Read lumasaaba Matayo 24 Bible Online

Matayo 24 - lumasaaba bible

Matayo 24

¹Yesu waarura mu Lisaayilo Likhulu, ne n'aba nga akyeenda atsya, baleekelwa beewe beetsa is'ali khumwokyesa bibyombakhe bye Lisaayilo Likhulu.

²Yesu waabaloma ari, “Mwaboone bibiindu bino byoosi? Ilala imbaboolela ndi, mbaawo libaale na litweela lilirama nga lyemile khu lyashe ta! Buli litweela lilituumiwa aasi.”

³Yesu n'aba nga wekhaale khu lukiingi lwa Zeyituni, baleekelwa beewe beetsa is'ali mu shimoonyo bamuloma bari, “Umukasya, khuboolele, bibiindu bino byoosi bilibawo liina, naluundi khabonelo khe kamakaanga shiina khakhalibawo khukhwokesa khukhwiitsa khwoowo, ni intsakamo iye shiibala?”

⁴Yesu wabeelamo ari, “Ni mwiliinde ilekhe khubawo umuundu namutweela ubaborosa ta.

⁵Lwekhuuba bakali baliitsa mu lisiina lyase, nga baloma bari, ‘Ise niye Kristo,’ baryo baliborosa bakali.

⁶Muliwulila busoolo ni tsimboolela tse busoolo, ne ni mubone muri simuyembelesebwa ta. Bino byaakha khubawo, ne intsakamo iba nga ishiili.

⁷Linaambo lilisoolanisa linaambo lyashe, buyiinga bulisoolanisa buyiinga, iliibawo intsala ngali, ni khutengasibwa khwe shiibala khulibawo mu bisiintsa bikali.

⁸Bino nibyo bibirakikha butsiina bwe khusaala.

⁹“Lwanyuma balibawaanayo inywe, mutaambisibwe, luundi mwiriibwe, ni kamanaambo koosi kalibabiyila khubafunisa lisiina lyase.

¹⁰Khu mbuka nyene iyo, bakali balikhasikha mu khufukiilila khwawe, balyemo bashaawe luwomelo, luundi babiyanile bonyene na bonyene.

¹¹Ulwo, baŋoosi be bubeeyi bakali baliitsa, baborose babaandu bakali.

¹²Ne lwekhuuba khukhola bye bubwoonaki bililoosela naabi, khuukana khwe bakali khuliwamo kamaani.

¹³Ne uyo ulihandalala khukhwoolesa ibumaliliso, aliwonesebwa.

¹⁴Ni kamakhuuwa kamalayi kano ke Buyiinga bwe mwikulu, kaliboolelwa mu shiibala shoosi, khuuba bujulisi mu manaambo koosi, lwanyuma intsakamo ikhoole.

¹⁵“Ne ni mulibona she mbikho shishireera khuhela nga shemile mu shiifwo shikhosefu sheesi Danieli umuŋoosi alomakho. (Uyo usoma aakha amanye.)

¹⁶Ulwo ibo babaali mu Yuda belukhile mu njiinji.

¹⁷Uyo uba ali khu ngaaki khu shisuli she ntsu[19] yeewe, akheekha aasi khuutsya khubukula shishiindu shoosi mu ntsu ta.

¹⁸Ni nooyo uli mu mukuunda akhelayo ingo khuutsya khubukula ingubo yeewe ta.

¹⁹Nga bikhaabe bifukhu bye kumutaambo isi bakhasi babaali bisoombo, ni naabo babanuunisa.

²⁰Ni muloombe muri khukhwilukha khweenywe khulekhe khuba mu bifukhu bye bunyifu namwe khu Sabato ta.

²¹Lwekhuuba mu mbuka iyo, ilibawo kumutaambo kumukali kukukhabatsakawo khukhwaama khu khurakikha khwe shiibala khukhwoolesa ari, naluundi sishilibatsakawo shishifwaanakho shiryo ta.

²²Iba nga bifukhu ibyo bibikhembiiyisibwakho ta, khali mbaawo n'umuundu na mutweela abe unyala khuwonesebwa ta, ne lwe bulayi bwe barobole ba Wele, bifukhu ibyo bilimbiiyisibwa.

²³“Mu mbuka iyo, umuundu yeesi nakhuloma ari, ‘Bona, Kristo ali ano,’ namwe ari, ‘Uyo,’ mukhamufukiilila ta.

²⁴Lwekhuuba ba kristo be bubeeyi bakali ni baŋoosi be bubeeyi baliitsa bakhole bubonelo bukali ni bye kamakaanga, lwe khuukana khuborosa bakali. Noola shinyalikha, ni barobole beene.

²⁵Bona, ise nabibabooleele nga imbuka iyo ishiili khwoola ta.

²⁶“Namwe noola babaloma bari, ‘Bona, ali mu mubiimbi,’ mukhatsyayo ta. Namwe bari, ‘Bona, ali ano mu biseenge bye mukari,’ mukhabifukiilila ta.

²⁷Lwekhuuba nga khumulikha ni khwaama ibwaamanyaanga, khwaabonekhela i bukwanyaanga, ni khukhwiitsa khw'Omwaana w'Omuundu nakhwo khuliiba khuryo.

²⁸Awo aba kumulaambo osi, niwo esi tsingosya tsibuusanila.

²⁹“Khaangukho lwanyuma lwe shitaambiso mu bifukhu ibyo, inyaanga ilimaliyisibwa, kumweesi sikulirusa buwaanga bwakwo ta, tsinieniesi tsiliikwa khukhwaama mu ngaaki, ni kamaani ke mwikulu kalitengasibwa.

³⁰Lwanyuma lwayo, khabonelo kh'Omwaana w'Omuundu khalibonekha mu ngaaki, ni kamanaambo koosi ke mu shiibala kalilila. Balibona Umwaana w'Omuundu nga etsila mu namufweeli we mwikulu, ni kamaani ni shiriifwa shikali.

³¹Nio arumane bamalayika beewe, n'ikhoombi imboofu nga ifuura, ni nabo balibuusanisa babaandu beewe barobole, khukhwaama khu mbeka tsoone, khukhwaama khu ndulo khwe likulu khutweela khukhwoola khu khuundi.

³²“Aluno ari, ni mwiyikile khu kusaala ku Figi. Tsisakya tsakwo ni tsitsowa, kamaru kasisina, inywe mumanya muri kumunaane kuli aambi.

³³Nanywe muryo, ni mubona bibiindu bino byoosi, mumanye muri, imbuka ili aambi, nga ili khu mulyaango khubweene.

³⁴Ilala imbaboolela ndi, kumuboolo kuno sikuliwawo ta, khukhwoolesa nga bibiindu bino byoosi byabelewo.

³⁵Likulu ni shiibala biliwawo, ne bilomo byase sibiliwawo ta.

³⁶“Ne bye shifukhu isho ni saawa, mbaawo ubimanya ta, ikhaba bamalayika be mwikulu namwe Umwaana ta, khurusakho Paapa yenyene.

³⁷Nga ni shaba mu bifukhu bya Nowa, shiryo nga ni shiliiba mu khwiitsa khw'Omwaana w'Omuundu.

³⁸Lwekhuuba mu bifukhu ibyo, nga kameetsi kashiili khusalasala ta, babaandu baaba balya, nga banywa, nga bakhwalikha luundi nga bakhwalikhisa, khukhwoolesa khu shifukhu khweesi Nowa enjilila mwikhoŋolo.

³⁹Nibo sibamanya shishiindu shoosi shishiitsya mu moni ta, khukhwoolesa kameetsi ni kasalasala, kabasuta boosi kabayila. Ni khukhwiitsa khw'Omwaana w'Omuundu khuliiba khuryo.

⁴⁰Basaani babili baliiba mu mukuunda, mutweela aliyilibwa, ukuundi alilekhebwa.

⁴¹Ni bakhasi babili baliiba nga basya khu lusisi, mutweela aliyilibwa, ne ukuundi alilekhebwa.

⁴²Ni nashiryo, ni mube meeso, lwekhuuba simumanya shifukhu shiina khweesi Umukasya weenywe aliitsilakho ta.

⁴³Ne ni mumanye shino muri, iba nga umweene intsu amanya isaawa shiina iye shiilo yeesi umwiifwi kane etsilemo, khali ekhala meeso, ilekha khubawo umuundu yeesi ukifuniaaka wenjilamo ta.

⁴⁴Ni nanywe muryo, mwakha khuuba berekefu, lwekhuuba Umwaana w'Omuundu aliitsila mu saawa isi mukhamwaambaasilamo ta.

⁴⁵“Naanu umwakaanisi umwiyikinwa luundi umukyesi yeesi umukoosi weewe alekhela baraambi be mu ntsu yeewe khubalolelela, khubawa biilyo mu saawa inyene?

⁴⁶Nga kane abe ni khabi umwakaanisi uyo isi umukoosi weewe alinyoola nga akhola aryo, n'aliba nga wakoboole.

⁴⁷Ilala imbaboolela ndi, umukoosi uyo alimukhola khuuba umuloleleli we bibiindu byeesi ali nabyo byoosi.

⁴⁸Ne umwakaanisi uyo n'aba umubi, uwilomela mu mwoyo kweewe ari, ‘Umukoosi wase wekhaaleyo,’

⁴⁹aryo warakikha khukhupa babakaanisi basheewe, ni khuunywa ni khumeelela atweela ni bameesi.

⁵⁰Umukoosi w'omwakaanisi uyo alikobolela khu shifukhu khweesi akhamwaambasilisilakho ta, ni khu saawa yeesi akhamanyile ta.

⁵¹Alimukhalakamo bisiintsasiintsa, aweebwe kumukabo kweewe atweela ni babaandu babemunyakasa khu ngaaki busa. Iyo iliiba khulila ni khukhwilumaka kameeno.