Read lumasaaba Matayo 15 Bible Online

Matayo 15 - lumasaaba bible

Matayo 15

¹Lwanyuma Bafarisaayo ni baleekeli be kamakaambila ka Musa baama i Yerusalemu, beetsa isi Yesu baamureeba bari,

²“Lwashiina baleekelwa boowo bafuniaaka bye tsisaambo tse basakhulu tsikhale? Lwekhuuba sibasaaba kamakhono[11] nga batsya khulya ta.”

³Yesu wabeelamo ari, “Ni nanywe lwashiina mufuniaaka likaambila lya Wele lwe khuukana khuwaamba tsisaambo tseenywe tsikhale?

⁴Lwekhuuba Wele aloma ari, ‘Yiisatsakamo paapawo ni maayi woowo lukoosi,’ luundi ari, ‘Umuundu yeesi ukhomaka paapawe ni maayiwe, akhila khukhwiribwa.’

⁵Ne inywe muloma muri umuundu yeesi uloma paapawe namwe maayiwe ari, ‘Shoosi sheesi naandikhuweele khuukhuyeeta, shili shiwaanwa sha Wele.’[12]

⁶Uyo uloma aryo bari s'akhiile khukhwiisamo paapawe, namwe maayiwe shiriifwa ta. Musaambo iyo inywe mufuniaaka likaambila lya Wele lwe khuukana khuuwaamba tsisaambo tseenywe tsikhale.

⁷Inywe babeeyi babemiliisa khu ngaaki, Yisaaya umuŋoosi s'abalomakho bulayi inywe nga n'aloma ari,

⁸‘Babaandu bano baantsisamo ise shiriifwa ni kiminwa busa, ne kimyoyo kyaabwe kiindi aleeyi naabi.

⁹Bamala busa imbuka yaabwe khukhuuntsisaaya, nga baleekela kamakaambila ke babaandu busa khuuba niko ka Wele.’”

¹⁰Yesu walaanga babaandu waabaloma ari, “Ni muwulile mumanye byeesi ise inoma.

¹¹Akhuba shishiindu shishinjila mukhanwa kh'omuundu nisho shishimukhola waba umunyaalu ta, ne isho shishirura mukhanwa nisho shishonakisa umuundu.”

¹²Lwanyuma baleekelwa bamwiitsayo bonyene bamuloma bari, “Wamanyile nga Bafarisaayo shibabirisile buubi nga ni bakhuwuliile ukanikha uryo?”

¹³Naye Yesu wabeelamo ari, “Buli kusaala kwoosi kweesi Paapa wase uwe mwikulu akhabyaala, kulikhuuliwa ni tsinandila tseene.

¹⁴Ni mubalekhe mukhabenaanayo ta. Nibo bali baraangilisi baabofu busa babaraangilila baabofu bashaabwe. Lwekhuuba umubofu mutweela n'araangilila umubofu washe, boombi bakwa mwilowo.”

¹⁵Petero welamo ari, “N'ukhusontsoole lusimo lweesi ulomile.”

¹⁶Yesu wabareeba ari, “Ni nanywe si muli ni kamakyesi ta?

¹⁷Si mumanya muri shishiindu shoosi shishinjila mukhanwa, shitsya busa munda, lwanyuma sharura ibulafu shaatsya mu khayu ta?

¹⁸Ne bibiindu bibyaama mukhanwa nibyo byaama mu mwoyo, bino nibyo bibyoonakisa umuundu.

¹⁹Lwekhuuba mu mwoyo nimwo mumwamamwo bibyambaaso biibi, bubwiiri, buyeyani, khukhwikoomba khuubi, bubwiifwi, buwombesi, ni khufwotsola.

²⁰Bibiindu bino nibyo bibyoonakisa umuundu, ne khuulya busa nga mbakhusaaba kamakhono sikhwonakisa umuundu yeesi ta.”

²¹Yesu waarurayo iyo, waatsya mu byaalo bye Tuulo ni Sidoni.

²²Ibweene iyo umukhasi umu Kanani wamayo, weetsa is'ali, welootsa ari, “Umwitsukhulu wa Dawudi, n'umambile shiisa, umukhaana wase walwaalile lukali, kimisaambwa kimutaambisa.”

²³Ne Yesu waalekha khumwiilamo ta. Kila baleekelwa beewe bamwiitsayo baloma bari, “N'uwoone umukhasi uyu atsye, lwekhuuba wakhulondelele nga ayokesa lukali.”

²⁴Yesu wabeelamo ari, “Ise Wele anduma isi kamasheese kakaakoraana ke mu ntsu ya Isiraeli konyene.”

²⁵Ne umukhasi weetsa waakwa aasi mu bikyele byeewe, waamwikontselela ari, “Umukasya, n'unjeete.”

²⁶Yesu welamo ari, “Sishili shilayi khubukula biilyo bye babaana wabituumila tsiimbwa ta.”

²⁷Umukhasi naye welamo ari, “Ni abweene Umukasya, ne ni tsiimbwa natso tsilya buubuya bubuukwa khukhwaama khu meetsa ye bakoosi baatso.”

²⁸Yesu welamo ari, “Mukhas'iwe khufukiilila khwoowo nga khukali! Aso, khashikholekhe is'uli nga n'uloombile.” Ni mu saawa nyene iyo, umukhaana weewe wawona.

²⁹Yesu waarurayo waatsya nga abirira khu ndulo khwe inyaantsa iye Galilaaya. Lwanyuma waniina khu lukiingi wekhala aasi.

³⁰Kamatuuli makali ke babaandu keetsa is'ali nga bareera baleme, baabofu, babaayikila, bawawuma, ni babaandi swa busa, baabara abikyele byeewe; naye Yesu waabawonesa boosi.

³¹Lituuli lye babaandu lyelaliila busa, nga ni baabona bawawuma nga bakanikha, babaayikila nga bakwalaalile, baaleme nga bakyeenda, ni baabofu nga babona. Baryo boosi baabuyila Wele wa Isiraeli.

³²Yesu walaanga baleekelwa beewe beetsa is'ali, waabaloma ari, “Ise nasasiile babaandu bano, lwekhuuba babeele ni nase ano khumala bifukhu bitaru, nga sibalikho ni sheesi baliilekho ta. Ni nase shingana khubasibula nga bali ntsala busa baryo ta, lukana banyala baakwa mu ntsila.”

³³Baleekelwa beewe bamureeba bari, “Ifwe kane khwamise eena biilyo mu mubiimbi muno byeesi khunyala khwaliisila babaandu bano boosi?”

³⁴Yesu wabareeba ari, “Ne muli ni kimikaati kyeenga?” Nabo bamwiilamo bari, “Kili musaafu, ni bunyeeni bukyeekhe buri.”

³⁵Yesu walakila babaandu bekhale aasi.

³⁶Lwanyuma wabukula kimikaati ikyo musaafu, ni bunyeeni ibwo. Ne lwanyuma nga waamalile khubiloombela ikhabi wabimenyulamo, wawa baleekelwa, ni baleekelwa nabo babikabila babaandu.

³⁷Babaandu boosi baalya, khukhwoolesa ni bekura. Lwanyuma baleekelwa babuusanisa buubuya bubwarama, bwetsula bibiipo musaafu.

³⁸Bukali bwe babaandu babaalya baaba basaani bikana bine (4,000), nga akhurakho bakhasi ni babaana ta.

³⁹Lwanyuma nga Yesu waasibuule babaandu khuutsya, umweene waaniina mwikhoŋolo, waatsya mu shaalo sha Magadani.