Read lumasaaba Matayo 5 Bible Online

Matayo 5 - lumasaaba bible

Matayo 5

¹Aryo Yesu n'abona kamatuuli ke babaandu, waaniina khu lukiingi, wekhala aasi. Baleekelwa beewe beetsa is'aali,

²waarakikha khuubaleekela nga aloma ari:.

³“Bali n'ikhabi ibo babaali bataambi mu mwoyo, lwekhuuba Buyiinga bwe mwikulu bubwaabwe.

⁴ “Bali n'ikhabi ibo babaali mu mutaambo, lwekhuuba balikhoyesebwa.

⁵ “Bali n'ikhabi ibo babaali bawolu, lwekhuuba baliiba basikha be shiibala.

⁶“Bali n'ikhabi ibo babaali intsala ni bulesa bwe khuukhola byeesi Wele akana, lwekhuuba Wele alibekusila ilala.

⁷“Bali n'ikhabi ibo babaali be shiisa isi babaandu babaandi, lwekhuuba nabo Wele alibawaambila shiisa.

⁸“Bali n'ikhabi babaali bakwalaafu mu mwoyo, lwekhuuba balibona Wele.

⁹“Bali n'ikhabi ibo babaraambilila lukoosi, lwekhuuba balilaangibwa babaana ba Wele.

¹⁰“Bali n'ikhabi ibo beesi babaandu bakubyeenga lwe bukwalaafu, lwekhuuba Buyiinga bwe mwikulu bubwaabwe.

¹¹“Inywe muli n'ikhabi, babaandu ni kane babaakhomatsake, babakubyeenge, luundi ni kane babakanikhekho mu lomo yoosi imbi lwe khuubafunisa ise.

¹²Nimwikhoye, luundi mwitikite, lwekhuuba kumukheemba kweenywe mwikulu mukali, lwekhuuba ni baŋoosi babaabanyoowa inywe baabakubyeenga musaambo nyeneyo.

¹³“Inywe muli nga kumuunyu kwe shiibala. Ne kumuunyu ni kuwamo itsamu, itsamu iyo yisibwamo iryeena luundi? Kuba sikushaakha luundi ta, khurusakho kutuumibwa ibulafu, ni babaandu bakusaambakilila.

¹⁴“Inywe muli buwaanga bwe shiibala. Shiriimba shishombekhebwa khu lukiingi sishinyala khuubisibwa ta.

¹⁵Namwe mbaawo umuundu uwaambisa itaala, waakifunikhilila mu shiipo ta, ne akira khu shisiindi khu ngaaki nio yaaburukhila buli mutweela uli mu ntsu.

¹⁶Musaambo niyo ndweela, khayo buwaanga bwenywe bwaaburukhe buryo mu moni tsye babaandu, nio babone buraambi bweenywe buulayi, baruuye Paapa weenywe uuli mwikulu.

¹⁷“Mukhambaasa muri ise neetsa khurusawo kamakaambila ka Musa namwe khuuleekela khwe baŋoosi ta. Ise sinayitsa khuubirusawo ta, ne njeeba khuubyoolelesa busa.

¹⁸Lwekhuuba ilala imbaboolela ndi, likulu ni shiibala biliwawo, ne mbaawo ni khanukuta na khatweela, namwe kharonyesi mu makaambila ka Musa, bibiilirusibwawo ta, khukhwoolesa nga byoosi byoolelele.

¹⁹Uyo yeesi ufuniaaka litweela khu makaambila kano, ikhaba lilyakamayo bufwiiti, luundi waleekela babaandi khuukhola baryo, naye aryo alilaangibwa khuuba ufuura bufwiiti mu Buyiinga bwe mwikulu. Ne buli mutweela ukana akholatsake byeesi kamakaambila ka Musa kaloma, luundi waaleekela babaandi khuukhola baryo, alilaangibwa umukhulu mu Buyiinga bwe mwikulu.

²⁰Lwekhuuba imbaboolela ndi bukhosefu bweenywe ni bulilekha khufuurisakho bwe baleekeli be kamakaambila ka Musa, ni Bafarisaayo, simulinjila na khafwiiti mu Buyiinga bwe mwikulu ta.

²¹“Inywe mwaawulila nga babaandu be khaale ni baabaloma bari, ‘Ukheera ta, n'umuundu yeesi uwiira alikhalilwa kumusaango.’

²²Ne ise imbaboolela ndi, umuundu yeesi urunyila yaayawe, alikhalilwa kumusaango, ni nooyo ukana alaangatsake yaayawe ari, ‘Iwe s'ulimo kamakesi ta,’ alireerewa mu lukhobo, ni nooyo ukana alomatsake yaayawe ari, ‘Iwe umusilu,’ aliiba mu shikosi she khutuumibwa mu mulilo kukukhasima ta.

²³“Nashiryo, n'uba nga uyila shiwaanwa shoowo khu sheeso, ne washebulila uri yaayawo akhulikho ni lomo yoosi,

²⁴lekha asheeselo awo shiwaanwa shoowo, ukoboleyo khaangu unyoowe utubaane ni yaayawo, nio ukobole uweyo shiwaanwa shoowo.

²⁵“Fukiilisana khaangu n'umuundu utsya khukhuwaabila, nga mushiili khu ntsila. Ne nga akhukhola uryo ta, uyo uutsya khukhuwaabilayo, akhuwaanayo isi umukayi, n'umukayi naye kane akhuwaaneyo iwe isi umusilikhale, khuukhura iwe mu mapuusu.

²⁶Ilala ikhuboolela ndi, s'uliruramo ta, khukhwoolesa n'ulisasula liwumule limalilisi lye likobi lyoowo.

²⁷“Inywe mwaawulila nga ni shalomebwa shiri, ‘Ukhayeyana ta.’

²⁸Ne ise imbaboolela ndi, umuundu yeesi ulolela umukhasi ni khumwiikoomba aba waamalile khuuyeyana ni naye mu mwoyo kweewe.

²⁹Noola imoni yoowo iye khu lubeka lulayi ikhuyila mu khwoneka, kirusemo, ukituume aleeyi. Shiba shiminyisa buulayi, shitweela khu bisiintsa bye kumubili kwoowo khuuhela, khufuurisa kumubili kwoowo kwoosi khuutsya mu mulilo kukuukhasima ta.

³⁰Naluundi kumukhono kwoowo kwe khu lubeka lulayi ni kuba nga kukhuyila mu khwoneka, kuremekho ukutuume aleeyi. Shiminyisa bulayi shitweela khu bisiintsa bye kumubili kwoowo khuhela, khufuurisa kumubili kwoowo kwoosi khuutsya mu mulilo kukukhasima ta.

³¹“Luundi shalomewa shiri, ‘Umuundu yeesi n'aaloba umukhasi weewe, akhila khuumuwa ibaluwa iye khuumuloba.’

³²Ne ise imbaboolela ndi, buli muundu yeesi ukana awoonatsake umukhasi weewe, akhali lwe buyeyani, aba waamwikyelisile umuyeyani, n'umuundu uyila umukhasi uwawoonebwa, aba naye wayeyaane.

³³“Luundi mwawulila nga babaandu be khaale ni baababoolela bari, ‘Ukhetsubatsaka bye bubeeyi ta, ne wolelesa bibitsubo byoowo byeesi wetsuba isi Umukasya.’

³⁴Ne ise imbaloma ndi, ukhetsuba na khafwiiti khoosi ta. Ukhetsubila likulu ta, lwekhuuba nilyo shitsoloŋo sha Wele;

³⁵namwe shiibala, lwekhuuba nikhwo khweesi alaambisa bikyele byeewe; namwe isi Yerusalemu, lwekhuuba nisho shiriimba sh'Omuyiinga umukhulu.

³⁶Namwe ukhetsubila kumurwe kwoowo ta, lwekhuuba s'unyala khukalusa lutsuune lwoowo lutweela khuuba luwaanga namwe lumali ta.

³⁷Ne lekha ibyo byeesi uloma uri, ‘E e,’ bibatsake ‘E e,’ ni ‘Taawe,’ abatsake ‘Taawe’. Ni bibiindu bibiindi bibifuurakho awo, biba byaama isi umusiku.

³⁸“Mwawulila nga ni shalomewa khaale shiri, ‘Imoni iliyasibwa ni moni, ni liliino liliyasibwa ni liliino.’

³⁹Ne ise imbaloma ndi, mukhakhingililatsaka umuundu yeesi ubakhola buubi ta. Umuundu yeesi n'akhuupa luuyi khu lusaya lwoowo lwe khu lubeka lulayi,[2] umuyuusila lwe khu lubeka lunyeletsi nalwo.

⁴⁰Ni nooyo ukana khukhuwabila bari nio ayile isaati yoowo, n'umulekhe ayile ni kooti nayo.

⁴¹Naluundi nga umuundu waakhuwanyinyile khuutsya i kilomita ndweela, tsya ni naye tsi kilomita tsibili.

⁴²Umuundu yeesi n'akhuloomba shishiindu, umuwatsaka, ni nooyo ukana khukhwiwolakho, ukhamwisisakula ta.

⁴³“Inywe mwaawulila nga ni shalomewa shiri, ‘Kanatsaka umwesanwa woowo, ubiyile umusiku woowo.’

⁴⁴Ne ise imbaloma ndi, ni mukanaatsake basiku beenywe, luundi muloombele ibo babaabakubyeenga,

⁴⁵nio mube babaana ba Paapa weenywe uli mwikulu. Lwekhuuba inyaanga yeewe akyaburusila babaakhali babeyikinwa ta ni babeyikinwa, ni ifula yeewe yakhupila babaakhola biilayi ni babaakhakhola biilayi ta.

⁴⁶Ne noola mukana abo babaabakana bonyene, mulifuna shiwaanwa shiina? Ni baabuusanisi be kumusolo nabo sibakhola baryo?

⁴⁷Ne ni kane musheesatsake bayaaya beenywe bonyene, babaandu babaandi inywe mubafuurisakho shiina? Ikhaba ni bakhafukiilila nabo sibakhola baryo?

⁴⁸Ni nashiryo, inywe mwaakha mwaba bakwalaafu nga Paapa weenywe uli mwikulu n'ali umukwalaafu.