Read lumasaaba Matayo 4 Bible Online

Matayo 4 - lumasaaba bible

Matayo 4

¹Lwanyuma Yesu waayilibwa n'Umwoyo Umukhosefu mu mubiimbi khuukhakibwa ni Sitaani.

²Ne n'amala khuubuya intsala khuumala bifukhu kamakhumi kane kumuusi ni shiilo, intsala yamulya.

³Umukhonjelesi weetsa is'ali, waamuloma ari, “Iwe noola uli Umwaana wa Wele, lakila kamabaale kano kekyelemo biilyo.”

⁴Yesu welamo ari, “Sharonebwa shiri, ‘Umuundu s'aba mulamu lwe biilyo byonyene ta, ne nabuli lomo iyaama mukhanwa mwa Wele.’ ”

⁵Lwanyuma Sitaani ndi waamuyila mu shiriimba shikhosefu, waamwimisa khu litikiiyi lilifuura buleeyi lye Lisaayilo Likhulu, waamuloma ari,

⁶ “Iwe noola uli Umwaana wa Wele, suna aasi, lwekhuuba sharonebwa shiri, ‘Wele alilakila bamalayika beewe ibyo bibikhuwaambakho khwiiwe, nabo balikhukaama mu mikhono kyaabwe, nawe ulekhe khukhwituya shikyele shoowo khwibaale ta.’”

⁷Yesu waamwiilamo ari, “Luundi ndi nasho sharonebwa shiri, ‘Ukhakhakatsaka Umukasya Wele woowo ta.’ ”

⁸Luundi ndi Sitaani waayila Yesu khu lukiingi luleeyi naabi, waamwokesa buyiinga bwoosi bwe mu shiibala, ni shiriifwa shabwo.

⁹Aryo kila Sitaani aloma Yesu ari, “Kane ikhuwe ibyo byoosi iwe n'ukane ufukhame aasi untsisaaye.”

¹⁰Yesu waamuloma ari, “Rurawo tsya, Sitaani. Lwekhuuba sharonebwa shiri, ‘Wisaayatsaka Umukasya Wele woowo, luundi umwakaanisatsake niye yenyene.’ ”

¹¹Ni abweenewo, Sitaani waalekha Yesu, ni bamalayika beetsa bamwakaanisa.

¹²Yesu n'awulila ari Yokana Umubatisa baamuboyile mu mapuusu, welayo i Galilaaya.

¹³Nga waarurire mu Nazareesi, waatsya waamenya mu Kaperunaumu, shiriimba shishesaane ni inyaantsa ye Galilaaya, mu bisiintsa bya Zebuloni ni Nafutaali.

¹⁴Shino shakholekha khukhwoolelesa byeesi umuŋoosi Yisaaya aaloma ari,

¹⁵“Iwe shishaalo sha Zebuloni ni shishaalo sha Nafutaali, intsila ye khuutsya khu nyaantsa, shanjelekha wa Yorudaani, i Galilaaya she Banaambo

¹⁶Babaandu babaamenya mu shilima, baabone buwaanga bukali; ni naabo babekhala mu shaalo she mu shisiisa she khuufwa, buwaanga bwaababurukhiile.”

¹⁷Khukhwaamila khu mbuka inyene iyo, Yesu waarakikha khuuboolela Kamakhuuwa Kamalayi ari, “Ni mwibiiyise bibyoonako byeenywe, lwekhuuba Buyiinga bwe mwikulu buli aambi.”

¹⁸Yesu n'aba nga akyeendela khu ndulo khwe nyaantsa Galilaaya, waabona be buulebe babili, Simoni uwalaangiwa Petero, ni yaayawe Andereya nga bamwaata butiimba bwaabwe khu nyaantsa khuuloba, lwekhuuba baaba baalobi be tsinyeeni.

¹⁹Yesu waabaloma ari, “Ni mwiitse munondelele, ni nase ndibakalusa khuuba babaareera babaandu isiindi.”

²⁰Khaangukho, baalekha butiimba bwaabwe, baaloondelela Yesu.

²¹Aryo Yesu welooselayo iburaangisi, waabona be buulebe babaandi babili, Yakobo ni Yokana, babaana ba Zebedaayo. Bano baaba bali mwikhoŋolo atweela ni paapa waabwe Zebedaayo, nga baŋoonaŋoona butiimba bwaabwe. Nabo Yesu wabalaanga.

²²Khaangukho, baalekhawo likhoŋolo ni paapa waabwe, baamuloondelela.

²³Aryo Yesu waatsya mu Galilaaya mwoosi, nga aleekela mu ntsu tsye khukhwisaayilamo, nga aboolela Kamakhuuwa Kamalayi ke Buyiinga luundi nga awonesa buli ndwaale yoosi ni butsiina mu baandu.

²⁴Lubuyi lweewe lwafuma mu shiibala sha Siriya mwoosi, ni babaandu bareera babaandu babaaba balwaalile tsindwaale tsitsikhali ndweela ta, babataambisibwa ni kimisaambwa, babaaba bakwa tsifubu, ni babaakataala, naye Yesu waabawonesa boosi.

²⁵Kamatuuli ke babaandu kaamulondelela nga kaama i Galilaaya, ni Dekapoli, Yerusalemu, Yuda, ni be mu byaalo bye shanjelekha wa Yorudaani.