Read lumasaaba Matayo 27 Bible Online

Matayo 27 - lumasaaba bible

Matayo 27

¹Kumutikhinyi mu mamilimili, basaayi bakhulu boosi ni basakhulu be babaandu, bakhalilawo atweela bye khukhwiira Yesu.

²Baryo bamubowa, baamuyila, bamuwaanayo isi Pilato, uwaba gafana.

³Lwanyuma lwayo, Yuda uwalya mu Yesu luwomelo, n'abona nga bakhaliile Yesu kumusaango kwe khuufwa, kumutaambo kwaamuwaamba, wakobosela basaayi bakhulu ni basakhulu tsinusu tsana kamakhumi kataru.

⁴Waaloma ari, “Ise noonakile, lwekhuuba naaliilemo luwomelo umuundu ukhalikho ni kumusaango ta.” Nabo baamwiilamo bari, “Ikwo musaango kweefwe? Ikwo musaango kwoowo.”

⁵Lwanyuma Yuda waatuuma tsinusu tsana mu Lisaayilo Likhulu, waarura waatsya wekoka.

⁶Basaayi bakhulu babukula tsinusu itso, baloma bari, “Shili she kumusilo khubukula tsinusu tsino khwatsira atweela ni biwaanwa mwibiikhilo lye Lisaayilo Likhulu, lwekhuuba tsili tsinusu tse kamafuki.”

⁷Ni nashiryo bakhalilawo atweela, batsikulamo kumukuunda kw'omubuumbi mweesi baasiikhatsakamo bakyeni.

⁸Isho nisho shishikila kumukuundakwo kwalaangiwa kuri, kumukuunda kwe kamafuki, khukhwoolesa ni shaleelo.

⁹Shino sholelesa ibyo bibyalomewa n'Umuŋoosi Yeremiya shiri, “Babukula tsinusu itso kamakhumi kataru, bukusi bw'oyo bweesi babaana ba Isiraeli balala bafukiilisana khuwayo khulweewe,

¹⁰batsiraambisa khutsikulamo kumukuunda kw'omubuumbi nga esi Umukasya andakila ise.”

¹¹Nga bili biryo, Yesu wemikha mu moni tsa gafana, naye gafana waamureeba ari, “Iwe niye umuyiinga we Bayudaaya?” Yesu naye waamwiilamo ari, “Ee, shili nga iwe n'ulomele.”

¹²Ne mwiibyo byeesi basaayi bakhulu ni basakhulu bamuwabila, mbaawo sheesi elamo ta.

¹³Lwanyuma Pilato waamureeba ari, “Iwe s'uwulila bilomo bino byoosi byeesi bano bakhutsuntsumilisa ta?”

¹⁴Ne Yesu walekha khubakho ni she khukhwiilamo ta, ikhaba na shitweela ta, khukhwoolesa ni gafana naye weyaanga naabi.

¹⁵Ne buli mwiiko gafana aabatsaka ni saambo iye khuukangululila babaandu umubowe mutweela isi baakanatsaka alekhuulibwe khu shifukhu she Kamayiiya ke Khuubirakho.

¹⁶Ne khu mbuka iyo, baabayo n'umubowe abe uwamanyikhana naabi lwe buubi bweewe, uwalaangiwa Baraba.

¹⁷Awo boosi ni babuusana, Pilato wabareeba ari, “Naanu yeesi mukana imbalekhuulile; Baraba namwe Yesu ulaangibwa Kristo?”

¹⁸Lwekhuuba amanya ari lyaba libuba lilyakila bawaanayo Yesu isi niye.

¹⁹Ne Pilato ni ekhala khu shitsoloŋo she khuukhalilakho kimisaango, umukhasi weewe waamurumanila buurume ari, “Ukhakholakho shishiindu shoosi khu musaani uyo ukhalikho shiibi shoosi ta, lwekhuuba nataambisiwile naabi mu marooro mu shilo khulweewe.”

²⁰Ne basaayi bakhulu ni basakhulu bakhonjelesa babaandu bari baloombe Pilato abalekhuulile Baraba, ne biire Yesu.

²¹Gafana waabareeba luundi ari, “Khu babaandu bano babili, mukana imbalekhuulile naanu?” Nabo belamo bari, “Baraba!”

²²Kila ndi Pilato waabareeba ari, “Ne Yesu ulaangiwa Kristo, imukhole ndyeena?” Boosi belamo bari, “Mutsaangilile khu musalaba!”

²³Pilato waabareeba luundi ari, “Ne lwashiina? Shiibi shiina sheesi akholile?” Ne nabo belamo ni kamaani koosi bari, “Mutsaangilile khu musalaba!”

²⁴Ne Pilato n'abona nga bahandalale naabi, bakana khusoolana busoolani, wabukula kameetsi, wasaaba kamakhono keewe mu moni tse babaandu boosi nga babona, nga aloma ari, “Ise sindikho ni kumusaango kwoosi lwe kamafuki k'omusaani yuno ta, ukwo musaango kweenywe!”

²⁵Ne babaandu boosi belamo bari, “Kha kumusaango kwe kamafuki keewe kube khwiifwe ni khu baana beefwe!”

²⁶Aryo Pilato waabalekhuulila Baraba, ne waalakila ari Yesu bamukhupe tsimiimbo, lwanyuma waamuwaanayo isi bali bamutsaangilile khu musalaba.

²⁷Lwanyuma basilikhale ba Gafana baayila Yesu khu lwaanyi lwe kimisaango, baabuusaasa lituuli lye basilikhale boosi khumwibotokhelela.

²⁸Baryo baamwaabulamo tsingubo tseewe, baamukwaarisa ingubo imbesemu.

²⁹Baalukha lihabi lye kamawa, baalimukwaarisa khu murwe kweewe, baamura imiimbo mu mukhono kweewe kumulayi. Lwanyuma baafukhama aasi iburaangisi weewe, bamwoonela bari, “Mulembe iwe umuyiinga we Bayudaaya!”

³⁰Baryo baamufuutsila kamare, baamurusakho imiimbo isi baara mu mukhono kweewe, baamukhupa khu murwe kimiluundi mikali.

³¹Ne ni baamala khumwoonela baryo, baamwaabulamo ingubo tsana imbesemu, baamukwaarisa bikwaaro byeewe bibyeene. Lwanyuma baamuyila khuumutsaangilila khu musalaba.

³²Ne ni baaba nga barura ibulafu, baakanana umusaani uwe Kurene, uwalaangiwa Simoni; baamuwanyiinya khuusuta kumusalaba kwa Yesu.

³³Baryo boola mu shiifwo shishilaangibwa bari Gologosa (kamakhulu kaasho bari shiifwo she shiwaanga).

³⁴Abweene awo baawa Yesu iviini khuunywa, nga bakitubaasilemo indule naabi, na namuusakho, wekaana khukinywa.

³⁵Ne ni baamala khumutsaangilila khu musalaba, bakabanana bikwaaro byeewe, nga bakhupa khakokha

³⁶Lwanyuma lwayo, bekhala awo khumulolelela.

³⁷Ne angaaki e kumurwe kweewe barawo burone bubuloma buri, OYUNO NIYE UMUYIINGA WE BAYUDAAYA.

³⁸Aabawo ni banuuli babili babaatsaangililwa ni naye, mutweela khu mukhono kweewe kumulayi, n'ukuundi khu mukhono kweewe kumunyeletsi.

³⁹Babaandu boosi babaaba babirawo basisiikha kimirwe kyaabwe, nga bamufwotsola,

⁴⁰nga baloma bari, “Iwe abe unyala khusaambula Lisaayilo Likhulu, walyombekhela luundi mu bifukhu bitaru, yiwonesa wamweene khubone! Ari yiikha urure khu musalaba khubone, noola uli Umwaana wa Wele!”

⁴¹Ni musaambo niyo ndweela basaayi bakhulu nabo, ni baleekeli be kamakaambila ka Musa, ni basakhulu nabo, bamwoonela nga baloma bari,

⁴²“Aawonesatsaka babaandi, ne bona s'anyala wewonesa umweene ta! Mbo niye umuyiinga wa Isiraeli, ari ni eekhe khukhwaama khu musalaba, ni nafwe kane khumufukiilile.

⁴³Mbo niye eyikina Wele, ari lekha Wele amuwonese noola namukana, lwekhuuba niye aloma ari, niye ali Umwaana wa Wele.”

⁴⁴Ni musaambo niyo ndweela, banuuli ibo babatsaangililwa ni naye atweela nabo bamwoonela naabi.

⁴⁵Khukhwaama khu saawa iye khasesaba tse mwihangilwe, khukhwoola khu saawa iye shisheenda, shishiilima shikali shaakwa khu shiibala shoosi.

⁴⁶Ne khu saawa awo nga sheenda, Yesu waalila ni likono lye angaaki nga aloma ari, “Eli, Eli, lama sabakusani?”[21] (Kamakhulu kaasho kari, “Wele wase, Wele wase, lwashiina iwe untsantsukhile ise?”)

⁴⁷Batweela khu baandu babaaba beemile awo ni bawulila baryo, baaloma bari, “Bona ari alaanga Eliya.”

⁴⁸Lubaluba mutweela khu nibo waatimaka, waabukula shishaangwe, waashitsukhamo iviini indule naabi, waashira khu lukholo, waashira imunwa wa Yesu ari anywe.

⁴⁹Ne babaaramile boosi baaloma bari, “N'umulekhe abe. Ari khakhuliinde khubone noola Eliya kane eetse amuwonese.”

⁵⁰Ne lwanyuma nga Yesu waaliliile angaaki ni likono likali, waalekhuula kumwoyo kweewe.

⁵¹Khu mbuka nyene iyo, ingubo iyaba yaatiimbibwa mu Lisaayilo Likhulu, yonuukhamo kimiluundi kibili, khukhwaama khu ngaaki khukhwoola aasi. Shibala shoosi shaanikina, ni kamabaale kaatikhakamo.

⁵²Tsiŋani tsaabalukhaka, ni kimibili kye babaandu bakhosefu babaafwa khaale kyaalamusibwa.

⁵³Ne ni baamala khuurura mu ŋani lwanyuma lwe khuulamukha khwa Yesu khukhwaama mu bafu, baatsya mu shiriimba shikhosefu, babonekhela babaandu bakali.

⁵⁴Umusilikhale umukhulu ni babaandi babaaba baliindile Yesu, ni baabona khunikina khwe shiibala, ni bibiindi bibyakholekha, baarya naabi, baloma bari, “Ilala umusaani yuno abeele Umwaana wa Wele.”

⁵⁵Bakhasi bakali babaaba nga beemile aleeyikho, balolelela bibyakholekha byoosi. Nibo babaloondelelatsaka Yesu khukhwaama i Galilaaya, nga bamwakaanisa.

⁵⁶Mu nibo mwabamo Malyamu Magadalena, Malyamu Maayi wa Yakobo ni Yusufu, ni maayi we babaana ba Zebedaayo.

⁵⁷Ne antsye ni bwaba nga bwilabula, abawo umusaani umuyindifu uweetsa khukhwaama i Alimaseya, lisiina lyeewe bari Yusufu, naye uwaba waayikela umuleekelwa wa Yesu.

⁵⁸Nga waatsiile isi Pilato, waamuloomba amuwe kumulaambo kwa Yesu. Ni Pilato waalakila ari bakumuwe.

⁵⁹Aryo Yusufu waayila kumulaambo, waakubowa mu ngubo, imiliwu iwaanga imelamela.

⁶⁰Waakwalisa mu ŋani yeewe umweene imbya yeesi aayaba mu lwaanda. Waayilingisa libaale liboofu, waalira khu mulyaango kwe ŋani, waarurawo waatsya.

⁶¹Malyamu Magadalena ni Malyamu ukuundi baaba bekhaale mu shiifwo shishilolelaniile ni ŋani.

⁶²Khu shifukhu shisheelakho, nisho shifukhu shishiila khu she khukhwiŋoonaŋoona, basaayi bakhulu ni Bafarisaayo baabuusana isi Pilato, baamuloma bari,

⁶³“Musakhulu, ifwe khushebulila nga umubeeyi yuno ashiili mulamu aaloma ari, ‘Lwanyuma lwe bifukhu bitaru, indilamukha mu bafu.’

⁶⁴Nashiryo, lakila baliindiile ilala ŋani, khukhwoolesa khu shifukhu she khataru. Manya lukana baleekelwa beewe banyala beetsa beeba kumulaambo kweewe, lwanyuma baboolela babaandu bari walamusiwile mu bafu. Ni khuwoombesa khuno khwe lwanyuma kane khube khuubi naabi khufuurisa khuukiboole.”

⁶⁵Aryo Pilato waaloma ari, “Mbo muli ni baliindi basilikhale, ni mutsye muliindile ilala iŋani nga ni munyala.”

⁶⁶Nabo baryo baatsya, baliindila ilala iŋani, barakho ni khabonelo khu libaale, luundi barakho ni baliindi.