Read lumasaaba Matayo 19 Bible Online

Matayo 19 - lumasaaba bible

Matayo 19

¹Ulwo nga Yesu waamalile khuuloma aryo, waarura i Galilaaya, waatsya mu shaalo she Yuda, injelekha we luluutsi Yorudaani.

²Kamatuuli makali ke babaandu kamulondelela, naye wabawonesela ibweene iyo.

³Bafarisaayo beetsa is'ali khuumukhakilisa. Baamureeba bari, “Shifukiilisibwa mu makaambila keefwe umuundu khuuwoona umukhasi weewe nga amufunisa buli lomo yoosi?”

⁴Yesu wabeelamo ari, “Simwasomatsakakho bibyaronebwa bikhosefu bibiloma biri, ‘Iburakikhilo, umubuumbi aabuumba boombi umusaani n'umukhasi?’

⁵Nio ndi waaloma ari, ‘Lwe lomo yino, umusaani alilekha paapawe ni maayiwe, etubaase n'umukhasi weewe, ni nabo boombi bekyele kumubili mutweela?’

⁶Ni nashiryo, sibaba bashiili babili ta, ne baba bekyelile kumubili mutweela. Aso, sheesi Wele aba watubaasile atweela, umuundu yeesi akhawukhanisa ta.”

⁷Bafarisaayo baamureeba bari, “Ne lwashiina Musa aalakila ari, umusaani awe umukhasi weewe buurone bwe khumuwoona nio amuwoone?”

⁸Yesu wabeelamo ari, “Musa aabafukiilisa khuuwoona bakhasi beenywe lwekhuuba kimyoyo kyeenywe sikileekikhila ta. Ne khukhwaama makiboole sishaba shiryo ta.

⁹Ne imbaboolela ndi, buli umuundu yeesi uwoona umukhasi weewe, khurusakho khulwe buyeyani, ne wakhwa ukuundi, aba wayeyanile.”

¹⁰Kila baleekelwa beewe bamuloma bari, “Noola bili biryo by'omuseetsa n'umukhasi, shiba shilayi khulekha khukhwa ta.”

¹¹Yesu wabeelamo ari, “Sibali boosi babanyala khufukiilisa bilomo bino ta, khurusakho isi ibo bababiweebwa.

¹²Lwekhuuba iliwo tsilomo tsikhali ndweela tsitsireesa basaani balekha khukhwa ta. Baliwo babaandu babaakhakhwa ta, lwekhuuba basaalikha baryo; baliwo babaandi babaakhakhwa ta, lwekhuuba bayomolebwa ni babaandu, baliwo babaandi babaakhakana khuukhwa ta lwe Buyiinga bwe mwikulu. Uyo unyala khukhola shino, n'afukiilile khuleekelwa khuno.”

¹³Shifukhu shitweela, babaandu baareera babaana bafwiiti isi Yesu bari abarekho kamakhono keewe, luundi abaloombele. Ne baleekelwa beewe baarafuyila abo babaabareera.

¹⁴Ne Yesu waaloma ari, “Ni mubalekhe babaana bafwiiti beetse isi indi, mukhabashinjilila ta, lwekhuuba Buyiinga bwe mwikulu buli bwe babafwaana nga bano.”

¹⁵Aryo lwanyuma nga wabareerekho kamakhono keewe, waarurayo, waatsya.

¹⁶Lwanyuma abonekhawo umusaani umuyiindifu uweetsa isi Yesu, waamureeba ari, “Umuleekeli, ikhole bilayi shiina, nio ifune buulamu bubuukhawawo ta?”

¹⁷Yesu wamwiilamo ari, “Lwashiina undeeba ise khwiibyo bibiwaamba khu bilayi? Aliwo mutweela yenyene niye uli Umulayi. Ne noola ukana khukhwinjila mu bulamu, wulilatsaka kamakaambila.”

¹⁸Umusaani tsana waamureeba ari, “Niko kali?” Yesu waamwiilamo ari, “Ukheera ta, ukhayeyana ta, ukheeba ta, ukhaapa umuundu washoowo liyino ta.

¹⁹Yiisatsakamo paapawo ni maayiwo lukoosi, luundi ukanatsake umwesanwa woowo, nga iwe ni wikana wamweene.”

²⁰Umusaani tsana yuno waamwiilamo ari, “Ibyo byoosi naabiwaambatsaka, ne shiina shishiindi shishindaambakho?”

²¹Yesu naye waamwiilamo ari, “Noola ukana khuuba umukwalaafu, tsya, ukulise ibyo byoosi byeesi uli nabyo, ukabile bataambi bibyaamamo, ulwo kane ube ni buyiindifu mwikulu. Lwanyuma wiitse unondelele.”

²²Ne umusaani yuno n'awulila shino, waatsya nga mukhalafu naabi, lwekhuuba aba ni buyiindifu bukali naabi.

²³Lwanyuma Yesu waalomela baleekelwa beewe ari, “Ilala imbaboolela ndi shiliiba shihangafu naabi umuundu umuyindifu khukhwinjila mu Buyiinga bwe mwikulu.

²⁴Luundi imbaboolela ndi, shili shangukho iŋamya khuubirira mu mwanya kwe mpiso, khufuurisa umuundu umuyindifu khukhwinjila mu Buyiinga bwa Wele.”

²⁵Ne baleekelwa ni baawulila shino, beyaanga busa nga bareeba bari, “Ari naanu unyala khuwonesebwa?”

²⁶Yesu wabalolelela, waabaloma ari, “Isi babaandu shino sishinyalikhana ta, ne isi Wele bibiindu byoosi binyalikhana.”

²⁷Lwanyuma Petero wamwiilamo ari, “Bona ifwe khwalekha byoosi, khwakhulondelela iwe, ne khulifuna shiina?”

²⁸Yesu waabaloma ari, “Ilala imbaboolela ndi, mu muboolo kumushaakha nga Umwaana w'Omuundu wekhaale khu shitsoloŋo she shiriifwa, ni nanywe mumuliba nga munondelela, mulikhala khu bitsoloŋo liikhumi na bibili, nga mukhalila bikuuka liikhumi na bibili bye ba Isiraeli kumusaango.

²⁹Na buli muundu yeesi uwalekha tsinusu, namwe babandaaye, namwe bakooko, namwe paapawe, namwe maayiwe, namwe babaana, namwe kimikuunda khu lwase, alifuna kimiluundi shitoondo khufuurisakho, luundi asikhile buulamu bubuukhawawo ta.

³⁰Ne bakali babaali baakiboole ari, baliiba bamalilisi, ni bamalilisi ari, baliiba baakiboole.”