Read lumasaaba Mako 16 Bible Online

Mako 16 - lumasaaba bible

Mako 16

¹Shifukhu sha Sabato ni shaba nga shaweele, Malyamu Magadalena, Salume, ni Malyamu maayi uwa Yakobo, bakula bye khukhwihakha bibiwunya bulayi, bari batsye bawakhe kumulaambo kwa Yesu.

²Khu Sabiti kumutikhinyi, nga inyaanga yamalile khurura, baatsya khu ŋani.

³Ni baaba nga batsya bareebana bonyene bari, “Ne naanu ukane akhupilingisile libaale khukhwaama khu ŋani?”

⁴Bari balola bari, babona nga libaale lyamalile khupilingisibwa khukhwaama khu ŋani. Lyaba libaale liboofu naabi.

⁵Ni benjila mu ŋani, babona umusoleeli mutweela nga wakwaarire tsingubo tsiwaanga, nga wekhaale khu mukhono kumulayi. Shino shabareerera khuurya.

⁶Waabalomela ari, “Mukharya ta. Naamanyile indi mulikho muweentsa Yesu uwe i Nazareesi, isi baatsaangilila khu musalaba. Waalamukhile khukhwaama mu bafu, s'ali ano ta; ni mu bone shifwo sheesi baamusiikhamo.

⁷Ne ni mutsye muboolele baleekelwa beewe, ne khufuurisa Petero, muri Yesu waabenyooyile ibweeni waatsiile i Galilaaya. Nga n'abalomela amataayi, ibweene iyo niyo isi mulimubonela.”

⁸Bakhasi ni baama khu ŋani, baatsya butima, ilala abe khuurya ni khunikina byaabawaambile. Khulwe khuurya khukali, baalekha khuboolelakho umuundu yeesitsana ta.

⁹Yesu n'alamukha kumutikhinyi kumweene khu Sabiti, waanyoowa khubonekhela Malyamu Magadalena. Makiboole abe Yesu waanyoowa khuwoona kimisaambwa kimibi musaafu khukhwaama mu Malyamu yuno.

¹⁰Umweene uyu waatsya khuboolela abo babaabatsaka ni Yesu, baaba abe balikho balila naluundi nga bewunamiile.

¹¹Ikhaba nga ni bawulila bari Yesu ari ali umulamu, naluundi bari wabonekheele Malyamu Magadalena, balekha khufukiilila ta.

¹²Lwanyuma lwa bino, Yesu waabonekhela babili khu baleekelwa beewe, musaambo ikiindi. Bano baaba balikho bakyeenda nga baama mu shiriimba batsya mu shaalo.

¹³Bano beelayo baboolela baleekelwa babaaramile, ne baalekha khufukiilila byeesi bababoolela ta.

¹⁴Lwanyuma Yesu waabonekhela baleekelwa beewe liikhumi na mutweela nga balikho balya biilyo. Kila ababiiyisa khulwe khulekha khufukiilila ta, ni khuuba ni kimyoyo kimihandalafu, isaambo isi bakhafukiilila byeesi abo bababona Yesu bababoolela ta.

¹⁵Waabalomela ari, “Ni mutsye mu shiibala shoosi, mukuukuule isi babaandu boosi Kamakhuuwa Kamalayi.

¹⁶Umuundu ukane afukiilile Kamakhuuwa kano abatisibwe, alifuna buwonesi; ne uyo ukhafukiilila ta, kumusaango kulimufuura.

¹⁷Abo babaafukiilila muusi ise, bakhaakholatsake bibiyaangisa. Ni baliraambisatsaka lisiina lyase, baliwoona kimisaambwa kimibi, naluundi balikanikha tsinimi tsimbya.

¹⁸Baliwaamba tsindemu mu makhono kaabwe, naluundi abe baakhalinywa shishiindu shishiira, seshilibakholakho buubi bwoosi ta. Ni baliloombela balwaale nga babarakho kamakhono, balwaale abo baliwona.”

¹⁹Lwanyuma nga Yesu waamalile khukanikha ni baleekelwa beewe, waniinisibwa mwikulu, wekhala aasi khu lubeka lwe kumukhono kumulayi kwa Wele.

²⁰Baleekelwa ni baama awo baatsya bakuukuula Kamakhuuwa Kamalayi buli andu osi. Umukasya waraambatsakila mu nibo, nga aŋaŋasa buurume bwaabwe khuubirira mu bubonelo bweesi bakholatsaka.