Read lumasaaba Matayo 13 Bible Online

Matayo 13 - lumasaaba bible

Matayo 13

¹Khu shifukhu sheene isho, Yesu waarura mu ntsu, waatsya khu ndulo khwe inyaantsa wekhala aasi[9] khuleekela kamatuuli ke babaandu.

²Ne kutuuli kwe babaandu bano ni kwamubuungililakho lukali, waaniina mwikhoŋolo waaliikhalamo, ne kamatuuli ke babaandu keemikha khu ndulo.

³Aryo Yesu waababoolela bibiindu bikali busa nga araambisa tsisimo, nga aloma ari: “Aabawo umulimi mutweela uwarura khuutsya khumiitsa bumiitso bweewe.

⁴Ne n'aba nga amiitsa bumiitso, bulala bwakwa khu ntsila, ni binywiinywi byeetsa byabulya.

⁵Bumiitso bubuundi bwakwa khu lwaanda akhali liiloba likali ta, lubaluba, bwaarura, ne lwekhuuba sibwaba ni liiloba lilimala ta,

⁶inyaanga ni yarura, bwaniaala. Lwekhuuba sibwaba ni kimilandila kimileeyi ta, buryo bwooma.

⁷Bumiitso bubuundi bwakwa mu mawa kakatsowa, karyo kaasindakilila bibyarura tsana.

⁸Bumiitso bubuundi bwakwa khu liiloba lilayi, bwaatsowa, bwaana bibyaamo, buulala bwaanakho shitoondo shitweela, bubuundi kamakhumi kasesaba, bubuundi kamakhumi kataru.”

⁹Yesu waabaloma ari, “Uli ni kamaru ke khuwulila, n'awulile.”

¹⁰Lwanyuma baleekelwa beetsa isi Yesu, baamureeba bari, “Iwe shiina shikila ukanikha isi babaandu bano musimo?”

¹¹Yesu naye wabeelamo ari, “Inywe mwawebwele khumanya bimoonyo bye Buyiinga bwe mwikulu, ne sishili shiryo isi babaandu babaandi ta.

¹²Lwekhuuba buli umuundu yeesi ulikho ni shishiindu, balimuloselakho, ni naye aliiba ni bikali. Ne buli muundu yeesi ukhalikho ni shishiindu shoosi ta, balimurusakho ni khafwiiti akho abe kheesi ali nakho.

¹³Shino nisho shishikila ise nakanikha musimo: nio khulola balole, ne balekhe khubona ta, khurekeeresa barekeerese, ne balekhe khubimanya ta.

¹⁴Ne buŋoosi bwa Yisaaya umuŋoosi, bwolele isi muli, nga niye n'aloma ari, ‘Babaandu bano khuwulila kane bawulile busa, ne sibalibimanya ta. Khulola kane balole busa, ne sibalinyala khubyofwaasa ta.

¹⁵Lwekhuuba kimyoyo kye babaandu bano kyasitowele, ni kamaru kaawe kekalikhile, naluundi bafunyikhilisile tsimoni tsaabwe. Sibanyala khubona ni tsimoni tsaabwe ta, namwe sibanyala khuwulila ni kamaru kaawe ta, naluundi sibamanya ni kimyoyo kyaabwe ta. Baba babanyalisile khukhola bino, khali bashuukhile beetsa isiise, Wele waabwe ni nase nandibawonesele.’

¹⁶“Ne inywe nga Wele waabaweele ikhabi! Lwekhuuba tsimoni tseenywe tsibona, ni kamaru keenywe kawulila.

¹⁷Lwekhuuba ilala imbaboolela ndi, baŋoosi bakali busa, ni babaandu ba Wele bakwalaafu baakana naabi khuubona bibiindu bino inywe byeesi mubona, ne sibanyalisa khuubibona ta. Naluundi baakana naabi khuuwulila inywe byeesi muwulila, ne sibaanyalisa khuubiwulila ta.

¹⁸“Aso, ari ni murekeerese sheesi lusimo luno lw'omumiitsi lumanyisa.

¹⁹Bumiitso bubwakwa khu ntsila nibo babaandu babaawulila ilomo iye Buyiinga, ne baalekha khukimanya ta. Umusiku wa Wele eetsa waawutula isho shishimiitsibwile mu myoyo kyaabwe.

²⁰Bumiitso bubwakwa khu lwaanda nibo babaandu babaawulila ilomo, baakifukiilila buulayi ni kumwikhoyo mu myoyo kyaabwe.

²¹Ne lwekhuuba sibali ni tsiindi taawe, ilomo siyiikha mu myoyo kyaabwe mukari yaamalakho imbuka ta. Ne bukosi namwe kumutaambo ni biitsa lwe ilomo, babaandu bano bakhasikhana khaangukho.

²²Bumiitso bubwakwa akari mu mawa nibo babaandu babaawulila ilomo, ne khukhwiyembelela khwe shiibala shino, ni khukhwiwotooma khwe buyiindifu, biryo bisindakilila ilomo byakihesa, yaalekha khwaanakho bibyaamo ta.

²³Ne bumiitso bubwakwa khu liiloba lilayi nibo babaandu babawulila ilomo, bakimanya buulayi. Baryo ilala nibo baanakho bibyaamo, alala baanakho shitoondo shitweela, alala kamakhumi kasesaba, ni alala kamakhumi kataru.”

²⁴Yesu waababoolela lusimo luluundi nga aloma ari, “Buyiinga bwe mwikulu bufwaananisibwa n'umuundu uwamiitsa bumiitso bulayi mu mukuunda kweewe.

²⁵Ne babaandu ni baaba nga baakonele mu shilo shitweela, umusiku weetsa waamiitsa bumiitso bwe kumusiru akari mu bilime bino waatsya.

²⁶Ne iŋaano yino ni yamala khuurura, yaanakho bibyaamo, ni kumusiru kwa tsana kwabyoneka.

²⁷Babakaanisi b'omweene mukuunda baamwiitsayo, baamuloma bari, ‘Musakhulu, iwe siwamiitsa bumiitso buulayi mu mukuunda kwoowo? Ne ari kumusiru kuno kwaamile waheena?’

²⁸Naye umweene mukuunda waabaloma ari, ‘Umusiku niye uwakhola bino.’ Babakaanisi tsana baamureeba bari, ‘Ari ukana khutsye khukukhuulake?’

²⁹Naye waabeelamo ari, ‘Taawe, lwekhuuba ni kane mube nga mukhuulaka kumusiru, munyala mwakhuulilamo ni ŋaano nayo.

³⁰Lekha byoosi bitsowele atweela khukhwoolesa khu mbuka iye khuukyesa. Ni khu mbuka nyene iyo, indiloma babakyesa banyoowe bakhuulake kumusiru, bakubowake kimirwe, bakwoshe. Ne lwanyuma, imbalome babuusanise iŋaano, bakibuunge mu shiirara shase.’ ”

³¹Yesu luundi ndi waababoolela lusimo, nga aloma ari; “Buyiinga bwe mwikulu bufwaananisibwa ni khamiitso kaladaali,[10] kheesi umuundu abukula, wakhamiitsa mu mukuunda kweewe.

³²Nakho ikhaba nga khali khafwiiti lukali khufuura bumiitso bubuundi bwoosi khu shiibala, ne ni khaatsowa, khekyelamo kusaala kuboofu khufuurisa kimisaala kikiindi kyoosi. Khamiitso khano khamamwo kusaala khweesi binywiinywi bye mu ngaaki biitsa byombekhamo biiswi mu sakya tsakwo.”

³³Yesu waababoolela lusimo luluundi nga aloma ari: “Buyiinga bwe mwikulu bufwaananisibwa ni kamamela keesi umukhasi aabukula, waakatubaasa mu ndubi tsitaru tse buufu bwe ŋaano, khukhwoolesa buufu bubwakaandiwa ni bwasiila.”

³⁴Yesu araambisatsaka tsisimo nga n'aba akanikha isi kamatuuli ke babaandu. Mbaawo shishiindu shoosi sheesi abakanikhayo akhali khuraambisa tsisimo.

³⁵Shino ashikhola aryo, khukhwoolelesa sheesi Wele alomela mu muŋoosi, nga aloma ari, “Indiraambisa tsisimo nga inganikha isi babaandu, indibaboolela bibiindu bibyaba byabisibwa khukhwamila ilala khu khubuumbibwa khwe shiibala.”

³⁶Lwanyuma nga Yesu warurirewo isi lituuli lye babaandu lyaba, wenjila mu ntsu, baleekelwa beewe beetsa is'ali, bamuloma bari, “N'ukhusontsoole ifwe lusimo lwe kumusiru kukwaba mu mukuunda kwe ŋaano.”

³⁷Yesu naye wabeelamo ari, “Umuundu uwamiitsa imiitso indayi mu mukuunda niye Umwaana w'Omuundu.

³⁸Ni kumukuunda nikwo shiibala shoosi, ni bumiitso bulayi nibo babaana be Buyiinga. Ni kumusiru nibo babaana b'omusiku wa Wele.

³⁹N'umusiku uwamiitsa kumusiru kweene niye Sitaani. Likyesa nilyo intsakamo ye shiibala, ni babakyesa nibo bamalayika.

⁴⁰Nga kumusiru ni kubuusanisibwa, kwokhebwa ni kumulilo, ni nasho shiliiba shiryo nga intsakamo ye shiibala yoolile.

⁴¹Umwaana w'Omuundu alirumana bamalayika beewe khuutsya babuusanise buli muundu yeesi abe ukhola bye bubwoonaki bamukhuule, bamuruse mu Buyiinga bweewe.

⁴²Ni babaandu bano babaakhola biibi, balibatuuma mu sheeso she kumulilo, mu bweenemwo nimwo mumuliba khulila, ni khukhwilumaka kameeno lwe butsiina bukali.

⁴³Ne babaandu ba Wele babaakhola bye bukwalaafu bamwekhamwekhe nga inyaanga mu Buyiinga bwa Paapa waabwe. Inywe noola muli ni kamaru ke khuwulila ni muwulile.”

⁴⁴Yesu weloosela nga aloma ari: “Buyiinga bwe mwikulu bufwaananisibwa ni she buyiindifu shishaba shaabisibwa mu mukuunda. Ne umuundu mutweela n'ashinyoola, waashibisa luundi. Ni lwe khukhwikhoya khuukali, atsya waakulisa byoosi byeesi ali nabyo, lwanyuma waakobola waakula kumukuunda ukwo kwoosi.”

⁴⁵Yesu ndi luundi waaloma ari: “Luundi Buyiinga bwe mwikulu bufwaananisibwa n'umuundu umukulisi abe uweentsa shishiindu she lisuno shilayi naabi.

⁴⁶Ne lwanyuma lwe khuunyoola shitweela she lisuno isho, atsya waakulisa ibyo byoosi abe byeesi ali nabyo, waakobola waakula she lisuno shilayi isho.”

⁴⁷Yesu ndi waaloma ari: “Luundi ndi Buyiinga bwe mwikulu bufwaananisibwa ni khatiimba khe khuulobelamo tsinyeeni kheesi batuuma mu nyaantsa. Nakho kharyo khawaamba tsinyeeni tsa buli saambo yoosi.

⁴⁸Khatiimba khano ni khetsula, balobi bakhakhweesa, bakharusa ibulafu khu ndulo khwe inyaantsa khu lwoomu. Baryo bekhala aasi, baloondakamo tsindayi, batsira mu shiindu, ne tsitsiili tsiimbi batsituumaka.

⁴⁹Ni nasho shiliiba shiryo, nga intsakamo ye shiibala yoolile. Bamalayika baliitsa bangalakemo babaandu babaakhola biibi khubarusa mu baandu babaakhola bye bukwalaafu.

⁵⁰Baryo babaakhola biibi ibo, babatuume mu sheeso she kumulilo. Mu sheeso iyo niyo iliiba khulila ni khukhwilumaka kameeno lwe butsiina bukali.”

⁵¹Lwanyuma Yesu wareeba baleekelwa beewe ari, “Bilomo bino byoosi mwabimanyile bulayi?” Nabo bamwiilamo bari, “Ee, khwabimanyile.”

⁵²Aryo kila abaloma ari, “Nashiryo buli muleekeli yeesi uwe kamakaambila ka Musa uleekebwela wekyela umuleekelwa mu Buyiinga bwe mwikulu, afwaanana nga umuundu umweene intsu, wuutsya warusa khukhwaama mwibikhilo lyeewe bibiindu byoosi bishaakha ni bikhale byeene.”

⁵³Aryo Yesu n'amala khuukanikha tsisimo tsino, waarura mu shiifwo isho waatsya.

⁵⁴Ne nga wolele mu shiriimba she waabwe, waatsya waarakikha khuuleekelela mu ntsu iye khukhwisaayilamo, ni nabo boosi bababaamo beyaanga naabi. Lwekhuuba baaloma bari, “Oyu kamakyesi kano koosi akamisa waheena, ni kamaani kano ke khuukhola bye kamakaanga bino?

⁵⁵Umweene uyu s'ali niye umwaana w'omubeetsi we tsimbaawo? Maayi weewe s'ali niye Malyamu, ni babandaaye beewe sibali nibo Yakobo, ni Yusufu, ni Simoni, ni Yuda?

⁵⁶Ni bakooko beewe nabo sibamenya mu shiriimba shino? Kale oyuno amisa eena bibiindu bino byoosi?”

⁵⁷Baryo babaandu ibo boosi bamwikaana lw'ebyo byeesi aba nga akhola. Ne Yesu wabeelamo ari, “Umuŋoosi bamuwa shiriifwa buli aandu aandi oosi, khuurusakho abo be mu shiriimba sheewe ni be muungo mweewe.”

⁵⁸Ibweene iyo Yesu s'akholayo bye kamakaanga bikali ta, lwekhuuba babaandu sibaabamo ni khuufukiilila khwoosi ta.