omuundu anyala khukhwiyakhilwa, ne buli muundu yeesi ufwotsola Umwoyo Umukhosefu si bali mwiyakhila bibyoonako ta, oba mu muboolo kuno, namwe kukwiitsa muumoni.

³³“Buli kusaala kuulayi kwaanakho bibyaamo bilayi, ni kuusaala kuubi nakwo kwaanakho bibyaamo biibi. Lwekhuuba buli kusaala kumanyikhila khu byaamo byakwo byeesi kwaana.

³⁴Inywe tsindemu tse buutwa! Munyala muryeena khukanikha bibiindu bilayi nga inywe mwabeene muli babaandu baabi? Lwekhuuba kumunwa kw'omuundu kukanikha ibyo bibitsuule mu mwoyo kweewe.

³⁵Umuundu umulayi arusa bilayi nga abyaamisa mwibiikhilo lyeewe lilayi lye kumwoyo kweewe, n'umuundu umubi naye aryo biibi abirusa nga abyaamisa mwibiikhilo lyeewe liibi lye kumwoyo kweewe.

³⁶Nashiryo imbaboolela ndi, buli lomo yoosi yeesi babaandu baloma ikhalimo kumukaso ta, balikiwotsela khu shifukhu she khuukhalilakho kumusaango.

³⁷Biryo bilomo byoowo byeesi ukanikha bilikila ufuure kumusaango, namwe bilikila kumusaango kukhufuure.”

³⁸Baryo batweela khu Bafarisaayo, ni baleekeli be kamakaambila ka Musa baloma Yesu bari, “Umuleekeli, khukana khubone khabonelo khe kamakaanga kheesi unyala khukhola.”

³⁹Kila Yesu naye abeelamo ari, “Kumuboolo kumubi kuno naluundi kukukhafukiilila ta, nikwo kuweentsa khabonelo khe kamakaanga. Ne mbaawo khabonelo khe kamakaanga khoosi kheesi kane mubone ta, khurusakho khabonelo khe kamakaanga kh'omuŋoosi Yona.

⁴⁰Lwekhuuba nga Yona n'amala munda mwe nyeeni imboofu bifukhu bitaru shiilo ni kumuusi, n'Umwaana w'Omuundu naye aryo alimala bifukhu bitaru shiilo ni kumuusi aasi i makoombe.

⁴¹Ne khu shifukhu she khuukhalilakho kumusaango, babaandu be Nineve balimikha atweela ni babaandu be kumuboolo kuno, babafuurise kumusaango, lwekhuuba nibo bebiiyisa bibyoonako byaabwe, ni bawulila khuboolela khwa Yona. Ne ari iliwo ano uyo uuli umukhulu naabi khufuurisa Yona.

⁴²“N'umuyiinga umukhasi uwaama imwaalo we shiibala mu buyiinga bwa Sheba, alimikha afuurise babaandu be kumuboolo kuno kumusaango khu shifukhu she khuukhalilakho kumusaango, lwekhuuba niye aakyeenda khukhwaama ibwaakamilo we shiibala, weetsa khurekeeresa kamakhula ka Solomoni. Ne ari bona iliwo ano uyo uuli umukhulu naabi khufuura Solomoni.

⁴³“Nga shisaambwa shiibi shaarurire mu muundu, shitsya shakyeendanaka mu biifwo bibikhalimo kameetsi ta, nga shiweentsa shiifwo ekhuwolela. Ne ni shilekha khunyoola ta,

⁴⁴shiilomela shisheene shiri, ‘Kane nileyo mu ntsu yase mweesi naama.’ Ne ni shiitsa shanyoola nga intsu iyo ili busa, nga intseye bulayi, luundi imiliwu, nga yaŋoonewele bulayi.

⁴⁵Shiryo, shirura shatsya shareera bisaambwa bibiindi musaafu bibiili biibi khushifuurisakho nisho. Byoosi biitsa byaweela mu ntsu iyo, byamenyamo. Ni intsakamo iy'omuundu uyo iba imbi naabi ni khufuurisa bibyanyoowa. Aso shiliiba shiryo isi babaandu baabi be kumuboolo kuno.”

⁴⁶Aryo Yesu n'aba nga ashikanikha isi kamatuuli ke babaandu, maayi weewe, ni babandaaye beewe beetsa beema ibulafu, nga bakana bakanikhekho ni naye.

⁴⁷Umuundu mutweela weetsa waboolela Yesu ari, “Bona maayi woowo ni babandaayo beemile ibulafu bakana khukhukanikhayo.”

⁴⁸Kila Yesu elamo ari, “Maayi wase niye naanu? Naluundi babandaayase nibo banaanu?”

⁴⁹Wakolola kumukhono kweewe wakuloselela isi baleekelwa beewe, waaloma ari, “Bano nibo maayi wase, nibo babandaayase.

⁵⁰Buli muundu yeesi ukhola byeesi Paapa wase uli mwikulu akana, niye wandaayase, niye umukooko wase luundi niye maayi wase.”