Read lumasaaba Matayo 22 Bible Online

Matayo 22 - lumasaaba bible

Matayo 22

¹Yesu waakanikha luundi ni nabo musimo, waabaloma ari,

²“Buyiinga bwe mwikulu bufwaananisibwa n'umuyiinga uwaŋoonaŋoona kamayiiya ke bukhwaale bw'omwaana weewe umusiinde.

³Lwanyuma waarumana babakaanisi beewe khuutsya khulaanga ibo babalaangiwa khu mayiiya ke bukhwaale, ne nibo baleakha khukana khukhwiitsa ta.

⁴Luundi ndi waarumana babakaanisi babaandi nga aloma ari, ‘Ni mutsye muboolele abo babalaangiwa muri, ise naŋoonaŋoonele kamayiiya kaase, tsikhaafu tse kiminaawa tseriiwile. Bibiindu byoosi byaŋoonaŋoonewele. Ari ni mwiitse khu mayiiya ke bukhwaale.’

⁵Ne nibo balekha khukhwinaanayo ta, baryo betsiilakila mu ntsila tsaabwe tsitsiindi: mutweela waatsya mu mukuunda kweewe, ukuundi waatsya mu bye bukusi bweewe.

⁶Ne babaaramile bawaambaka babakaanisi abo baababirisaka buubi, babeeraka.

⁷Umuyiinga yuno lirima lyamuwaamba, warumana liiye lyeewe, wahesaka babeeri ibo, woosha ni shiriimba shaawe.

⁸“Lwanyuma waloma babakaanisi beewe ari, ‘Kamayiiya ke bukhwaale kamaŋoonaŋoone, ne ibo babalaangiwa sibaakhila ta.

⁹Nashiryo, ni mutsye mu mikhoosi esi kyakananila, mulaange boosi beesi kane muboneyo, beetse khu mayiiya.’

¹⁰Baryo babakaanisi baatsya mu mikhoosi, baabuusanisa boosi beesi baanyalisa khuunyoolayo, baabi atweela ni baalayi, litiilo lye kamayiiya lyetsulamo bakyeni.

¹¹“Ne umuyiinga ni enjila khuubona bakyeni, waabonamo umusaani uwaba waakhukwaara ingubo iyaakhila kamayiiya ke bukhwaale ta.

¹²Kila amureeba ari, ‘Mulebe, winjiile uryeena ano nga s'uli ni shikwaaro shishaakhila kamayiiya ta?’ Ne umusaani waasila busa.

¹³Lwanyuma umuyiinga waaloma babakaanisi beewe ari, ‘Ni mumubowe kamakhono ni bikyele, mumutuume ibulafu mu shilima. Ibweene iyo iliiba khukhwaantsuwa ni khukhwilumaka kameeno.’

¹⁴Lwekhuuba babalaangibwa bakali, ne baarobolemo bakyeekhe.”

¹⁵Lwanyumakho, Bafarisaayo baatsya bekutila atweela isaambo yeesi kane bawaambilise Yesu mu bilomo.

¹⁶Baryo kila bamurumanila baleekelwa baabwe atweela ni baloondeleli ba Herode, nga baloma bari, “Umuleekeli, ifwe khwamanya nga iwe uli umuundu uwa ŋali, luundi uleekela intsila ya Wele nga wimikha mu muŋali ilala, luundi s'unikinisibwa ni babaandu ta, lwekhuuba siwinaanayo khu mbonekha ye babaandu ta.

¹⁷Aso khuboolele, iwe waambaasa urye? Shilayi khuuwa kumusolo isi Kayisaali namwe ta?”

¹⁸Ne Yesu waba nga waamanyile buubi bwaabwe, waabaloma ari, “Inywe babeeyi, lwashiina muweentsa khukhukhakilisa ise?

¹⁹Ni muntsokese lipeesa lyeesi muweelamo kumusolo.” Baryo bamureerera idinari.

²⁰Kila ndi wabareeba ari, “Shifwaani shino, ni buronekho buno, bya naanu?”

²¹Nabo bamwiilamo bari, “Bya Kayisaali.” Yesu naye wabeelamo ari, “Aso, bya Kayisaali, ni mubiwe Kayisaali, ni isi Wele naye mumuwe bye bwa Wele bweewe.”

²²Baryo boosi ni bawulila shino belaliila busa. Lwanyuma bamulekha, baatsya.

²³Khu shifukhu sheene isho, Basadukaayo, nga nibo babaloma bari mbaawo khulamukha mu bafu ta, beetsa isi Yesu. Nabo beetsa khumureeba shireebo.

²⁴Bamureeba bari, “Umuleekeli, ifwe Musa akhulomela ari, ‘Noola umusaani wafwiile busa nga akhusaala babaana ta, wandaaye aakha khukhwiila khu namulekhwa, amusaalile babaana.’

²⁵Ari iweefwe iyo, yabayo be buulebe musaafu. Umukiboole wakhwa umukhasi, ne wafwa nga akhusaala lisaaye ta, walekhela wandaaye weewe umukhasi.

²⁶Shishiindu sheene nisho shitweela shakholekha khuwe khabili, n'uwe khataru, khukhwoola khuwe kumusaafu.

²⁷Lwanyuma lwa boosi khuufwa, umukhasi naye wafwa.

²⁸Aso, nga yoolele ikhulamukha khwe baafu, umukhasi yuno aliiba mweene wa naanu, khu be buulebe bano musaafu? Lwekhuuba boosi baaba ni naye nga umukhasi waabwe.”

²⁹Yesu wabeelamo ari, “Inywe muborokha lwekhuuba simumanya bibyaronebwa bikhosefu namwe kamaani ka Wele ta.

³⁰Lwekhuuba babaandu ni baba nga balamukha khukhwaama mu bafu, sibayila bakhasi, namwe sibakhwalikhisibwa ta, ne boosi baliiba nga bamalayika mwikulu.

³¹Ne ibyo bibiwaamba khu khulamukha khukhwaama mu bafu, simwasomatsakakho byeesi Wele abalomela ari,

³²‘Ise ndi Wele wa Iburayimu, Wele wa Isaaka, luundi Wele wa Yakobo?’ Niye s'ali Wele we baafu ta, ne ali Wele we balamu.”

³³Lituuli lye babaandu ni bawulila baryo, beyaanga busa khuleekela khweewe.

³⁴Nabo Bafarisaayo ni bawulila bari Yesu wabunisile Basadukaayo, babuusana atweela.

³⁵Mutweela khu nibo uwaba umuleekeli we kamakaambila ka Musa, waakhaka Yesu nga amureeba shireebo, nga aloma ari:

³⁶“Umuleekeli, likaambila shiina lilifuura bukhulu mu makaambila koosi?”

³⁷Yesu waamwiilamo ari, “Kanatsaka Umukasya Wele woowo, ni kumwoyo kwoowo kwoosi, ni bulamu bwoowo bwoosi, ni kamakyesi koowo koosi.

³⁸Lino nilyo likaambila linyoowa lilifuura bukhulu.

³⁹Ni lye khabili lilifwaananakho ni nalyo nilyo lino: kanatsaka umwesanwa woowo, nga iwe ni wikana wamweene.

⁴⁰Mu makaambila kano koombi, nimwo mweesi kamakaambila koosi, ni khuleekela khwe baŋoosi bimile.”

⁴¹Bafarisaayo ni baaba nga baabusaane atweela, Yesu wabareeba shireebo ari,

⁴²“Kristo, inywe mumwaambaasakho murye? Niye Umwaana wa naanu?” Nabo bamwiilamo bari, “Niye Umwitsukhulu wa Dawudi.”

⁴³Naye Yesu waabaloma luundi ari, “Ne lwashiina Dawudi, nga Umwoyo Umukhosefu amuraangilila, amulaanga ari, ‘Umukasya?’ Lwekhuuba niye amulomakho ari,

⁴⁴‘Umukasya aaloma Umukasya wase ari: Yikhala ano khu mukhono kwase kumulayi, khukhwoolesa ise n'ikhaare basiku boowo asi we bikyele byoowo.’

⁴⁵“Aso, noola Dawudi amulaanga khuuba ‘Umukasya,’ anyala aryeena ndi khuuba umwitsukhulu weewe?”

⁴⁶Ne mbaawo na mutweela yeesi uwanyala khumwiilamo ta, ni khukhwaama khu shifukhu isho, mbaawo n'umuundu na mutweela uwamutsaalatsaalila khumureebaka bireebo luundi ta.