Read lumasaaba Matayo 18 Bible Online

Matayo 18 - lumasaaba bible

Matayo 18

¹Mu saawa nyene iyo, baleekelwa beetsa isi Yesu, baamureeba bari, “Naanu ufuura bukhulu mu Buyiinga bwe mwikulu?”

²Yesu walaanga umwaana umufwiiti, waamwimisa akari awe,

³waaloma ari, “Ilala ise imbaboolela inywe ndi, ni mukhashuukha mwekyela nga babaana bafwiiti, simulinyala khukhwinjila mu Buyiinga bwe mwikulu ta.

⁴Aso, umuundu yeesi uwihombeekha nga umwaana yuno umufwiiti, niye ufuura bukhulu mu Buyiinga bwe mwikulu.

⁵Na buli uyo yeesi uwakaanila umwaana umufwiiti nga yuno, mu lisiina lyase, aba wantsakaaniile ise.

⁶“Ne umuundu yeesi ulikhonjelesa mutweela khu bafwiiti bano babaafukiilila, waabayila mu khwooneka, shiba shilayi umuundu uyo abowebwe lusisi lukali mu milo mweewe, bamutuume esiikhe mu nyaantsa indeeyi naabi.

⁷Ne nga she kumutaambo isi shiibala lwe bilomo bibireerera babaandu khukhwoneka! Bibiindu bino byaakha biitse, ne she kumutaambo isi uyo ubireera!

⁸“Noola kumukhono kwoowo namwe shikyele shoowo shikhuyila mu khwooneka, shiremekho, ushituume. Lwekhuuba shikhubeela shilayi iwe khukhwinjila mu bulamu bubukhawawo ta nga uli umuleme, namwe nga s'uli ni kumukhono, namwe ni shikyele, khufuura khutuumibwa mu mulilo kukhasima nga uli ni kamakhono kyoowo kyoombi, namwe ni bikyele byoowo byoombi.

⁹Namwe noola imoni yoowo ikhuyila mu khwooneka, kirusemo ukituume aleeyi. Lwekhuuba shikhubeela shilayi iwe khukhwinjila mu bulamu nga uli ni moni ndweela, khufuurisa khutuumibwa mu mulilo kukukhasima ta, nga uli ni tsimoni tsoowo tsoombi.”

¹⁰“Inywe ni mubone muri, simulekelesa mutweela khu bafwiiti bano ta. Lwekhuuba imbaboolela ndi busheele bamalayika baabwe mwikulu babona mu moni mwa Wele mwikulu.

¹¹Lwekhuuba Umwaana w'Omuundu etsa khuwonesa ibo babakoraana.

¹²“Inywe mwaambaasa muryeena? Umuundu n'aba ni kamasheese keewe shitoondo shitweela, ne litweela khu niko lyakoraanakho, s'alekha kamakhumi syeenda na syeenda khu lukiingi, waatsya nga aweentsa litweela ilyo lilyakoraanile?

¹³Ne n'alinyoola, ilala imbaboolela ndi, ekhoyela naabi lisheese litweela ilyo, khufuurisa iko kamakhumi syeenda na syeenda kakakhakorere ta.

¹⁴Musaambo iyo niyo ndweela, Paapa weenywe uli mwikulu, s'afukiilisa mutweela khu bafwiiti bano khuhela ta.

¹⁵“Ne nga umufukiilisi washoowo waakhukholilekho shishoonako, iwe n'utsye is'ali umuboolele buubi bweewe nga muli babili mweembi mwenyene. Nga wakhuwuliile iwe uba waamukobosele is'uli.

¹⁶Ne naakhuminyaalila, n'utsye n'umuundu ukuundi mutweela namwe babili, nio akile buli shiindu shoosi shihangasiwe ni bujulisi bwe baboni babili namwe bataru.

¹⁷Ne ni eloosela khuminyaala, boolela lisaayilo lye bafukiilisi boosi, ne n'aloba khuwulila lisaayilo lyoosi, ari ni mumuyile nga umunaambo namwe nga umubuusanisi we kumusolo.

¹⁸“Ilala imbaboolela ndi, byoosi byeesi mubowa khu shiibala, bilibowebwa ni mwikulu, ni nebyo byeesi mukangulula khu shiibala, bilikangululiwa ni mwikulu.

¹⁹Ilala, luundi imbaboolela ndi, nga babili mwiinywe ni bafukiilisana khu shiindu shoosi sheesi baloomba khu shiibala, kane Paapa weenywe uli mwikulu ashibakholele.

²⁰Lwekhuuba isi babili namwe bataru babuusanila mu lisiina lyase, nase imbaawo akari abwe.”

²¹Lwanyuma Petero weetsa isi Yesu, waamureeba ari, “Umukasya, wandaayase nga woonakile isi indi, kane imwiyakhile kimiluundi kyeenga? Niyakhile khukhwoolesa kimiluundi musaafu?”

²²Yesu waamwiilamo ari, “Akhuba kimiluundi musaafu ta, ne njeeba kamakhumi musaafu kimiluundi musaafu.[15]

²³“Ni nashiryo, Buyiinga bwe mwikulu bufwaananisibwa n'umuyiinga mutweela uwakana khukwalaasa bye tsinusu tseewe ni babakaanisi beewe.

²⁴Ne nga n'arakikha khubala, bamureerera umusaani mutweela yeesi aba abaantsa tsinusu kimikaanda liikhumi.

²⁵Ne lwekhuuba umwakaanisi yuno s'anyala khumuliyila ta, umuyiinga walakila ari umusaani bamukulise, n'umukhasi weewe, ni babaana beene, ni bibiindu byeewe byoosi byeesi aba nabyo, bimuliyile likobi.

²⁶Umwakaanisi tsana yuno waafukhama aasi is'ali, waamwikontselela ari, ‘N'untsikhalilikhekho, nase kane ikhuliyile bibyoowo byoosi.’

²⁷Umuyiinga yuno waamuwaambila shiisa, wamwiyakhila likobi, wamulekhuula.

²⁸“Ne umwakaanisi mweene yuno n'arura waatsya, wakaanana mutweela khu bakaanisi basheewe, esi naye aba abaantsa tsidinari shitoondo shitweela, waamukwa mumilo, waarakikha khuumukoka, nga amuloma ari, ‘N'undiyile bibyase byoosi byeesi ikhubaantsa.’

²⁹Umwakaanisi washeewe yuno waafukhama aasi, nga amwikontselela ari, ‘N'untsikhalilikhekho, nase kane ikhuliyile.’

³⁰Ne niye waalekha khushifukiilila ta, waamuyila waamura mu mapuusu ari khukhwoolesa n'akane amuliyile likobi.

³¹Ne babakaanisi basheewe ni baashibona baryo, bakhalala naabi, nabo baatsya basontsoola umuyiinga waabwe byoosi bibibeelewo.

³²Aryo umuyiinga walaanga umwakaanisi tsana yuno, waamuloma ari. ‘Iwe umwakaanisi ukhalimo, ise nakhwiyakhiile likobi lyoowo lyoosi, lwekhuuba waantsikontselela.

³³Nawe sishakhwakhiile khuwaambila umwakaanisi uwashoowo shiisa, nga ise ni nakhuwaambiile iwe?’

³⁴Mu bukhalafu bukali, umuyiinga yuno waamuwaambisa basilikhale bamuwe shitaambiso, khukhwoolesa n'akane amale khumuliyila likobi lyoosi.”

³⁵Yesu waamalilisayo nga aloma ari, “Aryo Paapa wase uwe mwikulu n'alibirisa buli mutweela khus'inywe, akhali nga buli mutweela mu mwoyo kweewe weyakhila wandaaye.”