Read lumasaaba Mako 10 Bible Online

Mako 10 - lumasaaba bible

Mako 10

¹Yesu n'arura awo waatsya i Yuda, naluundi wambukha shanjelekha we luluutsi Yorudaani. Indi luundi kamatuuli ke babaandu kabuusanila isi aba; ne nga ni yaba isaambo yeewe, indi luundi Yesu weloosela khubaleekela.

²Aabaawo Bafarisaayo babaakana khuukhakilisa Yesu. Kila bamureeba bari, “Shifukiilisibwa mu makaambila keefwe umusaani khuuloba umukhasi weewe waamuwoona waatsya?”

³Yesu waabareeba ari, “Ne mu makaambila Musa aabalakila khuukhola muryeena?”

⁴Beelamo bari, “Musa afukiilila umusaani khuurona buurone bwe khuuwoona umukhasi, lwanyuma waawoona umukhasi khuutsya.”

⁵Ne Yesu wabeelamo ari, “Musa aarona aryo likaambila khulwekhuuba kimyoyo kyeenywe sikilekikhila ta.

⁶Ne busa khukhwaamila ilala makiboole ke khubuumbibwa khwe shiibala, ‘Wele aabuumba boombi, umusaani n'umukhasi.

⁷Ni khulwe ilomo yino, umusaani alekha paapawe ni maayi weewe, waatsya waayila umukhasi.

⁸Niye n'umukhasi weewe bekyela nga umuundu mutweela.’ Ni nashiryo baba sibashiili babili ta, ne njeeba baba bekyelile kumubili mutweela.

⁹Nashiryo sheesi Wele amalile khutubaasa atweela, umuundu yeesi s'akha washawukhanisa ta.”

¹⁰Nga bamalile khukhwilayo mu ntsu, baleekelwa beewe bamureeba luundi khu biindu bibiwaamba khu lomo yino.

¹¹Yesu waabaloma ari, “Buli muundu yeesi uloba umukhasi weewe waamuwoona, naluundi waayila umukhasi ukuundi, aba wasaalile kumusaango kwe khuumulekha niye, waatsya waakhola buyeyani.

¹²Namwe umukhasi uloba umuseetsa weewe waatsya wakhwaalikha khu museetsa ukuundi, umukhasi uyo aba wasaalile kumusaango kwe khuukhola buyeyani.”

¹³Aabawo babaandu babaareera babaana bafwiiti bari Yesu abarekho kamakhono nga abawa tsikhabi. Ne baleekelwa beewe baarafuyila abo babaareera babaana.

¹⁴Ne Yesu n'abona shino shaalekha khumusangaasa ta, kila abalomela ari, “Ni mulekhe babaana bafwiiti beetse isi ndi, mukhabakhaangabisa ta; khulwekhuuba Buyiinga bwa Wele buli bwe babaandu babafwaanana nga bano bari.

¹⁵Ilala, imbaboolela ndi, umuundu yeesi n'akhakaanila Buyiinga bwa Wele nga umwaana umufwiiti n'akhola, s'alibwingilamo ta.”

¹⁶Yesu wahaamba babaana mu makhono keewe, waabawa tsikhabi, nga abarakho kamakhono.

¹⁷Yesu n'aba nga ali khu ntsila atsya, aabawo umusaani mutweela uweetsa butima, waafukhamila mu moni tsa Yesu, waareeba ari, “Iwe Umuleekeli umulayi, ikhole shilayi shiina nio ningile mu bulamu bubuukhawawo ta?”

¹⁸Yesu waamureeba ari, “Lwashiina unaanga uri indi umulayi? Mbaawo umuundu umulayi ta, akhali Wele yenyene.

¹⁹Iwe wamanya kamakaambila ni kali: ‘Ukheera ta, ukhayeyana ta, ukheeba ta, ukhaapa umuundu washoowo liyino ta, ukhalyakhana ta, yiisatsakamo paapawo ni maayiwo shiriifwa.’ ”

²⁰Umusaani tsana welamo Yesu ari, “Umuleekeli, ise khukhwaama mu bwaana bwase, nawaamba kamakaambila ako koosi.”

²¹Yesu wamulolelela, waamukana isaambo yeesi elamo. Kila alomela umusaani tsana ari, “Utaambakho shishiindu shitweela shonyene. N'utsye ingo woowo, ukulise bibiindu byoowo byoosi byeesi uli ni nabyo, tsinusu tsitsyamamo utsikabile bataambi, nio unyalise khuuba ni buyiindifu mwikulu. Lwanyuma wiitse unondekho.”

²²Ne umusaani n'awulila bino, waawamo kamaani naluundi waatsya nga wakhalale. Khulwekhuuba aaba umusaani umuyindifu naabi.

²³Lwanyuma Yesu webotokhelesa tsimoni mu baleekelwa beewe, waabaloma ari, “Nga shili shihangafu abo babaali ni buyiindifu khukhwinjila mu Buyiinga bwa Wele!”

²⁴Bilomo bino byeyaangisa baleekelwa beewe. Ne Yesu weloosela ari, “Baana baase, nga shili shihangafu khukhwinjila mu Buyiinga bwa Wele![15]

²⁵Shili shishaangu iŋamya khuubirira mu mwaanya kwe mbiso, khufuurisa umuundu umuyindifu khukhwinjila mu Buyiinga bwa Wele.”

²⁶Shino shabeyangisa ni khufuurisakho, kila bereeba bonyene bari, “Naanu unyala khuwonesebwa?”

²⁷Yesu wabalolelela, kila aloma ari, “Khusintsilila khu baandu ni bashilolelela seshinyalikha ta. Ne khusintsilila khu Wele shinyalikha, khulwekhuuba mbaawo shishinyala shakhaasa Wele ta.”

²⁸Petero wamuloma ari, “Bona ifwe khwalekha bibiindu byoosi khwetsa khukhulondelela iwe.”

²⁹Yesu wamwilamo ari, “Ilala, mbaboolela ndi, buli umuundu yeesi uwalekha be shikuuka sheewe, namwe babandaaye beewe ni bakooko, namwe maayi weewe, namwe paapa weewe, namwe babaana, namwe liiswa, khulwe khubeela ise ni khulwe khubeela Kamakhuuwa Kamalayi,

³⁰alifuna kumukheemba. Kumukheemba kuno akufuna ari mu bulamu buno nga aweebwa babandaaye ni bakooko ni bamaayi ni babaana ni kamaswa, khukhupanisamo kimiluundi shitoondo shitweela, ni mu muboolo kukwiitsa, alifuna buulamu bubukhawawo ta.

³¹Ne babaandu bakali babaali babanyoowa ari, baliba babamalilisayo, ni babamalilisayo ari, baliba nibo babanyoowa.”

³²Ni baaba nga bali khu ntsila baniina i Yerusalemu, Yesu wabaraangilila, baleekelwa beewe ni babaandu babaandi babamuloondakho baarya naabi. Yesu indi luundi weesa andulo baleekelwa beewe, wananikha khubaboolela bibiindu abe bibiitsya khumubakho.

³³Wabaloma ari: “Ari khulikho khuniina i Yerusalemu; ne nga khwoolile iyo, Umwaana w'Omuundu kane bamuwaaneyo mu makhono ke basaayi bakhulu ni baleekeli be Kamakaambila ka Musa. Kane bamukhalile kumusaango kwe khuufwa, lwanyuma bamuwaaneyo isi Banaambo.[16]

³⁴Banaambo bano balimubirisa buubi, bamufuutsile kamare, bamukhupe, nio bamwiire. Lwanyuma lwe bifukhu bitaru alilamukha khukhwaama mu bafu.”

³⁵Yakobo ni Yokana, babaana ba Zebedaayo, baatsya isi Yesu baamuloomba bari, “Umuleekeli, iliwo sheesi khulikho khukhuloomba ukhukholele.”

³⁶Kila abareeba ari, “Mukana imbakholele shiina?”

³⁷Beelamo bari, “Nga wolile mu Buyiinga bwoowo bwe shiriifwa, khufukiilile ifwe khukhwikhala ni nawe, mutweela khu mukhono kwoowo kumulayi ukuundi khu munyeletsi.”

³⁸Ne Yesu wabeelamo ari, “Inywe sheesi mulikho muloomba simwashimanyile ta. Inywe munyala khuunywa khu shikopo she butsiina[17] sheesi ise intsya khunywakho? Namwe inywe munyala mwafuna khuubatisibwa khweesi ise intsya khubatisibwamo?”

³⁹Bamwiilamo bari, “Ee, khunyala.” Kila Yesu abalomela ari, “Shikopo sheesi intsya khunywakho, ni nanywe mulinywakho; akhaba ni khubatisibwa khweesi ise intsya khufuna, ni nanywe muli khufuna.

⁴⁰Ne bye khubafukiilila khukhwikhala oba khu mukhono kwase kumulayi namwe kumunyeletsi, ibyo sibili ise niye ukhalawo ta. Ibyo bamala khubiŋoonaŋoonela babeene babyo.”

⁴¹Baleekelwa babaramile liikhumi ni bawulila shino, bakhalalila Yakobo ni Yokana.

⁴²Ne Yesu walaanga baleekelwa beewe boosi atweela kila aloma ari, “Mwamanya nga abo babaali bawuli mu Banaambo ni babayila ni kamaani. Naluundi baraangilisi baabwe be angaaki babalikho ni bunyala.

⁴³Ne mus'iinywe, shikhaba shiryo ta; khayo buli ukana khuuba umuraangilisi mus'iinywe, abe niye umwakaanisi wenywe.

⁴⁴Uyo ukana khuuba unyoowa mwiinywe, aakha khuuba niye umwakaanisi uwa boosi.

⁴⁵Khulwekhuuba Umwaana w'Omuundu eetsa khuuba umwakaanisi, ne akhuba indi abewo babamwakaanisa niye ta. Naluundi eetsa khuwaanayo bulamu bweewe nga nibwo bubusikula babaandu bakali.”

⁴⁶Yesu atweela ni baleekelwa beewe, ni lituuli lye babaandu bakyeenda boola i Yeriko. Ni baaba nga baama i Yeriko batsya, umubofu abe usabilisa bibiindu, bari Batimayo, nga ali umwaana uwa Timayo, waba abe wekhaale khu ndulo khwe intsila.

⁴⁷Ne n'awulila ari Yesu uwe i Nazareesi niye uli khubira, kila arakikha khukuukuulila angaaki nga aloma ari, “Yesu, umwitsukhulu uwa Dawudi, n'umambile shiisa!”

⁴⁸Babaandu bakali bamukhookhela bari, “Sila busa.” Ne niye weloosela ni khulookha khuminyisakho nga aloma ari, “Umwitsukhulu uwa Dawudi, n'umambile shiisa.”

⁴⁹Yesu wema kila aloma ari, “Ni mumulaange etse.” Kila bamulaanga nga baloma bari, “Alikho akhulaanga. Yiitsa, ukharya ta!”

⁵⁰Batimayo watuuma ingubo yeewe, wenyukha waatsya isi Yesu.

⁵¹Yesu waamureeba ari, “Ukana ikhukholele shiina?” Naye welamo ari, “Umuleekeli, ingana tsimoni tsase tsibimbukhe, imbone.”

⁵²Yesu waamuloma ari, “N'utsye, khulwekhuuba lwe khufukiilila khwoowo wawonisibwile.” Ni abweene awo tsimoni tseewe tsaabimbukha waarakikha khuubona, waalondelela Yesu.