Read lumasaaba Mako 1 Bible Online

Mako 1 - lumasaaba bible

Mako 1

¹Khuno nikhwo khuurakikha khwe Kamakhuuwa Kamalayi, kakawaamba khu Yesu Kristo, Umwaana wa Wele.

²Kaarakikha nga ni shanyoowa khuuronebwa mu shitabo sha Yisaaya umuŋoosi shiri, “Bona, ise indirumana umurume wase, ukhaakhunyoowe iwe ibweeni woowo, khuukhuŋoonaŋoonela iwe intsila yoowo.

³Iliyo likono ly'oyo ukuukuulila angaaki mu mubiimbi ari, ‘Ni muŋoone kumukhoosi kw'Omukasya naluundi ni mukwalaase tsintsila tseesi atsya khukyendelakho.’ ”

⁴Yokana Umubatisa aabonekhela mu mubiimbi nga abatisa babaandu, naluundi nga akuukuula ari babaandu bafune khuubatisibwa khwe khukhwibiiyisa bibyoonako nio akile beyakhilwe bibyoonako byaabwe.

⁵Kila babaandu bakali khukhwaama mu Yuda ni khukhwaama mu shiriimba she Yerusalemu, baatsya khurekeeresa byeesi Yokana aaba nga aloma. Nga beetsile isi Yokana, bebiiyisa bibyoonako byaabwe, aryo naye waababatisila mu luutsi Yorudaani.

⁶Yokana Umubatisa aakwaaratsaka tsingubo tseesi baanaba khukhwaama mu bwooya bwe iŋamya, naluundi abe ebowa kumusipi kwe lukhoba mu shikuute. Biilyo byeewe byaba tsisike ni bubuushi bwe intsukhi iye mwirome.

⁷Yokana aakuukuula buurume bweewe nga aloma ari, “Iliyo umuundu uli khukhwiitsa inyuma wase, uli uwe angaaki khukhuminyisakho ise. Ni nase sinakhila khukhwinama aasi nakangulula lukhoba lwe bilaalo byeewe ta.

⁸Ise imbabatisa inywe ni kameetsi, ne uyo niye alibabatisa inywe n'Umwoyo Umukhosefu.”

⁹Mu bifukhu byeene ibyo, Yesu weetsa nga aama mu shisiintsa she Nazareesi, shishaba mu Galilaaya. Yokana Umubatisa waamubatisila mu luutsi Yorudaani.

¹⁰Khaangukho Yesu n'aama mu meetsi, waabona likulu nga lyaabayuukhile, n'Umwoyo Umukhosefu nga afwaana nga liwuusi, nga amwikhakho.

¹¹Likono lyaarura mwikulu nga liloma liri, “Iwe niye Umwaana wase yeesi ise ingana naabi. Ise ikhwikhoyela iwe naabi.”

¹²Kamaani k'Omwoyo Umukhosefu kaakila waatsya mu mubiimbi.

¹³Waamenya mu mubiimbi khuumala bifukhu kamakhumi kane, nga Sitaani amukhakilisa; waabatsaka ni tsisolo tse mwirome, ni bamalayika baaba nga bamuyeetatsaka.

¹⁴Lwanyuma nga baamalile khuwaamba Yokana Umubatisa ni khuumubowa mu mapuusu, Yesu waatsya i Galilaaya nga aleekela babaandu kamakhuuwa kamalayi, kakaama isi Wele,

¹⁵nga aloma ari, “Isaawa inyene yoolele, ni Buyiinga bwa Wele bwoolile ambi. Ni mwibiiyise bibyoonako byeenywe, naluundi mufukiilile Kamakhuuwa Kamalayi.”

¹⁶Yesu n'aba nga abira khu ndulo khwe inyaantsa isi balaanga bari Galilaaya, waabona Simoni ni yaaya weewe Andereya. Baaba balikho baraambisa butiimba khuwaamba tsinyeeni, khulwekhuuba baaba balobi be tsinyeeni.

¹⁷Kila Yesu abaloma ari, “Ni mwiitse munoondelele ise, ni nase indibakalusa mwikyele babaareera babaandu isi ise indi.”

¹⁸Khaangukho baalekha butiimba bwaabwe, baloondelela Yesu.

¹⁹Yesu n'elooselayo iburaangisi khafwiiti, waabona be buulebe babili Yakobo ni Yokana, nga boombi bali babaana ba Zebedaayo. Baaba bali mu likhoŋolo nga baŋoonaŋoona butiimba bwaabwe.

²⁰Khaangukho Yesu wabalaanga. Baryo balekha paapa waabwe Zebedaayo nga ali mu likhoŋolo ni baraambi, nibo baloondelela Yesu.

²¹Yesu ni baleekelwa beewe belooselayo iburaangisi, boola mu shiriimba shishilaangibwa shiri Kaperunaumu. Ne shifukhu sha Sabato ni shoola, Yesu wenjila mu ntsu iye khukhwisaayilamo waleekela babaandu Ilomo ya Wele.

²²Babaandu babaaba bamurekeeresa beyaanga naabi indeekela yeewe, khulwekhuuba niye aleekela nga okesanisa bunyala, walekha khuuba nga baleekeli be kamakaambila ka Musa ta.

²³Khaangukho, abawo umuundu uwabakho shisaambwa shiibi, uwenjila mu ntsu tsana iye khukhwisaayilamo.

²⁴Kila umuundu tsana walilila angaaki nga aloma ari, “Iwe Yesu uwe Nazareesi, ifwe ukhufunaana shiina? Iwe wetsile khukhuhesa ifwe khuwewo? Ise nakhumanyile iwe! Iwe uli Umukhosefu uwama isi Wele.”

²⁵Yesu waakhookhela shisaambwa shiibi shatsana nga aloma ari, “Sila busa! Rura khu musaani uyu!”

²⁶Shisaambwa shiibi tsana shaakhola umusaani uyo waabalikha, shaalila ni likono lye angaaki, lwanyuma shaamururakho.

²⁷Babaandu boosi beyaanga, belomela bonyene na bonyene bari, “Shiina shino? Khuno khuuleekela khushaakha abe khweesi khushiili khubonatsakakho ta! Umuundu yuno ali ni bunyala bwe khuulakila akhaba ni kimisaambwa kimibi kyaamuwulila?”

²⁸Ni abweene awo lubuyi luluwaamba khu Yesu lwaamalatana mu byaalo bibibotokhelele Galilaaya.

²⁹Khaangukho, Yesu nga ali atweela ni baleekelwa beewe, nga nibo Yakobo ni Yokana, waarura mu ntsu iye khukhwisaayilamo, baatsya benjila mu ntsu iya Simoni ni Andereya.

³⁰Banyoola nga maayi umumasaala, uwa Simoni nga ali umutsiina, abe waakonele aasi khulwe kamayima. Khaangu baboolela Yesu khu mulwaale yuno.

³¹Kila Yesu atsya isi umutsiina, amuwaamba kumukhono amwinyusa. Ni kamayima kawona, ari uyo uwaba umutsiina tsana waba niye ubakholela she khulya.

³²Ni angoloobe awo nga inyaanga yakwiile, baareerera Yesu babaandu boosi babaaba nga bali batsiina, ni naabo babaaba bawaambibwa ni kimisaambwa kimibi.

³³Babaandu be mu shiriimba boosi babuusanila i mulyaango kwe intsu yeesi abamo.

³⁴Yesu waawonesa babaandu bakali babaaba batsiina be tsindwaale tse tsisaambo tsingali, naluundi waawoona khu baandu bakali kimisaambwa kimibi, nga s'akifukiilila kyaloma n'ilomo ta, khulwekhuuba abe kyamumanya.

³⁵Ne mamilimili khu shifukhu shishelakho, nga antsye ashiili amali, Yesu wenyukha waarura mu ntsu waatsya. Watsya mu shifo shishitalile shonyene nga mbaamo babaandu ta, waloombelayo.

³⁶Kila Simoni ni baashe beesi aba ni nabo baatsya nga baweentsa Yesu.

³⁷Ne ni baamunyoola baamuloma bari, “Buli muundu alikho akhuweentsa.”

³⁸Yesu wabeelamo ari, “Khayo khutsye mu biriimba bibiindi bibiili aambi ano, nio inyalise khuleekela ibweene iyo nayo kamakhuuwa kamalayi; khulwekhuuba shino nisho sheesi ise netsilila.”

³⁹Aryo waatsya nga ebotokhelela mu Galilaaya mwoosi, nga aleekela mu ntsu tsye khukhwisaayilamo, naluundi nga awoona kimisaambwa kimibi khukhwaama khu baandu.

⁴⁰Aabawo umusaani uwaba ni bikeenge uweetsa isi Yesu, waafukhama aasi, waamwikontselela, nga aloma ari, “Noola ukana, unyala khukhumpyeluusa.”

⁴¹Yesu waamuwaambila shiisa, wenyusa kumukhono kweewe, wamutiilakho, nga aloma ari, “Ee, ingana upyeluukhe! N'upyeluukhe.”

⁴²Lubaluba, bikeenge byarura khu musaani, waba nga wapyeluukhile.

⁴³Wangu Yesu wamusiibula khuutsya,

⁴⁴ne nga amukhonyakilila ari, “Ukhaboolelakho umuundu yeesi shishiindu shoosi ta! Ne akhali n'utsye wiyokesanise isi umusaayi, akhwimenielese. Lwanyuma, khukhwokesanisa babaandu uri waawonisibwile, uwaaneyo shiwaanwa she khuupyeluusibwa, nga Musa n'alakila.”

⁴⁵Ne umusaani uyo n'arurawo waatsya, waasalanisa tsilomo tsino buli aandu oosi. Shino shaakila Yesu waalekha khutsya mu shiriimba shoosi lubuula ta; ne akhali waarama mu mubiimbi; ni babaandu babaama mu bisiintsa bibikhali bitweela ta, baatsya is'ali.