Read lumasaaba Mako 15 Bible Online

Mako 15 - lumasaaba bible

Mako 15

¹Antsye ni bwasha kumutikhinyi khu shifukhu shisheelakho, basaayi bakhulu, atweela ni basakhulu, ni baleekeli be Kamakaambila ka Musa, bekhala mu lukhobo khuteesa khu lomo yino. Babowa Yesu baamuyila wa Pilato.

²Pilato waareeba Yesu ari, “Iwe niye umuyiinga uwe Bayudaaya?” Yesu wamwilamo ari, “Iwe waalomile ni shisheene.”

³Basaayi bakhulu bawaabila Yesu nga bamutsuntsumilisa khu biindu bikali.

⁴Pilato waamureeba luundi ari, “S'ulikho ni sheesi unyala khukhwikanikhakho ta? Waawulile kimisaango kyeesi bakhuwabile.”

⁵Ne Yesu waasila busa nga s'elamo ta. Shino sheyaangisa Pilato.

⁶Abe busheele khu Mayiiya ke Khuubirakho, Pilato alekhuula umubowe mutweela, uyo isi babaandu baaba baamusabile bari alekhuule.

⁷Mu khaseela akho aabawo umubowe mutweela isi balaanga bari Baraba. Aaba mutweela khu babowe babeera babaandu mu mbuka iye bisaayumba bibyabawo.

⁸Nashiryo lituuli lye babaandu lyaatsya isi Pilato, lyaamuloomba liri alekhuule umubowe mutweela, nga abe n'akholatsaka.

⁹Pilato waabareeba ari, “Mukana imbalekhuulile Umuyiinga uwe Bayudaaya?”

¹⁰Khulwekhuuba Pilato abe waamanyile ari basaayi bakhulu bawabila Yesu khulwe libuba.

¹¹Ne basaayi bakhulu baseya babaandu khuloma Pilato bari abalekhuulile Baraba.

¹²Pilato wareeba lituuli ari, “Ne umuundu isi mulaanga muri Umuyiinga uwe Bayudaaya, imuyile waheena?”

¹³Balookhela angaaki bari, “Mutsaangilile khu musalaba.”

¹⁴Pilato waabareeba ari, “Khulwashiina? Musaango shiina kweesi akholile?” Ne beloosela busa khulookhela angaaki bari, “Mutsaangilile khu musalaba.”

¹⁵Nashiryo, Pilato khulwe khuukana khukhwikhoyesa lituuli lye babaandu, wabalekhuulila Baraba. Walakila basilikhale khunywekha Yesu tsikhoba. Ni baamala, waamuwaanayo ari batsye bamutsaangilile khu musalaba.

¹⁶Basilikhale bawaamba Yesu baamuyila mu lumako lwa Gafana mukari, shifwo shishilaangibwa Puritorio.[24] Balaanga basilikhale babaabawo boosi khukhwiitsa babusane.

¹⁷Bakwaarisa Yesu ingubo imbesemu, balukha lihabi lye kamawa, bamukwaarisa khu murwe.

¹⁸Bamutsekhelela nga baloma bari, “Mulembe, Umuyiinga uwe Bayudaaya!”

¹⁹Baamukhupa khu murwe ni tsimiimbo, baamufuutsakho kamare, naluundi baafukhama aasi nga bekholisa bari balikho baamwiisamo shiriifwa.

²⁰Nga basilikhale baamalile khuumukholisaka shiisa baryo, bamwabulamo ingubo tsana imbesemu, bamukwaarisa tsingubo tseewe tsinyene. Baamuyila khutsya khumutsaangilila khu musalaba.

²¹Ni baaba nga bali khu ntsila batsya khutsaangilila Yesu, bakanana Simoni uwe Kurene, abe ulikhukhwaama mu shaalo nga atsya mu shiriimba. Simoni yuno aba niye paapa uwa Alekizanda ni Rufusi. Basilikhale bamuwanyiinya khuusuta kumusalaba kwa Yesu.

²²Baayila Yesu bamwoolisa mu shifwo shishilaangibwa shiri Gologosa, shishimanyisa shiri “Shiifwo she shihaanga.”

²³Kila bamuwa iviini isi batubaasilemo kamalesi kakawosawosa butsiina, ne Yesu waaloba khukinywa.

²⁴Batsaangilila Yesu khu musalaba. Nga bamalile, mu khukabanana tsingubo tseewe, bakhupa khakokha, nga bakana babone naanu unayila ngubo shiina.

²⁵Imbuka yeesi batsaangililamo Yesu khu musalaba tsyaba saawa nga tsitaru tsye kumutikhinyi.

²⁶Imurwe khu musalaba kwa Yesu barakho burone bubwokesana kumusaango kweesi bamufunaana, nga buloma buri, “Yesu Umuyiinga uwe Bayudaaya.”

²⁷Aambi ni Yesu, basilikhale batsaangililawo khu misalaba babiifwi babili, nga mutweela ali khu mukhono kumulayi, ukuundi khu munyeletsi.

²⁸Shino shakholikha nio bibyaronebwa bikhosefu byoolelesebwe, nga biloma biri, “Bamubalila atweela ni babafuniaaka kamakaambila.”[25]

²⁹Babaandu babaaba babira abweene awo, bamufwotsola nga baraambisa tsilomo tsiimbi naabi. Basisiikha kimirwe kyaabwe, nga baloma bari, “Aha! Imbo iwe weruuya uli unyala waasambula Lisaayilo Likhulu, naluundi waalyombekhela mu bifukhu bitaru!

³⁰Yiikha khukhwaama khu musalaba, wamweene wiwonese!”

³¹Akhaba ni basaayi bakhulu, atweela ni baleekeli be Kamakaambila ka Musa nabo bamulomela tsilomo tsiimbi. Baloma bari, “Awonesaka babaandi, ne ari umweene s'anyala khukhwiwonesa ta.

³²Khayo khubone oba Kristo, Umuyiinga uwa Isiraeli, anyala khukhwaama khu musalaba wekha aasi. Nio nga khwaboone shino nafwe khufukiilile.” Ni babeefwi babili beesi batsaangilila khu musalaba aambi ni Yesu, nabo baamulomela tsilomo tsiimbi.

³³Ni tsoola saawa tsisesaba tsye mwihangilwe, shishiilima shawaamba shiibala shoosi, khukhwoolisila ilala saawa sheenda.

³⁴Khu saawa nyene iyo, Yesu walila ni likono likali nga aloma ari, “Eloi, Eloi, lama sabakusani?”[26] Shishimanyisa shiri, “Wele wase, Wele wase, shiina kila undekhile senyene?”

³⁵Batweela khu baandu babaaba bemikhile awo, kila baloma bari, “Ni muwulile, alikho alaanga Eliya.”

³⁶Mutweela khu beene abo watima waatsya wabukula shishangwe, washisanya mu viini isi batubaasilemo kamalesi kakawosawosa butsiina, washisika khu lusaala washiwa Yesu bari asusuune, nga aloma ari, “Ni muliinde khubone oba Eliya kane etse amuruse khu musalaba.”

³⁷Ni abweene awo, Yesu walila ni likono likali, wahela kumuukha kumumalilisi.

³⁸Ni abweene awo, ingubo yeesi batiimba mu Lisaayilo Likhulu,[27] yonuukhamo bisiintsa bibili, khukhwaama khungaaki, khukhwoolesa aasi.

³⁹Umuraangilisi uwe basilikhale uwaba nga wemikhile awo, nga walolelele Yesu, n'abona bino kila aloma ari, “Ilala, umuundu yuno abe ali Umwaana wa Wele!”

⁴⁰Aabawo bakhasi batweela abe babemikhile ataayikho nga balolelele. Mu beene abo mwabamo Malyamu Magadalena, Malyamu ukuundi nga niye usaala Yakobo uwaba umukyeekhe ni yaaya weewe, ulaangibwa ari Yosese. Umukhasi ukuundi aba Salume.

⁴¹Bakhasi bano baamuloondakho khukhwaama nga n'aba i Galilaaya, naluundi baamuyeeta musaambo tsingali. Aabawo ni bakhasi babaandi bakali busa babaaloonda khu Yesu khukhwaama i Yerusalemu.

⁴²Imbuka yoola iye angoloobe, naluundi nga Bayudaaya balikho berekekhela shifukhu shabwe shikhosefu, sha Sabato.

⁴³Umusaani mutweela isi balaanga bari Yusufu nga ama i Alimaseya, abe ali umusaani isi babaandu besamo lukoosi. Naluundi abe niye umweene ali umuundu uwaliindilila khubona Buyiinga bwa Wele. Yusufu yuno wenyindaalila waatsya isi Pilato, wamusaba ari amufukiilile atsye ayile kumulaambo kwa Yesu.

⁴⁴Pilato shamwiyangisa khuwulila ari Yesu waamalile khaale khufwa. Walaanga umuraangilisi we basilikhale, wamureeba oba nga Yesu waamalile khaale khufwa.

⁴⁵Umuraangilisi we basilikhale yuno n'amala khuŋaŋasa ari Yesu wafwiile khaale, Pilato wawa Yusufu lukusa lwe khuyila kumulaambo.

⁴⁶Yusufu waatsya wakula ingubo indayi iwaanga, wahanula kumulaambo wakubowa mu ngubo iyo. Lwanyuma waatsya wasiikha Yesu mu ŋani abe isi bakhoora mwibaale. N'amala, wapilingisa libaale, wekala imulyaango we ŋani iyo.

⁴⁷Malyamu Magadalena ni Malyamu maayi uwa Yosese baabawo, babona isi Yusufu asiikha Yesu.