Read lumasaaba Matayo 6 Bible Online

Matayo 6 - lumasaaba bible

Matayo 6

¹“Ni mwitsililise mulekhe khukholela buraambi bweenywe bwe bukwalaafu mu moni tsye babaandu bari nio bababone ta. Ni kane mukhole muryo, singene mufune kumukheemba kukwaama isi Paapa weenywe uli mwikulu ta.

²“Iwe n'uba nga ukabila bataambi, ukhafuura ikhoombi lwe khuukana khukhwiyokesana nga babemiliisa khu ngaaki ni bakhola mu ntsu tsye khukhwisaayilamo, ni mu mikhoosi nio bari babaandu babaabuyile ta. Ilala imbaboolela ndi, baamalile khaale khuweebwa kumukheemba kwaabwe mu bwitsufu.

³Ne iwe n'uwa bataambi, kumukhono kwoowo kumunyeletsi kukhamanya sheesi kumukhono kwoowo kumulayi kuli khuukhola ta,

⁴nio khuukana khwoowo khunyale khuuba khwe mu shimoonyo. Aryo Paapawo ubona mu shimoonyo alikhuwa kumukheemba kwoowo.

⁵“Ne ni muba nga muloomba, mukhaba nga babekholisa busa ni bakhola ta. Lwekhuuba bakana khuuloomba nga beemile khu ngaki mu ntsu tsye khukhwisaayilamo, ni mu mikhoosi esi kyaakananila, nio bari babaandu bababone. Ilala ise imbaloma inywe ndi nibo baamala khaale khuuweebwa kumukheemba kwaabwe mu bwitsufu.

⁶Ne iwe n'uba nga uloomba, yinjila mu shiseenge shoowo, wikalewo lulwiitsi, uloombe Paapawo ukhabonekha ta, ni Paapawo mweene ubona mu shimoonyo, alikhuwa iwe kumukheemba.

⁷Inywe ni muba nga muloomba, mukhelaŋana mu bilomo nga Banaambo ni bakhola ta. Lwekhuuba nibo bambaasa bari, lwe bilomo byaabwe bikali kane Wele abawulile.

⁸Mukhaba nga nibo ta, lwekhuuba Paapa weenywe wamanya byeesi mukana nga mushiili nakhuloomba ta.

⁹Nashiryo ni muloombatsake muri: ‘Paapa weefwe uuli mwikulu, Lisiina lyoowo likhosefu liisibwemo lukoosi.

¹⁰Buyiinga bwoowo bwiitse, khayo byeesi ukana bikholebwe mu shiibala, nga ni bikholebwa mwikulu.

¹¹Ukhuwe biilyo byeefwe bye shaleelo.

¹²Khwiyakhile bibyoonako byeefwe, nga nafwe ni khwiyakhila babaakhwonakisila.

¹³Ukhakhuyila mu khukhonjelesebwa ta, ne ukhuwonese isi umubi.’

¹⁴“Lwekhuuba inywe ni kane mwiyakhile babaandi buubi bweesi baba bakholile isi inywe, Paapa weenywe uli mwikulu naye kane abeyakhile inywe.

¹⁵Ne ni kane mulekhe khukhwiyakhila babaandu babaandi buubi bwaabwe, Paapa weenywe naye s'alibeyakhila bibyoonako byeenywe ta.

¹⁶“Inywe ni mubuya intsala lwe khukhwisaaya Wele, mukheyokesana mu moni nga babaali mu mutaambo, nga ibo babemiliisa khu ngaaki ni bakhola ta. Lwekhuuba boonakisa mu moni mwaabwe khukhwokesanisa isi babaandu babaandi bari babuya intsala. Ilala imbaboolela ndi baamalile khaale khuufuna kumukheemba kwaabwe.

¹⁷Ne iwe n'ubuya intsala, yisiinga mu moni mwoowo, wihakhe kamafura mu murwe kwoowo,

¹⁸nio babaandu balekhe khumanya bari, ulikhubuya intsala ta, akhali Paapawo yenyene ukhabonekha uyo amanye, ni Paapawo uyo ubona bibiili mu shimoonyo alikhuwa kumukheemba kwoowo.

¹⁹“Mukhebiikhila bye buyiindifu bweenywe khu shiibala isi tsisilili, ni ingikhina binyala byoonakisila ta, ni esi babeefwi bayabila baabiiba ta.

²⁰Ne ni mwibiikhile bye buyiindifu bweenywe mwikulu, isi tsisilili ni ingikhina bikhanyala byoonakisila ta, namwe esi babeefwi bakhanyala khuyaba beeba ta.

²¹Lwekhuuba iyo isi buyiindifu bwoowo buba, niyo esi kumwoyo kwoowo nakwo kuba.

²²“Tsimoni tsoowo nitso itaala ye kumubili. Tsimoni tsoowo ni tsiba nga tsindayi, kumubili kwoowo kwoosi kwitsula buwaanga.

²³Ne tsimoni tsoowo ni tsikhaba tsindayi, kumubili kwoowo kwoosi kwitsula shishiilima. Noola buwaanga bubuuli mwiiwe buli shishiilima, ni shishiilima isho shiba she kamaani!

²⁴“Mbaawo umuundu unyala khuuba umwakaanisi uwe bakoosi babili ta, lwekhuuba anyala waabiyila mutweela, waakana ukuundi, namwe wehaamba naabi khu mutweela, waalekelesa uramile. Nashiryo, simunyala khukhwakaanisa Wele ni buyiindifu ta.

²⁵“Nashiryo, imbaloma ndi mukheyembelela lwe bibiwaamba khu bulamu bweenywe, nga muloma muri, manya kane mulye shiina, namwe muri kane munywe shiina, namwe bye kumubili kweenywe muri kane mukwaare shiina ta. Buulamu sibuminyisa naabi biilyo, ni kumubili sikuminyisa naabi bikwaaro?

²⁶Ni mubone binywiinywi bye mu ngaaki; sibimiitsa, namwe byabuusanisila mu shiirara ta, ne Paapa weenywe uli mwikulu abiliisa. Inywe simuli be kumukaso naabi khufuura binywiinywi ibyo?

²⁷Naanu khwiinywe unyala khukhwilooselakho imbuka ifwiiti iri khu bulamu bweewe lwe khukhwiyembelela?

²⁸“Ne lwashiina mwiyembelela lwe bikwaaro? Ni mubone nga bimuli bye mwirome nga ni bitsowa, sibiraamba, namwe siibinabila bikwaaro ta.

²⁹Ne ise imbaboolela ndi, ikhaba Solomoni mu shiriifwa sheewe shoosi, s'akwaarakho nga shitweela khu bimuli bino ta.

³⁰Ne noola isaambo iyo niyo isi Wele akwaarisamo bunyaasi bwe mwirome, bubuuliwo buulamu shaleelo, ne kumukaamba bwaatuumibwa mu mulilo, s'alifuurira ilala khuubakwaarisa, inywe babaali ni khuufukiilila khufwiiti?

³¹“Ni nashiryo, mukheyembelela nga muloma muri, ne khunalya shiina? Namwe muri khunanywa shiina? Namwe muri khunakwaara shiina ta?

³²Lwekhuuba bibyeene ibyo nibyo byeesi Banaambo baweentsa, ni Paapa weenywe uuli mwikulu waamanya ari mubikana.

³³Ne ni munyoowe muweentse Buyiinga bweewe ni bukwalaafu bweewe, ni na bino byoosi alibibalooselakho nabyo.

³⁴Nashiryo, mukheyembelela bye kumukaamba ta, lwekhuuba shifukhu she kumukaamba shiri ni bye khukhwiyembelela byasho. Buli shifukhu shiri ni bisiro byasho bibishimala.