Read lumasaaba Matayo 25 Bible Online

Matayo 25 - lumasaaba bible

Matayo 25

¹“Khu shifukhu isho, Buyiinga bwe mwikulu bulifwaananisibwa ni bakhaana liikhumi babaayila tsitaala tsaabwe, baarura khuutsya khukhwakaanila umusaani ukhweele umukhasi.

²Ne baraano khu nibo baaba basilu, ne baraano nga bakyesi.

³Abo babaaba baasilu baasuta tsitaala tsaabwe, ne baalekha khuyila ni kamafura kakaandi ta.

⁴Ne abo babaaba bakyesi baasuta tsitaala tsaabwe atweela ni kamafura kakaandi mu shiindu.

⁵Ne umusaani ukhweele n'akyelewa khukhwiitsa, boosi baawungukhila, baakona.

⁶Ne mu shilo khukari, aabawo khuulaangilila bari, ‘Bona ukhweele woolile, ni murure mu mwakaanile.’

⁷Bakhaana boosi benyukha, baŋoonaka tsitaala tsaabwe.

⁸Ne babaaba baasilu tsana baalomela bakyesi bari, ‘Ni mukhuwekho khu mafura keenywe, lwekhuuba tsitaala tseefwe tsilikho tsisima.’

⁹Bakyesi babeelamo bari, ‘Taawe, singene kakhumale ifwe ni nanywe taawe. Khurusakho, ni mutsye isi bakulisila, mwikulile kakeenywe.’

¹⁰Ne ni baaba nga batsya khukula kamafura, ukhweele woola. Ibo babaaba berekefu, benjila ni naye khu mayiiya ke bukhwaale, bekalawo lulwiitsi.

¹¹Lwanyumakho bakhaana tsana babaatsya bakobola, baloma bari, ‘Musakhulu, musakhulu, khwikulilewo.’

¹²Naye wabeelamo ari, ‘Ilala imbaboolela ndi inywe ise simbamanyakho ta.’

¹³“Ni nashiryo, ni mube meeso, lwekhuuba simumanya shifukhu namwe isaawa ta.

¹⁴“Luundi ndi Buyiinga bwe mwikulu bulifwaana nga umusaani uwaba atsya lukyeendo lweewe, walaanga babakaanisi beewe, wabalekhela buyiindifu bweewe.

¹⁵Isi mutweela wamuwa tsi talanta tsiraano tse tsinusu, ukuundi wamuwa tsi talanta tsibili, ni isi ukuundi wamuwa i talanta indweela. Awa buli mutweela nga bunyali bweewe ni bwaba. Lwanyuma waarura waatsya khu lukyeendo lweewe.

¹⁶Khaangukho umusaani uwafuna tsi talanta tsiraano, waatsya waatsisubulamo, waafunamo tsi talanta tsitsiindi tsiraano.

¹⁷Ni nooyo naye uwafuna tsi talanta tsibili, waatsisubulamo waafunamo tsitsiindi tsibili.

¹⁸Ne umusaani uwafuna i talanta indweela, waatsya waalima lilowo mwiloba, waabisamo i talanta y'omukoosi weewe tsana.

¹⁹“Lwanyuma lwe mbuka indeeyikho, umukoosi we babakaanisi tsana waakobola, wekhala khuubalana ni nabo tsinusu tseewe.

²⁰Umusaani uwafuna tsi talanta tsiraano waareera ni tsi talanta tsitsiindi tsiraano, nga aloma ari, ‘Musakhulu, waambikhisa tsi talanta tsiraano, ne bona, naafunilemo tsiraano tsitsiindi.’

²¹“Umukoosi weewe waamuloma ari, ‘Uryoo! Iwe umwakaanisi umulayi luundi umwiyikinwa, ubeele umwiyikinwa mu biindu bikyeekhe, ari kane ikhubiikhise bibiindu bikali. Yiitsa ukabananile atweela kumwikhoyo kw'omukoosi woowo.’

²²“Uyo naye uwafuna tsi talanta tsibili weetsa. Waaloma ari, ‘Musakhulu, waambikhisa tsi talanta tsibili, ne bona naafunilemo tsi talanta tsitsiindi tsibili.’

²³“Umukoosi weewe waamuloma ari, ‘Uryoo! Iwe umwakaanisi umulayi luundi umwiyikinwa. Ubeele umwiyikinwa mu biindu bikyeekhe, ne ari kane ikhubiikhise bibiindu bikali. Yiitsa ukabananile atweela kumwikhoyo kw'omukoosi woowo.’

²⁴“Uyo naye uwafuna i talanta ndweela weetsa. Waaloma ari, ‘Musakhulu, nakhumanya ndi uli umusaani umuwaangafu naabi, ukyesela isi ukhaamiitsila ta. Ubuusanisila isi ukhahanyila bumiitso ta.

²⁵Nashiryo, ise narya, naatsya naabisa i talanta yoowo mwilowo. Bona iyishiina, iyoowo inyene.’

²⁶“Umukoosi weewe waamwiilamo ari, ‘Iwe uli umwakaanisi umubi, luundi umutoro! Iwe wamanya uryeena uri ise injesa sheesi ikhaamiitsa ta, luundi nabuusanisa byeesi ise ikhaamiitsa ta?

²⁷Nashiryo, khali waha basuubusi tsinusu tsase, ni khu mbuka yeesi ingobolelemo, naandifunilekho tsitsase tsinyene ni kamafuurisa.

²⁸Ni mumurusekho i talanta nyene, mukiwe uyo uuli ni tsi talanta liikhumi.

²⁹Lwekhuuba buli muundu ulikho ni shishiindu, balimuloselakho, ni naye aliiba ni bikali. Ne uyo ukhalikho nasho ta, ni naakho khakyeekhe kheesi ali nakho, balikhamurusakho.

³⁰Ne umwakaanisi uyo umubi, ni mumutuume ibulafu mu shilima, iyo iliiba khulila ni khukhwilumaka kameeno.’

³¹“Nga Umwaana w'Omuundu wetsiile mu shiriifwa sheewe, ni bamalayika boosi nga bali ni naye, alikhala khu shitsoloŋo sheewe, mu shiriifwa she mwikulu.

³²Kamanaambo koosi kalibuusanisibwa mu moni tseewe, ni naye alyawukhanisamo babaandu nga umwaayi n'awulamo kamasheese ni tsimbusi.

³³Kamasheese alikara khu mukhono kweewe kumulayi, ni tsimbusi khu mukhono kumunyeletsi.

³⁴“Lwanyuma umuyiinga aliloma abo babaali khu mukhono kweewe kumulayi ari, ‘Yiitsa, inywe beesi Paapa awa tsikhabi. Ni mwinjile mufune Buyiinga bubwaŋoonewaŋoonewa khulweenywe khukhwaama khu khubuumbibwa khwe shiibala.

³⁵Lwekhuuba ise naba intsala, inywe mwaamba she khuulya; naba bulesa inywe mwaamba she khuunywa; naba mukyeni, inywe mwantsakaanila mu ntsu tseenywe.

³⁶Ise naba bukhuna, inywe mwangwarisa; naba mulwaale, mwandolelela bulayi; naba mu mapuusu, mweetsa mwambonakho.’

³⁷“Ne bakwalaafu nabo balimwiilamo bari, ‘Umukasya, khwakhubona liina nga uli ntsala khwakhuwa she khuulya; namwe nga uli bulesa khwakhuwa she khuunywa?

³⁸Khwakhubona liina nga uli umukyeni khwakhwakaanila iweefwe; namwe nga uli bukhuna khwakhukwaarisa?

³⁹Khwakhubona liina nga uli umulwaale, namwe mu mapuusu, khweetsa khukhubona?’

⁴⁰Umuyiinga naye alibeelamo ari, ‘Ilala imbaboolela ndi, shoosi sheesi mwakholela mutweela khu bandaayase babafuura bukyeekhe bano, mwashikholela ise.’

⁴¹“Lwanyuma aliloma abo babaali khu mukhono kweewe kumunyeletsi ari, ‘Ni mururewo isi indi mutsye, inywe babaatsubiwa, mutsye mu mulilo kukuukhasima ta, kukwaŋoonewaŋoonewa lwa Sitaani ni bamalayika beewe.

⁴²Lwekhuuba ise naba intsala, ne inywe simwaambakho she khuulya ta; naba bulesa, simwaambakho she khuunywa ta.

⁴³Naba mukyeni, ne simwantsakaanila iweenywe ta; naba bukhuna, ne simwaambakho bikwaaro ta; naba mulwaale, luundi nga ndi mu mapuusu, simweetsa mwambonakho ta.’

⁴⁴Nabo balimwiilamo bari, ‘Umukasya, khwakhubona liina nga uli intsala, namwe bulesa, namwe umukyeni, namwe bukhuna, namwe mulwaale, namwe mu mapuusu, ifwe khwalekha khukhuyeeta?’

⁴⁵“Naye alibeelamo ari, ‘Ilala imbaboolela ndi, nga ni mukhaashikholela mutweela khu bano babaafuura bukyeekhe, muryo simwashiikholela ise ta.’

⁴⁶Ni nabo baryo baliitsya mu shitaambiso shikhawawo ta, ne bakwalaafu baliitsya mu bulamu bubukhawawo ta.”