Read lumasaaba Matayo 14 Bible Online

Matayo 14 - lumasaaba bible

Matayo 14

¹Mu bifukhu ibyo, Herode umuwuli, waaba nga awulilaka lubuyi luluwaamba khu Yesu.

²Kila alomela babakaanisi beewe ari, “Oyu niye Yokana Umubatisa! Waalamukhile khukhwaama mu bafu, nisho shishikila akhola bye kamakaanga bino byoosi.”

³Shino shaba shiryo lwekhuuba Herode makiboolekho, awaamba Yokana Umubatisa wamubowa, wamura mu mapuusu. Herode akhola shino khu lwa Herodiya, umukhasi wa wandaaye Filipo.

⁴Yokana Umubatisa alomela Herode ari, “Shili she kumusilo iwe khuyila Herodiya, umukhasi wa wandaayo.”

⁵Aryo Herode wakana khukhwiira Yokana, ne warya lwe kamatuuli ke babaandu, lwekhuuba babaandu bambaasa Yokana khuuba umuŋoosi.

⁶Shifukhu shoola khweesi Herode akabulilakho kamayiiya khu shifukhu she kamasaalikha keewe. Umukhaana wa Herodiya weetsa washinila iburaangisi waabwe, wekhoyesa naabi Herode.

⁷Ni abweene awo, Herode wamulomela nga etsuba ari, “Kane ikhuwe shishiindu shoosi sheesi kane unoombe.”

⁸Ne umukhaana n'amala khuboolelwa ni maayi weewe shiina she khuloomba, waaloma ari, “Khu saawa yino, ingana wumbe kumurwe kwa Yokana Umubatisa nga kuli khu lweelo.”

⁹Umuyiinga kumutaambo kwamuwaamba lukali, ne lwekhuuba etsubila mu moni tse bakyeni beewe boosi beesi aba nabo khu mayiiya, walakila ari bawe umukhaana kumurwe kwa Yokana Umubatisa nga n'aloomba.

¹⁰Aryo walakila baatsya bakhalakho Yokana Umubatisa kumurwe mu mapuusu.

¹¹Kumurwe tsana bakureera khu lweelo, bakuwa umukhaana, n'umukhaana naye wakuyilila maayi weewe.

¹²Baleekelwa ba Yokana beetsa basuta kumulaambo kweewe, bakuyila, bakusiikha. Lwanyuma baatsya baboolela Yesu byoosi bibyakholekha.

¹³Aryo Yesu n'awulila bino bibiwaamba khu Yokana Umubatisa, waarurayo iyo, wambukhila mwikhoŋolo, waatsya iyo yenyene, mu shiifwo mumukhali babaandu ta. Ne kamatuuli ke babaandu ni kawulila karyo, bamaka mu biriimba nga bakyeenda khumuloondakho.

¹⁴Ne Yesu n'amala khurura mwikhoŋolo, waabona lituuli lye babaandu bakali, wabawaambila shiisa, wawonesa ibo boosi babaaba balwaale.

¹⁵Ne antsye ni bwaba nga bwilabula, baleekelwa beewe beetsa is'ali bamuloma bari, “Ano khuli mu mubiimbi, naluundi antsye bona bulikho bwilabula, siibula babaandu batsye beweentsele bye khulya mu byaalo esi kane babinyoole.”

¹⁶Yesu naye wabeelamo ari, “Babaandu bano sibaakha khuutsya ta. Inywe mwabeene ni mubawe shakhulya shishiiliwo balye.”

¹⁷Nabo baleekelwa bamwiilamo bari, “Ano khuliwo ni kimikaati kiraano kyonyene, ni tsinyeeni tsibili.”

¹⁸Lwanyuma Yesu wabeelamo ari, “Ni mubindereere ano.”

¹⁹Aryo kila alakila babaandu khukhwikhala aasi khu bunyaasi. Waabukula kimikaati tsana kiraano, ni tsinyeeni tsibili, waakalama mu ngaaki mwikulu, waasiima Wele. Aryo waamenyulamo kimikaati, waakiwa baleekelwa beewe, baakikabila babaandu.

²⁰Babaandu boosi baalya, bekura. Lwanyuma baleekelwa ba Yesu baabuusanisa buubuya bubwarama, betsusa bibiipo liikhumi na bibili.

²¹Buukali bwe babaandu boosi babaalya baaba boola basaani bikana biraano (5,000), nga akhurakho bakhasi ni babaana ta.

²²Khaangukho Yesu waalakila baleekelwa beewe khuuniina mu likhoŋolo, ari baraangile batsye shanjelekha we nyaantsa, nga niye n'ashiiramakho inyuma amale khusiibula lituuli lye babaandu.

²³Ne lwanyuma n'amala khusiibula babaandu, waaniina khu lukiingi khuuloomba. Ne antsye ni bwelabula, waaba nga ali yenyene ibweene iyo.

²⁴Ne khu mbuka nyene yino, likhoŋolo lyaba lyaamalile khukhwoola akari khu nyaantsa khukhwaama khu lwoomu, nga liyiyaanisibwa ni khuutumbuukha khwe kameetsi, ni mbewo ingali nga ibawuutsa khuubaama ibweeni.

²⁵Mu shilo isho, akari e tsisaawa nga sheenda namwe liikhumi na tsibili tse kumutikhinyi, Yesu umweene weetsa isi bali nga akyeendela khu meetsi.

²⁶Ne baleekelwa ni baamubona nga akyeendela khu meetsi baarya naabi, nga baloma bari, “Bona shisimu.” Baryo bahariina lwe khuurya khukali.

²⁷Ni abweene awo, Yesu waabaloma ari, “Mukheyembelela ta. Ise niye Yesu. Mukharya ta.”

²⁸Lwanyuma Petero wamuloma ari, “Musakhulu, noola iwe niye, indakile niitse is'uli nga injendela khu meetsi.”

²⁹Yesu waamulomela ari, “Ni wiitse.” Aryo Petero waarura mwikhoŋolo, wakyeendela khu meetsi nga atsya isi Yesu.

³⁰Ne Petero n'abona imbewo iye kamaani, waarya, aryo, waarakikha khukhwisiikha mu meetsi. Ne welootsa khaangu ari, “Umukasya, n'umbonese.”

³¹Khaangukho Yesu waakolola kumukhono kweewe, waamukumila, nga aloma ari, “Iwe nga uli ni khufukiilila khufwiiti. Lwashiina wikanakaane?”

³²Baryo Yesu ni Petero baniina mwikhoŋolo, ni mbewo yakama.

³³Baryo ibo babaaba mwikhoŋolo, bamwisaaya nga baloma bari, “Ilala iwe uli Umwaana wa Wele.”

³⁴Baryo Yesu ni baleekelwa beewe ni baamala khukhwambukha inyaantsa, boola khu lwoomu i Genesareeti.

³⁵Ne babaandu b'eyo ni bamwofwasa nga niye Yesu, barumanisaka mu byaalo byeeyo bibihesanewo isi buli muundu, khureera balwaale boosi isi Yesu.

³⁶Baryo baamwikontselela bari balwaale abo batiilekho butiili khu ndulo khwe ngubo yeewe. Baryo boosi babaatiilakho baawonesebwa.