Read lumasaaba Mako 13 Bible Online

Mako 13 - lumasaaba bible

Mako 13

¹Ne Yesu n'aba nga alikho arura mu Lisaayilo Likhulu atsya, mutweela khu baleekelwa beewe wamwokesa ari, “Umuleekeli, bona kamabaale ako nga kamiliya, ni bibyombakhe ibyo bona nga byamiliya!”

²Yesu waamwilamo nga areeba ari, “Waboone bibyombakhe biboofu ibyo? Byoosi balibyoonakisa, ilekhe khubawo ni libaale na litweela lilirama nga lyemile khu lyashe ta.”

³Lwanyuma Yesu n'aba nga wekhaale khu lukiingi lululaangibwa luri Zeyituni, nga shanjelekha walolelele Lisaayilo Likhulu, Petero ni Yakobo, ni Yokana, ni Andereya, baatsya khuumureeba mu shimoonyo.

⁴Baamureeba bari, “N'ukhuboolele, bibiindu bino byeesi ukanikhilekho, bikhakholikhe liina? Khabonelo shiina khakhaalikholikha khukhwokesanisa khali bili aambi khuukholikha?”

⁵Yesu waabaloma ari, “Ni mwiliinde, umuundu yeesi alekhe khubakoraanisa ta.

⁶Ilibawo bakali babaaliitsa mu lisiina lyase, nga baloma bari, ‘Ise niye Kristo,’ ni ilala balikooranisa babaandu bakali.

⁷Ne ni muwulila bari busoolo bwakwilewo, namwe bari busoolo bukana khukwawo, mukhaba ni khukhwiyembelela ta. Khulwekhuuba bibiindu bino bili ni khunyoowa bikholekhe, ne intsakamo iba ishiili khukhwoola ta.

⁸Khulwekhuuba buli linaambo lilisoolanisa linaambo lyashe, ni buyiinga nabwo bulisoolanisa buyiinga bwashabwe; ilibawo khuteengasibwa khwe shiibala mu bifwo bikali; ilibawo intsala ingali. Ne bino byoosi bili busa khunanikha khwe kumutaambo.

⁹“Ne muli ni khukhwiliinda mwabeene. Khulwekhuuba bakhabawambe inywe babayile isi tsikhobo tsikhulu khubakhalila kimisaango; naluundi balibakhupila tsikhoba nga muli mu ntsu iye khukhwisaayilamo. Khulwekhubeela lisiina lyase, balibayila isi ba gafana ni bayiinga, khubawotsesa ni khukhwokesanisa khufukiilila khwenywe isi nibo.

¹⁰Nga bino bishiili khubawo ta, Kamakhuuwa Kamalayi kaakha khunyoowa khuboolelwa isi kamanaambo koosi.

¹¹Ne ni babawaamba babayila esi babaakhala kimisaango, mukheyembelela bushiili muri kane khulome khurishiina ta. Ne ni mulome isho shoosi shishiiba shabawebwile mu nyaanga iyo, khulwekhuuba Umwoyo Umukhosefu aliba niye ulikhukanikha, ne akhuba inywe ta.

¹²“Wandaaye ni wandaaye, buli mutweela alilyamo uwashe luwomelo, batsye bamwiire. Basaali balilyamo babaana baabwe tsimbomelo, ni babaana nabo balilyamo basaali baabwe tsimbomelo, batsye babeere.

¹³Babaandu balibabiiyila inywe khulwekhuuba muli bafukiilisi baase. Ne umuundu yeesi ulinyindalila khukhwoolisa intsakamo ni lyoola, aliwonesebwa.”

¹⁴Yesu weloosela waaloma ari, “Ne ni mulibona she mbikho shishireera khuhela, nga shili esi abe shikhaakhila khuuba ta nga ni shakanikhibwakho n'Umuŋoosi Danieli, (usoma bino ali ni khukhwimenielesa)[22] abo babaali mu Yuda bali ni khutima belukhile mu bikiingi.

¹⁵Uyo yeesi uliba nga wekhaale khu ntsu khungaaki, akheekha aasi ta, namwe akhenjila mu ntsu bari atsya khusuta bibilimo ta.

¹⁶Ni nooyo uli mu mukuunda nga alikho araamba, akhelayo ingo bari atsya khubukula ingubo ta.

¹⁷Ne bakhasi babaali bisoombo ni naabo babanuunisa babaana, baliba mu mutaambo kumukali.

¹⁸Ni muloombe muri bibiindu bino bilekhe khukwawo mu biseela bye bunyifu ta.

¹⁹Khulwekhuuba kumutaambo kukulibawo mu bifukhu ibyo, sikwabatsakawo khukhwaama nga Wele n'abuumba shiibala ta. Naluundi sikulibatsakawo luundi ta.

²⁰Ne Umukasya alekha khukhola bifukhu ibyo byaaba bikyeekhe, khali abe mbaawo umuundu yeesi uliwonesebwa ta. Ne khulwa abo babaali ba buraawa, beesi Wele amala khurobola, bifukhu ibyo wabibombesakho.

²¹“Mu bifukhu ibyo, umuundu yeesi n'akhuloma iwe ari, ‘Bona Kristo ali ano,’ namwe ali, ‘Bona Kristo ali iyeyo!’ Ukhafukiilisa byeesi aloma ta.

²²Khulwekhuuba ba Kristo be bubeeyi ni baŋoosi be bubeeyi baliwulukha, bakhole bye kamakaanga ni bibiyaangisa, nio bakosaase babaandu. Abe shinyalikha khali bakosaasile ni barobole ba Wele.

²³Ne inywe ni mwiliinde, khulwekhuuba ise nababooleele bibiindu bino nga bushiili.”

²⁴Yesu weloosela waaloma ari, “Mu bifukhu byeene ibyo, lwanyuma lwe kumutaambo ukwo, inyaanga ilikyela imali, ni kumweesi sikuliwa buwaanga ta.

²⁵Tsinieniesi tsilikwa aasi khukhwaama mu ngaaki, ni kamaani ke mu ngaaki kalitengasibwa.

²⁶Nio lwanyuma balibona Umwaana w'Omuundu nga etsila mu mafuumbi, nga etsila mu shiriifwa ni kamaani kamakali.

²⁷Abweene awo alirumana bamalayika, khubusaasa abo babaali barobole, khukhwaama buli andu osi mu shiibala shoosi, ni khukhwoolela ilala mwikulu.”

²⁸Yesu waloma luundi ari, “Ni mwiyikile khu kusaala ku Figi. N'ubona nga kusaala kuno kusisina tsisakya naluundi nga kamasaafu karakikha khurura, umanya busa uri biseela bye bukhafu bili aambi.

²⁹Ni musaambo niyo ndweela, ni mubona nga bibiindu bino bilikho bikholikha, manya busa muri Umwaana w'Omuundu ali aambi, wolile khu shilibwa.

³⁰Ilala imbaboolela ndi, kumuboolo kuno kutsya khuwawo, bibiindu bino bikhaabe nga byakholikhile khaale.

³¹Likulu ni shiibala byoosi bikhawewo, ne bilomo byase sibikhawewo na khafwiiti ta.”

³²Yesu weloosela waaloma ari, “Imbaawo uyo yeesi umanya bye shifukhu namwe inyaanga yeesi bino bilikholikhilamo ta. Akhaba bamalayika be mwikulu, namwe Umwaana wa Wele naye s'amanya imbuka ta, akhali Wele umweene yenyene.

³³Ni nashiryo, ni mwiliinde nga mwirekekha bulayi naluundi nga muloomba, khulwekhuuba simumanya imbuka iyo iliba liina ta.

³⁴Shino shili busa nga umuundu ulekha ingo nga atsya lukyeendo. Nga atsya, akabila babakaanisi beewe buli mutweela kumulimo kukweewe, walakila n'uliinda khu shilibwa khuuba umwirekefu.

³⁵Ni musaambo niyo indweela, nanywe ni mube beerekefu, khulwekhuuba simumanya imbuka isi umweene uwe mu ntsu alikobola ta. Anyala waakobola angoloobe, namwe mu shilo akari, namwe nga tsingokho tsikholookha, namwe kumutikhinyi nga antsye bwasheele.

³⁶Abe akhabatuundubikha busa, akhabanyoola nga mukona liilo ta.

³⁷Sheesi imbalomela inywe, inomela ni babaandu boosi: Ni mwirekekhe!”