Read lumasaaba Matayo 7 Bible Online

Matayo 7 - lumasaaba bible

Matayo 7

¹“Mukhakhalila babaandu babaandi kumusaango ta, nio nanywe Wele alekhe khubakhalila ta.

²Lwekhuuba nanywe Wele alibakhalila kumusaango, musaambo nyene yeesi mukhalilamo babaandi. Ni shipimo sheesi muraambisa khuupimilamo babaandi nanywe nisho sheesi Wele alibapimilamo.

³“Iwe lwashiina ubona khaasosono khakhaali khu moni ya wandaayo, ne waalekha khwaambaasa khu kukyeenga kukuuli khu moni yoowo wamweene?

⁴Namwe unyala uryeena waaloma wandaayo uri, ‘Khayo ikhurusemo khaasosono khakhaali khu moni yoowo,’ ate nga iwe wamweene uli ni kukyeenga khu moni yoowo?

⁵Iwe umubeeyi, nyoowa urusemo kukyeenga kukuuli khu moni yoowo nio unyalise khuubona bulayi khaasosono khakhaali khu moni ya wandaayo.

⁶“Mukhawatsaka tsiimbwa shishiindu shikhosefu ta, naluundi mukhatuumila tsimbiitsi bibiindu byeenywe bye lisuno ta. Lwekhuuba ni mukhola muryo, nitso tsibisambakilila busa mu bikyele byatso, lwanyuma tsaashuukha tsaabalumaka.

⁷“Ni muloombe muliweebwa, muweentse mulinyoola, mukhoonyake lulwiitsi lulibekuliwilawo.

⁸Lwekhuuba buli uloomba afuna, uweentsa anyoola, ni nooyo ukhoonyaka lulwiitsi lumukulibwilawo.

⁹“Namwe muundu shiina mwiinywe, umwaana weewe n'amuloomba biilyo unyala waamuwa libaale?

¹⁰Namwe nga waamuloombile inyeeni, unyala waamuwa indemu?

¹¹Kale ni nanywe mumuuli babaandu baboonaki busa, mwaamanya khuuwa babaana beenywe biwaanwa bilayi, Paapa weenywe uuli mwikulu s'alifuura khuuwa biwaanwa bilayi isi ibo babaamuloomba ta?

¹²Ni nashiryo mu buli shiindu shoosi, ni mubirise babaandu babaandi isaambo isi mukana nibo bababirisemo inywe. Lwekhuuba shino nisho sheesi kamakaambila ka Musa ni khuuleekela khwe baŋoosi bimanyisa.

¹³“Ni mwinjile nga mubirira mu mulyaango kumufundeefu. Lwekhuuba kumulyaango kukuutsya mu khuhela kuli kumubalaayi, ni kumukhoosi kukuutsyayo kuli kumutsowe, ni naabo babaakukyendelakho bali bakali.

¹⁴Ne kumulyaango kukuutsya mu bulamu kuli kumufundeefu, ni kumukhoosi kukuutsyayo kuli kumunyelele, ni naabo babaakunyoola sibali bakali ta.

¹⁵“Ni mwiliinde baŋoosi be bubeeyi, babeetsila mu bikwaaro bye kamasheese isi muli ne nga mukari bali bitsuutse bye kumulyuulyu.

¹⁶Ne mulibamanyila khu byaamo byaabwe. Lwekhuuba babaandu sibanyala baabuta tsisabibu khu mawa ta, namwe sibanyala baabuta kimifiki khu mawa ta.

¹⁷Nasho shiryo, kuusaala kuulayi kwaanisakho bibyaamo bilayi, ni kuusaala kuubi nakwo kwaanakho bibyaamo biibi.

¹⁸Kuusaala kuulayi sikunyala kwaanakho bibyaamo biibi ta, ni kuusaala kuubi sikunyala kwaanakho bibyaamo bilayi ta.

¹⁹Buli kusaala kwoosi kukuukhaana bibyaamo bilayi, bakurema baakutuuma mu mulilo.

²⁰Ni nashiryo, mulibamanyila khu byaamo byaabwe.

²¹“Sishili bari buli muundu uwunaanga ise ari, ‘Umukasya, Umukasya,’ alinjila mu Buyiinga bwe mwikulu ta; khurusakho ibo babaakhola byeesi Paapa wase uli mwikulu akana.

²²Bakali baliinomela ise khu shifukhu she khuukhalikho kimisaango bari, ‘Umukasya, Umukasya, ifwe sikhwakholaatsaka buŋoosi mu lisiina lyoowo, luundi ni mu lisiina lyoowo lyeene khwawoonatsaka kimisaambwa kimibi kimikali, ni khukhola bye kamakaanga bikali?’

²³Ni nase abweene awo indibaboolela lubuula ndi, ‘Ise simbamanyatsakakho inywe ta! Inywe muli babaandu babaakhola bibyoonako, ni murure isi indi mutsye!’

²⁴“Aso, buli muundu uwulila bilomo byase bino, waabikholelakho, imufwaananisa nga umusaani umukyesi uwombekha intsu yeewe khu lwaanda.

²⁵Ifula ni yatsutsukha, kimikhulula kyeekha, ni mbewo yawuutsa naabi, byakhupa intsu iyo. Ne niyo yaalekha khukwa ta, lwekhuuba luwoongwa lwayo lwaba khu lwaanda.

²⁶Ne buli mutweela uwulila bilomo byase bino, ne waalekha khubikholelakho nga ni biloma ta, imufwaananisa nga umusaani umusilu uwombekha intsu yeewe khu muyekhe busa.

²⁷Lwanyuma ifula ni yatsutsukha, kimikhulula kyeekha, imbewo yaawuutsa naabi, byaakhupa intsu iyo, nayo yaakwa, ni kumuwuulo kwayo kwaba kumuboofu naabi.”

²⁸Ulwo Yesu n'amala khuukanikha bilomo bino, kamatuuli ke babaandu kelaliila busa lwe saambo isi aaleekelamo,

²⁹lwekhuuba niye aaleekela nga niye umweene bunyala, ne akhuba nga baleekeli baabwe be kamakaambila ka Musa ta.