Read lumasaaba Matayo 28 Bible Online

Matayo 28 - lumasaaba bible

Matayo 28

¹Lwanyuma lwa Sabato, bwaba kumutikhinyi mu mamilimili khu shifukhu shishinyoowa mu sabiiti, Malyamu Magadalena, ni Malyamu ukuundi tsana, baatsya khubona iŋani.

²Aabawo khuunikina khukali khwe shiibala, lwekhuuba malayika w'Omukasya ekha khukhwaama mwikulu, weetsa khu ŋani waayilingisa libaale, waalikhalakho.

³Imbonekha yeewe yaba nga khuumulikha khwe kamaani, ni bikwaaro byeewe byaba byakhosa nga kamararara.

⁴Baliindi baarya naabi lwa malayika yuno, banikina bafwaana nga babafwiile.

⁵Malayika waaloma bakhasi ari, “Mukharya ta, lwekhuuba naamanyile ndi, mulikho muweentsa Yesu isi baatsaangilila khu musalaba.

⁶Ne s'ali ano ta, waalamukhile nga n'aloma. Ni mwiitse mubone esi alisibwa.

⁷Nio ari mutsye khaangu muboolele baleekelwa beewe muri, ‘Waalamukhile mu bafu, ne bona waabaraangilile khuutsya i Galilaaya. Ibweene iyo niyo yeesi mulimubonela.’ Bona ari naababooleele.”

⁸Baryo bakhasi baarura khaangu khu ŋani nga bariire naabi, ne nga betsuule kumwikhoyo mukali, baatima baatsya khuuboolela baleekelwa beewe.

⁹Khaangukho Yesu umweene waabakanana, waabaloma ari, “Mulembe.” Baamwiitsayo, baamutiila khu bikyele, luundi baamwisaaya.

¹⁰Lwanyuma Yesu waabaloma ari, “Mukharya ta. Ni mutsye muboolele bayaaya baase, batsye i Galilaaya, ibweene iyo niyo yeesi balimbonela.”

¹¹Bakhasi ni baaba nga batsya, batweela khu baliindi baatsya mu shiriimba, baboolela basaayi bakhulu ibyo byoosi bibyaba byabelewo.

¹²Baryo ni babuusana atweela ni basakhulu bakhala kamakyesi, baawa basilikhale tsinusu tsingali,

¹³nga babaloma bari, “Muloma muri, ‘Baleekelwa beewe beetsile mu shilo nga ifwe khwakonele, bamwiiba.’

¹⁴Lwekhuuba kamakhuuwa kano ni kalyoola wa gafana, ifwe khulimuwooyawooya, mulekhe khukwa mu bukosi bwoosi ta.”

¹⁵Baryo baliindi bayila tsinusu, bakhola nga ni babalakila. Kamakhuuwa kano kasalanila mu Bayudaaya boosi, ni khukhwoolesa shaleelo.

¹⁶Baryo baleekelwa liikhumi na mutweela baatsya i Galilaaya khu lukiingi lweesi Yesu abaloma khuutsyakho.

¹⁷Ne ni baamubona, baamwisaaya, ne babaandi baamwikanakana.

¹⁸Lwanyuma Yesu weetsa isi bali, waabaloma ari, “Ise nawebwile bunyala bwoosi, mwikulu ni khu shiibala.

¹⁹Nashiryo, ni mutsye mukaluse kamanaambo koosi mukekyelise baleekelwa, nga mubabatisa mu Lisiina lya Paapa nily'Omwaana, nily'Omwooyo Umukhosefu.

²⁰Nga mubaleekela khuuwaamba byoosi byeesi nabalakila inywe. Mwilala, nase ndi atweela ni nanywe, bifukhu byoosi khukhwoolesa khu ntsakamo iye kumuboolo.”