Read lumasaaba Matayo 3 Bible Online

Matayo 3 - lumasaaba bible

Matayo 3

¹Mu bifukhu ibyo, Yokana Umubatisa wiitsa nga aboolela mu mubiimbi kwa Yuda.

²Nga aloma ari, “Ni mwibiiyise bibyoonako byeenywe, lwekhuuba Buyiinga bwe mwikulu[1] buli aambi.”

³Lwekhuuba Yokana yuno niye isi umuŋoosi Yisaaya aalomakho nga aloma ari: “Likono lyooyo ulaangilila angaaki mu mubiimbi ari, ‘Ŋoonaŋoona kumukhoosi kw'Omukasya, mukwalaase tsintsila tseewe.’ ”

⁴Yokana Umubatisa aakwaaratsaka tsingubo tsye bubwooya bwe ŋamila, nga webowele kumusipi kwe lukhoba mu shikuute, ni biilyo byeewe byaba tsisike, ni bubuushi bwe intsukhi.

⁵Baryo babaandu beetsa nga baama mu Yerusalemu, ni mu Yuda mwoosi, ni mu shaalo shoosi shishililanile ni Yorudaani.

⁶Beetsa nga babuula bibyoonako byaabwe ni Yokana waababatisila mu luutsi Yorudaani.

⁷Ne Yokana n'abona bakali khu Bafarisaayo ni Basadukaayo nga beetsa is'ali khuubatisibwa, waabaloma ari, “Inywe tsindemu, naanu uwabarewuule khukhwilukha lirima liliili khukhwiitsa?

⁸Ni mwaane bibyaano bibyokesanisa khukhwibiiyisa khwe bibyoonako khukhweene.

⁹Naluundi mukhambaasa nga mwiilomela mwabeene muri, ‘Khuli ni Iburayimu nga paapa weefwe’, ne ise imbaboolela ndi, Wele anyala khukalusila Iburayimu babaana khukhwaama mu mabaale kano.

¹⁰Ni ana ari, iyaywa yareerewele khu bisina bye kimisaala, na buli kusaala kwoosi kukhaana bibyaano bilayi, kane bakureme bakutuume mu mulilo.

¹¹“Ise imbabatisa ni kameetsi lwe khukhwibiiyisa bibyoonako, ne uyo uuli khukhwiitsa lwanyuma lwase, niye uwuminyisakho ise kamaani. Ni nase sinakhila khuusuta bilaalo byeewe ta. Umweeneyo alibabatisa n'Umwoyo Umukhosefu ni kumulilo.

¹²Wawaambile lulweelo lweewe mu mukhono kweewe, aliŋoonaŋoona lulwaanyi lweewe, abuunge iŋaano yeewe mu shiirara, ne likhuutsi alilyoosha ni kumulilo kukuukhasima ta.”

¹³Lwanyuma Yesu woola khukhwaama i Galilaaya, nga eetsa isi Yokana Umubatisa khu Yorudaani ari amubatise.

¹⁴Ne Yokana Umubatisa wakana ekaane nga aloma ari, “Ise ingana iwe umbatise ise, n'endi iwe wiitsa isi ise?”

¹⁵Ne Yesu waamwiilamo ari, “Fukiilila shikholekhe aluno, lwekhuuba shili shilayi ifwe khukhwoolelesa byeesi Wele akana.” Aryo Yokana waafukiilila.

¹⁶Khaangukho Yesu n'amala khuubatisibwa waarura mu meetsi. Khu mbuka iyo, bona likulu lyaabayuukha, aryo Yesu waabona Umwoyo wa Wele nga eekha, nga ali nga liwuusi, waamuwolelakho.

¹⁷Ni likono nalyo lyaama mwikulu nga liloma liri, “Oyuno Umwaana wase isi ingana, luundi niye isi nikhoyela naabi.”