Read lumasaaba Matayo 8 Bible Online

Matayo 8 - lumasaaba bible

Matayo 8

¹Yesu n'ekha khukhwaama khu lukiingi, kamatuuli makali ke babaandu kamuloondakho.

²Aabawo umusaani uwaba walwaala bulwaale bwe bikeenge.[3] Umweene yuno weetsa isi Yesu waafukhama aasi, waamuloma ari, “Umukasya noola ukana, unyala khukhuumpyeluusa.”

³Yesu wenyusa kumukhono kweewe wamuwaambakho, nga aloma ari, “Ilala ise ingana; n'upyeluukhe.” Lubaluba umusaani wawonesebwa bikeenge.

⁴Lwanyuma Yesu wamuloma ari, “Bona uri s'uboolelakho umuundu yeesi ta, ne n'utsye w'omusaayi wiyokesane, uweyo shiwaanwa sheesi Musa alakila, shibe shishiŋaŋasa isi babaandu.”

⁵Yesu n'enjila mu Kaperunaumu, umusilikhale umukhulu Umu Roma waamwiitsayo, waamuloomba buyeeti nga aloma ari,

⁶“Musakhulu, umwakaanisi wase waakonele mu ntsu, wakataala, ali ni butsiina bukali.”

⁷Yesu waamwiilamo ari, “Kane niitse imuwonese.”

⁸Ne umusilikhale yuno waamuloma ari, “Umukasya, sishintsakhila iwe khukhwiitsa mu ntsu yase ta. Ne loma bulomi ilomo, n'umwakaanisi wase kane awone.

⁹Lwekhuuba ise nase indi umuundu uuli aasi e bakhulu, ni nase indi ni basilikhale babaali aasi aase. Ne ni noma mutweela ndi, ‘Tsya,’ naye atsya; n'ukuundi ndi, ‘Yiitsa,’ naye eetsa. Ise inoma umukulwa wase ndi, ‘Khola shino,’ naye ashikhola.”

¹⁰Ne Yesu n'awulila isho, weyaanga naabi, waaloma babaandu babaamuloondelela ari, “Ilala imbaboolela ndi, ishiili khubonatsakakho umuundu uli ni khuufukiilila nga khuno, ikhaba ni mu Isiraeli mwoosi ta.

¹¹Luundi imbaboolela ndi, babaandu bakali baliitsa nga baama ibwamanyaanga ni bukwanyaanga, bekhale atweela ni Iburayimu, ni Isaaka, ni Yakobo, khu mayiiya mu Buyiinga bwe mwikulu.

¹²Ne ibo babaandibeele babeene be Buyiinga, balituumibwa ibulafu mu shilima she antsye, ibweeneyo ilibayo khulila ni khukhwilumaka kameeno.”

¹³Lwanyuma Yesu waaloma umusilikhale umukhulu ari, “Tsya ingo, sheesi iwe ufukiililamo kane shikholikhe nga iwe n'ufukiilila.” N'umwakaanisi weewe waawonelawo mu saawa nyeneyo.

¹⁴Ne Yesu n'enjila mu ntsu ya Petero, waabona maayi umumasaala uwa Petero nga waakonele mu bulili lwekhuuba aaba walwaalile kamayima.

¹⁵Waamuwaamba khu mukhono, ni kamayima kaamururakho, wenyukha waawa Yesu she khulya.

¹⁶Ne antsye ni bwelabula, baamureerera babaandu bakali babaaba bataambisibwa ni kimisaambwa, naye aryo waawoona kimisaambwa ikyo nga araambisa shilomo, luundi nga awonesa boosi babaaba balwaale.

¹⁷Shino aashikhola khukhwoolelesa shishalomebwa n'umuŋoosi Yisaaya shiri, “Niye umweene aayila butsiina bweefwe, waasuta ni tsindwaale tseefwe.”

¹⁸Yesu n'abona kamatuuli ke babaandu nga kamwibotokhelela, waalakila baleekelwa beewe ari bambukhe shanjelekha we inyaantsa.

¹⁹Lwanyuma umuleekeli we kamakaambila weetsa is'ali waamuloma ari, “Umuleekeli, kane ikhulondelelatsake buli oosi isi kane utsyatsake.”

²⁰Yesu waamwiilamo ari, “Tsishipwe tsili ni kamalowo kaatso, ni binywiinywi bye mu ngaaki bili ni biiswi byabyo, ne Umwaana w'Omuundu s'ali ni isi anyala waara ni kumurwe kweewe ta.”

²¹Umuleekelwa ukuundi waamuloma ari, “Umukasya, n'undekhe inyoowe intsye isiikhe paapa wase nio.”

²²Yesu waamwiilamo ari, “Inoondelele, ulekhe baafu basiikhe baafu baabwe.”[4]

²³Lwanyuma Yesu waaniina mwikhoŋolo, ni baleekelwa beewe baamuloondakho.

²⁴Lubaluba abalukhawo ikhuungu iye kamaani yeetsa yawuutsa khu nyaantsa, ni kameetsi kaatirira naabi keenga khumila ni likhoŋolo. Ne Yesu aba ali mwiilo akona.

²⁵Baleekelwa baatsya baamusisimusa nga baloma bari, “Umukasya, khuwonese, khwahela!”

²⁶Yesu waabaloma ari, “Lwashiina muba ni khuurya khukali, inywe babaali ni khuufukiilila khufwiiti?” Aryo wenyukha waakhookhela imbewo ni khuutumbuukha khwe inyaantsa, aryo abawo khuukwalaala khukali.

²⁷Basaani tsana beyaanga busa nga baloma bari, “Musaani shiina yuno? Bona imbewo ni khuutumbuukha khwe inyaantsa nabyo bimuwulila!”

²⁸Ne Yesu n'ola shanjelekha she inyaantsa mu shaalo she Bagerasene, basaani babili abe babataambisibwa ni kimisaambwa baamwakaanana, nga baama mu mafuluma keesi basiikhatsakamo baafu. Basaani bano babaabakho kimisaambwa kimibi nga bali barafu naabi, nga mbaawo n'umuundu ubirirakho mu ntsila iyo ta.

²⁹Boombi baalomela angaaki ni likono likali bari, “Iwe Umwaana wa Wele, ukhufunisa ifwe shiina? Weetsile khuukhuwa shitaambiso nga isaawa inyene ishiili khukhwoola ta?”

³⁰Khukhwaama isi baaba, aleeyikho khakyeekhe, aabawo likana lye tsimbiitsi tsingali nga tsaaya.

³¹Kimimakoombe kyekontselela Yesu kiri, “Noola ukhuwoona, ukhusindikha khutsye mu likana lye tsimbiitsi.”

³²Naye Yesu waakilomela ari, “Tsya!” Nakyo kyaarura mu basaani, kyaafulumukha kyaweela mu mbiitsi, ni likana lyoosi lyaarindimukha, lyaselengela ilumya, lyaweela mu nyaantsa, lyahelela mu meetsi.

³³Babaayi be tsimbiitsi baatitukha, baatsya mu shiriimba, baaboola kamakhuuwa koosi, ni nebyo bibyakholekha khu basaani baabili, babaaba bataambisibwa ni kimisaambwa.

³⁴Baryo babaandu boosi be mu shiriimba isho beetsa khukhwakaanana Yesu, ne ni bamubona, bamwikontselela bari arure mu shisiintsa shaawe.