Read lumasaaba Matayo 21 Bible Online

Matayo 21 - lumasaaba bible

Matayo 21

¹Ne ni baaba nga bali aambi khukhwoola i Yerusalemu, beetsa i Betifage, khu lukiingi lwe Kimizeyituni. Yesu warumana babili khu baleekelwa beewe,

²nga abaloma ari, Ni mutsye mu shaalo shishibali ibweeni, khaangu akho kane munyoole isikilya nga baakibowele ni nyana yayo. Mutsabule, mutsinderere.

³Ne umuundu yeesi n'abalomayo ilomo yoosi, mumuloma muri, “Umukasya niye utsikana, ni naye kane atsakaanise khaangu akho.”

⁴Shino shakholekha khukhwoolelesa shishakanikhibwa khuubirira mu muŋoosi shiri,

⁵“Boolela shiriimba sha Sayuuni muri, ‘Bona umuyiinga woowo etsa is'uli, umuwolu luundi nga etsila khu sikilya ni khu nyana ye sikilya.’ ”

⁶Baleekelwa baatsya, baanyoola nga Yesu n'abalomela.

⁷Baryo baareera isikilya, ni nyana yayo, baatsibiimbakho tsingubo tsaabwe, naye Yesu wekhalakho.

⁸Lituuli lye babaandu bakali baala tsingubo khu ntsila, ne babaandi barema tsisakya khu bisaala, baala khu ntsila.[17]

⁹Lituuli lye babaandu babaaba baraangiile, ni naabo babaaba baamuloondelekho, baayokesela angaaki bari: “Hosana[18] isi Umwitsukhulu wa Dawudi, ali ni khabi uyo uwitsila mu lisiina ly'Omukasya. Hosana, angaaki lukali.”

¹⁰Aryo Yesu ni enjila mu Yerusalemu, shiriimba shoosi shayeŋanisibwa, nga baloma bari, “Naanu uyu?”

¹¹Kamatuuli ke babaandu belamo bari, “Oyu niye Umuŋoosi Yesu, uwama mu Nazareesi mu Galilaaya.”

¹²Yesu wenjila mu Lisaayilo Likhulu lya Wele, waatimisa waarusa ibulafu ibo boosi babaaba bakulaanilamo. Waafumalikhaka tsimeetsa tsaabo babaaba bakulaanisa tsinusu, ni bitsoloŋo byaabo babaakulisa kamawuusi.

¹³Yesu waabaloma ari, “Sharonebwa mu byaronebwa bikhosefu shiri, ‘Intsu yase kane ilaangibwatsake intsu iye khuloomba, ne inywe mwakikalusile khuuba lifuluma lye banuuli.’ ”

¹⁴Lwanyuma, baabofu ni baaleme beetsa is'ali mu Lisaayilo Likhulu, waabawonesa boosi.

¹⁵Ne basaayi bakhulu ni baleekeli be kamakaambila ka Musa bakhalala naabi ni babona bibiindu bye kamakaanga byeesi Yesu akhola, ni babaana nga bayokesela angaaki mu Lisaayilo Likhulu bari, “Hosana isi Umwitsukhulu wa Dawudi.”

¹⁶Kila bareeba Yesu bari, “Uwulila byeesi babaana bano baloma?” Yesu wabeelamo ari, “E e, nawuliile. Ne simwasomatsakakho muri, ‘khukhwaama mu khanwa khe babaana ni baŋaalye, wayiŋoonaŋoonela lubuyi?’ ”

¹⁷Aryo Yesu waabalekha, waarura mu shiriimba, waatsya i Besaniya esi akonela shiilo isho.

¹⁸Kumutikhinyi mu mamilimili, Yesu aaba elayo mu shiriimba, intsala abe ilikho imulya.

¹⁹Aryo nga waaboone kusaala ku Figi khu ndulo khwe ntsila, watsyakho, ne waalekha khunyoolakho shishiindu shoosi ta, akhali kamasaafu konyene. Kila Yesu waaloma kusaala ari, “Kusaalawe, s'ukane waanatsakekho bibyaano luundi ta.” Ni abweene awo, kusaala kwaaniaalilawo.

²⁰Ne baleekelwa ni baabona shino beyaanga naabi nga baloma bari, “Kusaala ku figi kuno kunialile kuryeena khaangu akho?”

²¹Yesu wabeelamo ari, “Ilala ise imbaboolela inywe ndi, ni muba ni khufukiilila, mwalekha khwikanakana ta, munyala khukhola isho shishikholewele khu kusaala ku figi kuno kwe bibyaano, ni khulooselakho, munyala khuloma lukiingi luno muri, ‘Wamweene sutikha busa utsye, wituume mu nyaantsa,’ ni nasho shilikholebwa.

²²Ni muba ni khuufukiilila, muliweebwa shoosi shoosi sheesi mukana mu khuloomba khweenywe.”

²³Yesu wenjila mu Lisaayilo Likhulu, ne n'aba nga aleekela, basaayi bakhulu ni basakhulu be babaandu beetsa is'ali, bamureeba bari, “Uli na bunyala shiina bubukhukholisa bibiindu bino? Naanu uwakhuwa bunyala buno?”

²⁴Yesu wabeelamo ari, “Nase kane imbareebe shireebo shitweela. Ne nga mwantsililemo, nase kane imbaboolele bunyala nga ni buli bubungolesa ise bibiindu bino.

²⁵Khubatisibwa khwa Yokana Umubatisa khwaama eena? Khwaama mwikulu namwe khwaama mu baandu?” Baareebana bonyene na bonyene nga baloma bari, “Ni kane khulome khuri, khwaama mwikulu, kane akhureebe ari, ‘Ne shiina kila mukhaamufukiilila?’

²⁶Ne ni kane khulome khuri, khwaama mu baandu, khurya lituuli lye babaandu, lwekhuuba boosi baamanya bari, Yokana Umubatisa aaba umuŋoosi.”

²⁷Ni nashiryo beelamo Yesu bari, “Sikhumanya ta.” Yesu naye wabeelamo ari, “Ni nase singene imbaboolele bunyala ni buli bubuungolesa bibiindu bino ta.”

²⁸“Inywe mwaambaasa murye? Aabawo umusaani mutweela, uwaba ni babaana beewe basooleli babili. Waatsya isi unyoowa waamuloma ari, ‘Mwaana wase, tsya uraambe mu mukuunda kwe kimisabibu shaleelo.’

²⁹Umwaana yuno welamo ari, ‘Shinatsya ta.’ Ne lwanyuma webiiyisa mu mwoyo kweewe, waatsya.

³⁰Lwanyuma umusaali tsana waatsya isi uwe khabili, waamulomela aryo, nga n'alomela uwanyoowa. Umusooleli yuno welamo ari, ‘E e paapa.’ Ne walekha khuutsya khuraamba ta.”

³¹Kila Yesu abareeba ari, “Khu babili bano, naanu uwakhola sheesi paapa waabwe akana?” Nabo belamo bari, “Uwanyoowa.” Yesu waabaloma ari, “Ilala imbaboolela ndi, babuusanisi be kumusolo, ni bamalaaya balikho babanyoowa inywe khukhwinjila mu Buyiinga bwa Wele.

³²Lwekhuuba Yokana Umubatisa etsa isi muli khubokesa intsila ye bukwalaafu, ne inywe mwalekha khumufukiilila ta, ne babuusanisi be kumusolo ni bamalaaya bamufukiilila. Ne akhaba nga mwabona muryo, simwakyelawo mwebiiyisa, mwamufukiilila ta.”

³³Yesu waababoolela lusimo luluundi ari: “Aabawo umusaani mweene mukuunda, uwabyaalamo kumusabibu kweewe. Waakusirira lumako khuukubotokhelela, wayabilamo lirokelo lye viini, wombekhamo kumunaala. Lwanyuma wapaangisisa kumukuunda tsana isi baalimi, aryo waamawo, waatsya mu shiibala she aleeyi.

³⁴Imbuka ye likyesa ni yoola, waarumana babakaanisi beewe isi baalimi, ari bamuwekho bibyaano byamwo.

³⁵“Ne baalimi bawaamba babakaanisi beewe, mutweela baamukhupaka, ukuundi baamwiira, n'uwe khataru baamukhupa kamabaale.

³⁶Luundi ndi waarumanayo babakaanisi babaandi, babafuurakho babaanyoowa. Ne nabo baabakhola baryo nga babaanyoowa.

³⁷Lwanyuma waabarumanila umwaana weewe umweene, nga aloma ari, ‘Manya lukanile kane besemo umwaana wase shiriifwa.’

³⁸“Ne balimi ni baabona umwaana w'omweene mukuunda, bekuta bonyene bari, ‘Mbo oyu niye umusikha, yiitsa khumwiire, khuyile busikha bweewe.’

³⁹Baryo baamuwaamba, baamutuuma ibulafu we kumukuunda, baamwiira.”

⁴⁰Ulwo Yesu waabareeba ari, “Nga umweene mukuunda weetsile, baalimi abo alibakhola aryeena?”

⁴¹Nabo baamwiilamo bari, “Babaandu baabi abo, alibahesa, ni kumukuunda akupaangise isi balimi babaandi, babaalimuwa bibyaano byeewe mu mbuka inyene iye likyesa.”

⁴²Aryo kila Yesu abaloma ari: “Mwaakhusomatsakakho bibyaronebwa bikhosefu bibiloma biri, ‘Libaale lyeesi babombekhi bekaana, lyashuukha lyekyela khuuba kumurwe kwe musoonda. Umukasya umweene niye uwakhola shino, luundi shiyaangisa mu moni tseefwe.’

⁴³“Nashiryo, imbaboolela ndi, Buyiinga bwa Wele bulibarusibwakho inywe buweebwe linaambo lilinyala lyaana bibyaano bilayi.

⁴⁴Umuundu yeesi ukwa khu libaale lino alifuniakikhaka busa, ne uyo esi lilikwakho, lilimubulyungulaka busa.”

⁴⁵Baryo basaayi bakhulu ni Bafarisaayo nga baawuliile tsisimo tsa Yesu tsino, baamanya bari aaba ali khuubaloma khu nibo.

⁴⁶Baryo baakhakakho naabi khuuweentsa imbuka bamuwaambe, ne baarya kamatuuli lwekhuuba babaandu bamwaambaasa khuuba umuŋoosi.