Read lumasaaba Mako 11 Bible Online

Mako 11 - lumasaaba bible

Mako 11

¹Yesu ni baleekelwa beewe baaba nga bali aambi ni Yerusalemu, nga boolile i Betifage shishiili aambi ni Besaniya, khu lukiingi lwa Zeyituni, warumana babili khu baleekelwa beewe ibweeni.

²Wabaloma ari, “Ni mutsye mu shaalo shishibali iburaangisi, kane munyoole isikilya inyana, yeesi umuundu yeesi akhekhalatsakakho ta, mukikangulule mukirere ano.

³Ne umuundu yeesi n'abareeba ari, ‘Shiina kila mukangulula isikilya iyo?’ Mumulomela muri, ‘Umukasya alikho akikana. Kane akikobose lwanyuma lwayo.’ ”

⁴Baleekelwa baatsya banyoola isikilya baakibowele imulyaango we intsu, aambi ni kumukhoosi, baakikangulula.

⁵Kila babaandu abe babemikhile aambi baabareeba bari, “Shiina kila mulikho mukangulula isikilya iyo?”

⁶Bababoolela sheesi Yesu abalomela khukhwilamo, abo babaaba awo, baabalekha baatsya ni sikilya.

⁷Baleekelwa baayila isikilya iyo isi Yesu, baakirakho bikwaaro byaabwe khu mukoongo, waakiikhalakho.

⁸Babaandu babaandi baakali busa baala bikwaaro byaabwe khu mukhoosi, ni babaandi baala aasi kamasaafu ke bisaala keesi baarema khu misaala.[18]

⁹Babaandu babaaba ibweeni wa Yesu ni naabo babaaba baamuloondilekho, abe balikho bakuukuulila angaaki bari, “Hosana! Nga ali ni ikhabi uyo uwiitsa mu lisiina ly'Omukasya.

¹⁰Buyiinga bwa kuuka weefwe Dawudi, bubuuli khukhwiitsa buli ni ikhabi. Hosana mu ngaaki mwikulu!”

¹¹Yesu wenjila mu Yerusalemu, lwanyuma waatsya mu Lisaayilo Likhulu. N'amala khukhwofwaasa naluundi wemenielesa buli shitweela, waarura ibulafu, atweela ni baleekelwa beewe baatsya i Besaniya, khulwekhuuba abe antsye bulikho bwilabula.

¹²Ni bwasha shifukhu shishelakho nga baama i Besaniya, Yesu abe intsala ilikho imulya.

¹³Ne niye n'abonela kusaala ku figi khukhwaama aleeyi nga kulikho kamasaafu, Yesu waakutsya aambi nga ambaasa ari kane anyoolekho bibyaamo alye. N'akwolakho, wanyoola nga mbaakho shishiindu ta, akhali kamasaafu konyene, khulwekhuuba yino siyaba imbuka iye kusaala kuno khurakho bibyaamo ta.

¹⁴Kila Yesu akutsuba nga akulomela ari, “S'ukane wanatsakekho bibyaamo ta, naluundi mbaawo umuundu yeesi ulilyakho khu bibyaamo byoowo ta!” Baleekelwa beewe bawulila nga n'aloma shino.

¹⁵Yesu ni baleekelwa beewe ni boola i Yerusalemu, wenjila mu Lisaayilo Likhulu. Waarakikha khuutimisa abo babaaba mukari nga bakulisa bibiindu, ni nabo babaaba nga bakula. Waafumalikhaka tsimeetsa tsy'abo babaaba nga bayuusaŋana tsinusu, ni bitsoloŋo byaabo babaaba nga bakulisa kamawuusi.

¹⁶Waalekha khufukiilisa umuundu yeesi khuubirisila shishiindu shoosi mu Lisaayilo Likhulu ta.

¹⁷Lwanyuma kila arakikha khuuleekela babaandu nga aloma ari, “Bibyaronebwa bikhosefu biloma biri, ‘Intsu yase ililaangibwa iri intsu yeesi kamanaambo koosi kaloombelamo.’ Ne ari inywe mwakishuusa mwakikesa nimwo mweesi babiifwi bebisa.”

¹⁸Ne basaayi bakhulu ni baleekeli be Kamakaambila ka Musa ni baawulila bino, baarakikha khuukhala kamakyesi ke khumwiira. Shino shaba abe khulwekhuuba barya Yesu, isaambo yeesi abe babaandu boosi beyaanga isaambo yeesi abe aleekelamo.

¹⁹Angoloobe ni oola, Yesu ni baleekelwa baarura baatsya ibulafu we shiriimba.

²⁰Ni bwasha kumutikhinyi, baleekelwa ni baaba nga babira, baabona bari kusaala ku figi tsana kwoomile, ni tsiindi tseene.

²¹Petero washebulila sheesi Yesu aaloma, kila amuloma ari, “Umuleekeli bonakho! Kusaala ku figi kweesi watsubile ingoloobe kwomile.”

²²Yesu wabeelamo ari, “Ni mube ni khufukiilila mu Wele.

²³Ilala, imbaboolela indi ni muba ni khufukiilila, mwalekha khubamo ni khukhwikanakana mu myoyo kyeenywe ta, ne mwafukiilila muri sheesi muloma kane shikholikhe, munyala mwaalomela lukiingi luno muri, ‘Khuulikha ano utsye ukwe mu nyaantsa,’ ilala shilikholikha.

²⁴Ni nashiryo, imbaboolela indi, buli shoosi sheesi musaba khuubirira mu khuloomba, ni mufukiilile muri mwaamalile khaale khushifuna, ilala kane mushifune.

²⁵“Ne busheele n'uba nga uloomba, yiyakhila uyo yeesi uwakhukholakho buubi; nio Paapa woowo uli mwikulu naye anyalise khukhwiyakhila iwe bibyoonako byoowo.

²⁶Ne n'ulekha khukhwiyakhila bashoowo, akhaba Paapa woowo uuli mu ngaaki naye singane akhwiyakhile bibyoonako byoowo ta.”[19]

²⁷Yesu ni baleekelwa beewe ndi luundi baakobola i Yerusalemu. N'aba nga alikho akyeenda mu Lisaayilo Likhulu, basaayi bakhulu ni baleekeli be Kamakaambila ka Musa, ni basakhulu beetsa is'ali.

²⁸Baamureeba bari, “Uli na bunyala shiina khuukhola bibiindu bino? Namwe naanu niye uwakhuwa iwe bunyala bwe khuubikhola?”

²⁹Yesu wabeelamo ari, “Ise inabareeba inywe shireebo shitweela shonyene; nga mwantsililemo, kane nase imbaboolele esi namisa bunyala bwe khukhola bibiindu bino.

³⁰Ni mumboolele: bunyala bwa Yokana Umubatisa bwe khubatisa babaandu, bwama mwikulu, namwe bwama mu baandu?”

³¹Kila bareebana bonyene nga baloma bari, “Ni kane khulome khuri, ‘Bunyala bwama mwikulu,’ kane Yesu akhureebe ari, ‘Ne shiina kila mukhafukiilila byeesi Yokana aloma?’

³²Namwe ni khuloma khuri, abwamisa mu baandu, babaandu boosi bashimanya bari Yokana Umubatisa aba umuŋoosi umweene.”

³³Kila khulwe khuurya babaandu belamo Yesu nga baloma bari, “Sikhumanya ta.” Yesu naye wabeelamo ari, “Nase singene imbaboolele esi ise namisa bunyala bwe khukhola bibiindu bino ta.”