Read lumasaaba Matayo 16 Bible Online

Matayo 16 - lumasaaba bible

Matayo 16

¹Lwanyuma Bafarisaayo ni Basadukaayo beetsa isi Yesu bakana khumureka nga bamuloomba abokesane khabonelo khe kamakaanga khukhwaama mwikulu.

²Naye wabeelamo ari, “Antsye ni buba nga bwilabula, muloma muri, ‘Kane antsye abe akhulayi, lwekhuuba likulu lyabesemile,’

³ni kumutikhinyi mwaloma muri, ‘Kane abewo ikhuungu shaleelo, lwekhuuba likulu lyabesemile luundi lyamaliyile.’ Inywe mwamanya khuteebelesa likulu ni lifwaana, ne simunyala khuteebelesa bubonelo bwe bifukhu ta.

⁴Kumuboolo kumubi kuweentsa khabonelo khe kamakaanga, ne mbaawo khabonelo khe kamakaanga khakhaliweebwa khurusakho khabonelo khe kamakaanga kha Yona.”[13] Lwanyuma Yesu waabarurakho waatsya.

⁵Nga baakhalisile inyaantsa boolele shanjelekha, baleekelwa baaba beebiliile khuureerayo kimikaati.

⁶Yesu waabaloma ari, “Ni mwiliinde luundi mwiyaye naabi isi kamamela ke Bafarisaayo ni Basadukaayo.”

⁷Kila baleekelwa barakikha khuukanikhanamo bonyene bari, “Waalomele aryo lwekhuuba khwebiliile khuureerayo kimikaati.”

⁸Ne Yesu nga waamanyile byoosi byeesi baaba baloma, kila abareeba ari, “Inywe babaali ni khuufukiilila khukyeekhe, lwashiina mwireebana mwenyene muri, simuli ni kimikaati?

⁹Mushiili khumanya ta? Simushebulila kimikaati kiraano kyeesi nawa babaandu bikana biraano, bibiipo byeenga byeesi mwabuusanisa?

¹⁰Ni kimikaati musaafu kyeesi nawa babaandu bikana bine, bibiipo byeenga byeesi mwabuusanisa?

¹¹Shiina shishibalobeele khumanya muri, ise simbeele inganikha khu mikaati ta? Ne nimwiliinde kamamela ke Bafarisaayo ni Basadukaayo.”

¹²Baryo nio lwanyuma bamanya bari, Yesu s'aba nga abalomela khukhwiiliinda kamamela kakaraambisibwa mu mikaati ta, ne isi khuleekela khwe Bafarisaayo ni Basadukaayo.

¹³Lwanyuma nga Yesu wolile mu shaalo she Kayisaliya Filipi, waareeba baleekelwa beewe ari, “Umwaana w'Omuundu babaandu bamulaanga khuuba naanu?”

¹⁴Nabo baamwiilamo bari, “Baalala baaloma bari, iwe niye Yokana Umubatisa, babaandi bari iwe niye Eliya,[14] ni babaandi bari iwe niye Yeremiya, namwe mutweela khu baŋoosi.”

¹⁵Naye Yesu waabaloma ari, “Ne inywe, ise munaanga khuuba naanu?”

¹⁶Simoni Petero waamwiilamo ari, “Iwe uli Kristo, Umwaana wa Wele Umulamu.”

¹⁷Yesu waamwiilamo ari, “Simoni, mwaana wa Yona, iwe uli n'ikhabi, lwekhuuba mbaawo umuundu ukhubimbuliile shino ta, ne Paapa wase uli mwikulu.

¹⁸Luundi ikhuloma ndi, iwe uli Petero, ni khu lwaanda khuno kane nombekhekho Lisaayilo lyase, ni kamaani ke makoombe shikalilinyala ta.

¹⁹Indikhuwa bifuungo bye Buyiinga bwe mwikulu, shoosi sheesi ubowa khu shiibala shilibowebwa ni mwikulu, ni neesho sheesi ukangulula khu shiibala, shilikangululiwa ni mwikulu.”

²⁰Lwanyuma Yesu waakhoonyakilila baleekelwa beewe balekhe khuboolelakho umuundu yeesi bari niye Kristo ta.

²¹Khukhwaama khu saawa iyo, Yesu waarakikha khukhwokesanisa baleekelwa beewe mu lubuula ari, niye shimwaakhila khuutsya i Yerusalemu, ataambisiwe bibiindu bikali, mu mikhono kye basakhulu, basaayi bakhulu, ni baleekeli be kamakaambila ka Musa, eribwe, ne lwanyuma khu shifukhu she khataru, alamusiwe.

²²Petero waamuyila andulo waamuloma ari, “Taawe Umukasya, Wele s'anyala waalekha shino shaakhukholikha khwiiwe shiryo ta.”

²³Yesu waashuukha waaloma Petero ari, “Yiila inyuma wase Sitaani, iwe uli shishituyisa isi ise, lwekhuuba siwaambaasa bya Wele ta, ne ili isaambo yeesi babaandu bambaasamo.”

²⁴Lwanyuma Yesu waaloma baleekelwa beewe ari, “Noola umuundu yeesi akana khukhuunoondelela, eyikaane umweene, etyuukhe kumusalaba kweewe anoondekho.

²⁵Lwekhuuba buli muundu yeesi ukana khuuwonesa buulamu bweewe, alibukosa, ne buli uyo yeesi ukosa buulamu bweewe khulwase, alibuwonesa.

²⁶Lwekhuuba umuundu shilimuyeeta shiina khuulya shiibala shoosi, ne wafwiila buulamu bweewe? Namwe umuundu aliwaanayo shiina nio bulamu bweewe bumukobosewele?

²⁷Lwekhuuba Umwaana w'Omuundu aliitsila mu shiriifwa sha Paapa we ni bamalayika beewe, nio lwanyuma awe buli muundu khukhwimikha khu buraambi bweewe ni buli.

²⁸Ilala imbaboolela ndi, iliwo batweela khuubo babemikhile ano babaakhalifwa ta, khukhwoolesa ni balibona Umwaana w'Omuundu nga etsila mu Buyiinga bweewe.”