Read lumasaaba Matayo 2 Bible Online

Matayo 2 - lumasaaba bible

Matayo 2

¹Nga Yesu wasaalikhile mu Beselehemu shiriimba she mu Yuda, mu bifukhu bya Herode umuyiinga, aabawo basaani be kamakhula mu bye tsinieniesi babaama i Bwamanyaanga, babiitsa i Yerusalemu.

²Beetsa nga bareeba bari, “Umwaana usaalikhile khuuba umuyiinga we Bayudaaya, ali waheena? Khwaboone inieniesi yeewe i Bwamanyaanga kila khwiitsile khuumwisaaya.”

³Ne umuyiinga Herode n'awulila shino, weyembelela naabi, niye atweela ni be mu Yerusalemu boosi.

⁴Aryo wabuusanisa basaayi bakhulu be babaandu boosi atweela, ni baleekeli be kamakaambila ka Musa, waabareeba ari, “Kristo alisaalibwa waheena?”

⁵Nabo baamwiilamo bari, “Mu Beselehemu shiriimba she mu Yuda, lwekhuuba shiryo nga ni sharonebwa n'umuŋoosi shiri:

⁶‘Ni nawe Beselehemu, shishaalo sha Yuda, s'ulikho mukyeekhe nakhari ta mu bawuli ba Yuda, lwekhuuba umuwuli ulyaayisa babaandu baase ba Isiraeli alyaama mwiiwe.’”

⁷Lwanyuma Herode walaanga basaani tsana be kamakhula mu bye tsinieniesi mu shimoonyo busa, wabareebelesa nga akana amanye imbuka shiina esi inieniesi yababonekhelamo.

⁸Aryo waabarumana i Beselehemu, nga abaloma ari, “Ni mutsye mureebelese nga muwentelesa bulayi esi umwaana ali. Ne nga mwaamunyoolile, nase mwiitse muamanyise, nio manya nase naatsya khumwisaaya.”

⁹Baryo ni baamala khuuwulilisa byeesi umuyiinga aloma, beloosela mu ntsila yaabwe. Ne bona ndi inieniesi tsana yeesi baabonela i Bwamanyaanga, yaabaraangilila luundi khukhwoolesa ni yeetsa yeemikha angaaki e shiifwo mweesi umwaana aba.

¹⁰Ne ni baabona inieniesi, betsusibwa ni kumwikhoyo.

¹¹Baryo nga benjiile mu ntsu, baabona umwaana ni Malyamu maayi weewe, baakwa aasi, besaaya umwaana. Lwanyuma baakangulula tsisutilo tsaabwe, baamuwa biwaanwa bye zaabu, ni bubaane, ni bye khukhwiyakha bibiwunya bulayi.

¹²Nga bakana khwiilayo, Wele waabareewulila mu marooro ari balekhe khukhwiilayo isi Herode ta, baryo beelayo iwaabwe mu ntsila ikiindi.

¹³Lwanyuma nga batsiile, malayika w'Omukasya waabonekhela Yusufu mu marooro, nga amuloma ari, “Yinyukha, uyile umwaana ni maayi weewe, mwilukhile i Misiri, mumenyeyo khukhwoolesa ise n'indikhuboolela. Lwekhuuba Herode ali aambi atsya khuweentsa umwaana khuumwiira.”

¹⁴Aryo Yusufu wenyukha, waayila umwaana ni maayi weewe mu shilo baatsya i Misiri.

¹⁵Ibweene iyo niyo isi aaba khukhwoolesa Herode n'afwa. Shino shakholekha khukhwoolelesa sheesi Umukasya aalomela mu muŋoosi ari, “Nalaanga umwaana wase khukhwaama mu Misiri.”

¹⁶Aryo Herode n'abona ari basaani be kamakhula mu bye tsinieniesi baamukhaliile kamakyesi, waarafuwa naabi. Waalakila khukhwiira babaana besiinde boosi mu Beselehemu, ni biifwo bibyesaanewo, baboolesa kimiiko kibili ni khukhwiila aasi, nga emikha khu mbuka yeesi basaani be kamakhula tsana baamuboolelamo.

¹⁷Musaambo iyo, sheesi umuŋoosi Yeremiya aarona shoolelela shishiloma shiri,

¹⁸“Likono lyawulilikha mu Rama. Khukhwiilootsa ni khusola khukali, Lakeri nga alilila babaana beewe, wekaana khukhwikhoyesebwa khwoosi, lwekhuuba boosi bahela.”

¹⁹Lwanyuma lwa Herode khuufwa, bona, malayika w'Omukasya waabonekhela Yusufu i Misiri,

²⁰nga amuloma ari, “Yinyukha uyile umwaana ni maayi weewe, mukoboleyo mu shiibala sha Isiraeli, lwekhuuba abo babaaba bakhakakho khuuweentsa buulamu bw'omwaana baafwa khaale.”

²¹Aryo Yusufu wenyukha, waayila umwaana ni maayi weewe, baatsya mu shiibala sha Isiraeli.

²²Ne Yusufu n'awulila ari Arukelawo waayila mu bikyele bya paapawe Herode nga niye uwula Yuda bwoosi, waarya khukhwiilayo. Wele waamureewulila mu marooro, aryo waarurayo waatsya mu shaalo she Galilaaya.

²³Waatsya waamenya mu shiriimba shilaangibwa Nazareesi. Shiryo, shilomo shishalomebwa ni baŋoosi shinyale khukhwoolelela shiri, “Alilaangibwa umu Nazareesi.”