Read lumasaaba Matayo 17 Bible Online

Matayo 17 - lumasaaba bible

Matayo 17

¹Lwanyuma lwe bifukhu bisesaba, Yesu waatsya ni Petero, Yakobo, ni wandaaye Yokana, baaniina khu lukiingi luleeyi, nga bali bonyene.

²Ibweene iyo Yesu wakalusibwa shifwaani sheewe nga bamubona. Mu moni mweewe mwamweekhamweekha nga inyaanga, ni bikwaaro byeewe byakhosa nga buwaanga.

³Ni mu saawa nyene iyo, Musa ni Eliya bababonekhela nga bakanikha ni Yesu.

⁴Petero waaloma Yesu ari, “Umukasya, nga shilayi ifwe khuuba nga khuli ano. Noola waakanile, kane noombakhe ano bisari bitaru; shitweela shishoowo, shishiindi sha Musa, ni shishiindi sha Eliya.”

⁵ Ne n'aba nga ashikanikha aryo, namufweeli umweekhamweekha waabafusaasa, ni likono lyaama mu namufweeli nga liloma liri, “Uyu niye Umwaana wase, umukanwa naabi. Ni mumuwuliliise.”

⁶Baleekelwa ni baawulila likono ilyo, baakwa aasi befumalikha, nga bariire naabi.

⁷Ne Yesu weetsa, waabawaambakho, waabaloma ari, “Ni mwinyukhe, mukharya ta.”

⁸Baryo ni benyusa tsimoni tsaabwe, baalekha khubonakho umuundu ukuundi yeesi ta, akhali Yesu yenyene.

⁹Ne ni baaba nga beekha khukhwaama khu lukiingi, Yesu waabakhoonyakilila ari, “Mukhaboolelakho umuundu yeesi khu khubonesebwa khuno ta, khukhwoolesa Umwaana w'Omuundu nga waalamusibwile khukhwaama mu bafu.”

¹⁰Baleekelwa baamureeba bari, “Lwashiina baleekeli be kamakaambila ka Musa baloma bari, Eliya niye uwaakhila khuunyoowa khukhwiitsa?”

¹¹Yesu wabeelamo ari, “Ilala Eliya niye ulinyoowa khukhwiitsa, aliŋoonaŋoona bibiindu byoosi.

¹²Ne mbaboolela ndi, Eliya wamala khaale khukhwiitsa, ne sibamwofwasa ta, bamukhola shoosi sheesi bakana. Aryo n'Umwaana w'Omuundu musaambo nyeneyo alitaambisibwila mu mikhono kyaabwe.”

¹³Ulwo baleekelwa baamanya bari, aaba akanikha isi bali bibiwaamba khu Yokana Umubatisa.

¹⁴Nga boolele isi lituuli lye babaandu, umusaani mutweela weetsa isi Yesu, wafukhamila aasi is'ali.

¹⁵Waloma ari, “Umukasya n'uwaambile umusiinde wase shiisa. Akwaka tsifubu, naluundi tsimutaambisa naabi. Tsifuunda ngali, tsimukwiisa mu mulilo, ni mu mbuka ikiindi lukanile mu meetsi.

¹⁶Imureerire isi baleekelwa boowo, ne baalekha khunyala khumuwonesa ta.”

¹⁷Yesu weelamo ari, “Inywe muli kumuboolo kukuukhafukiilila ta, kukwaborokha, ise indyoolesa eena khuuba ni nanywe? Ise indyoolesa eena khuubekhalilikha? Ni mumunderere ano.”

¹⁸Yesu waakhookhela shisaambwa shiibi, ni nasho shaamururamo. Ni mu mbuka nyeneyo, umusiinde tsana waawonesebwa.

¹⁹Lwanyuma baleekelwa beetsa isi Yesu mu shimoonyo, baamureeba bari, “Umukasya, ne lwashiina ifwe sikhunyalile khuuwoona shisaambwa isho ta?”

²⁰Naye Yesu wabeelamo ari, “Lwekhuuba khufukiilila khweenywe khukyeekhe. Ilala imbaboolela ndi, ni muba ni khufukiilila nga khulekhaana nga khamiitso kaladaali, munyala khuuloma lukiingi luno muri, ‘Rura khukhwaama ano, utsye iyo, nio nalwo luliitsya.’ Imbaawo shishiilibabeela shihangafu ta.”

²¹Imbaawo shishinyala shaatimisa kumusimu kwe isaambo yino ta, khuurusakho khuuloomba ni khubuya intsala.

²²Nga Yesu ni baleekelwa beewe boosi beetsile atweela i Galilaaya, Yesu waabalomela ari, “Umwaana w'Omuundu atsya khuwaanibwayo mu mikhono kye babaandu.

²³Balimwiira, ne khu shifukhu she khataru, alilamusibwa khukhwaama mu bafu.” Ni baleekelwa kumutaambo kwabawaamba.

²⁴Lwanyuma nga Yesu ni baleekelwa beewe boolele i Kaperunaumu, babuusanisi be kumusolo kwe Lisaayilo Likhulu beetsa isi Petero baamureeba bari, “Umuleekeli weenywe asasula kumusolo kwe Lisaayilo Likhulu?”

²⁵Petero wabeelamo ari, “E e, naawa.” Ne Petero n'ola mu ntsu nga ashiili khuloma ilomo yoosi ta, Yesu waamureeba ari, “Simoni, iwe waambaasa urye? Bayiinga be shiibala, kumusolo namwe busuulu babibuusanisa khukhwaama khu banaanu? Khukhwaama khu baana baabwe besiinde namwe khukhwaama khu bareende?”

²⁶Petero welamo ari, “Khukhwaama khu bareende.” Yesu waamuloma ari, “Isho shokesa shiri, babaana bali be lukoosi.

²⁷Ne khulekha khubakhalasa ta, tsya khu nyaantsa, utuume kumulobo kwoowo mu meetsi, uwaambise tsinyeeni. Ne iyo yeesi kane unyoowe khuwaambisa, wasamise mu khanwa mwayo, kane unyoolemo lipeesa. Kane uliyile, ulibawe, khusasula kumusolo kwase ni kukwoowo.”