Read lumasaaba Mako 3 Bible Online

Mako 3 - lumasaaba bible

Mako 3

¹Yesu n'enjila mu ntsu iye khukhwisaayilamo kumuluundi kukuundi, shanyoolikhana nga mwabamo umusaani uwaba ni kumukhono kumuleme.

²Kila Bafarisaayo balolelela Yesu nga bakana babone oba nga anyala khuuwonesa umusaani uyo khu shifukhu sha Sabato namwe ta, nio baamisilekho bamuwaabile kumusaango.

³Yesu waalomela umusaani uwaba ni kumukhono kumuleme ari, “Yiitsa ano.”

⁴Kila areeba babaaba mu ntsu ye khukhwisaayilamo ari, “Khuulondekhana ni kamakaambila keefwe, khu Sabato khwakhiile khuukhola buulayi, namwe khuukhola buubi? Khwakhiile khuuwonesa buulamu bwe babaandu namwe khwakhiile khukhwiira?” Ne boosi baasila busa.

⁵Yesu waabalola boosi tsimoni ni lirima likali, khulwekhuuba baaba ni kimyoyo kikyakakanyala. Waalomela umusaani uwatsana ari, “Tsalaasa kumukhono kwoowo.” Umusaani n'akutsalaasa, kwakwalaala kwekyela kumulamu.

⁶Bafarisaayo ni baarura antsye, baatsya bekutila atweela ni baloondeleli ba Herode, nga baweentsa kumukhoosi kwe khukhwiira Yesu.

⁷Yesu ni baleekelwa beewe baarura mu shifo sheene isho, beekha khu nyaantsa. Babaandu bakali babeene nga baama i Galilaaya ni mu Yuda baabaloondelela.

⁸Ni babaandi baama i Yerusalemu, Idumea, ni babaandi babaama shanjelekha she luluutsi Yorudaani. Kamatuuli kakaandi kamakali kameene ke babaandu kaama i Tuulo ni Sidoni. Kamatuuli kano koosi kabuusana khulwekhuuba abe kawulile bibiindu byeesi abe Yesu alikho akhola.

⁹Yesu waalomela baleekelwa beewe khurengekharengekha likhoŋolo, ari nga shinyalikha ekhalemo, khulwekhuuba abe babaandu beetsa khumuyindaka.

¹⁰Yesu n'aba nga wawonesele babaandu bakali, babaaba batsiina babaandi baamuloomba bari bamutilekho busa.

¹¹Abe babaandu boosi babaaba ni kimisaambwa kimibi ni baabona Yesu, abe bekhupa busa aasi nga bakuukuula bari, “Iwe uli Umwaana wa Wele.”

¹²Ne Yesu walakila kimisaambwa kimibi ikyo khulekha khumubuula oba niye naanu ta.

¹³Kila Yesu akhalawo khulaanga batweela khu baloondeleli beewe, waaniina ni nabo khu lukiingi.

¹⁴Aryo waarobolamo liikhumi na babili, kila abalaanga ari baarume beewe, nga akana babe ni naye, naluundi ari abarumane khuutsya khulaangilila kamakhuuwa isi babaandu,

¹⁵ni bunyala bwe khutimisa kimisaambwa kimibi khukhwaama mu baandu.

¹⁶Kila arobola bano: Simoni, esi Yesu umweene atwiikha ari Petero,

¹⁷ni Yakobo atweela ni yaayawe Yokana nga boombi bali babaana ba Zebedaayo. Yesu wabatwiikha ari “Bonerigesi,” shishimanyisa shiri, “Babaana be khukuula khwe fula.”

¹⁸Warobola ni Andereya, Filipo, Batolomayo, Matayo, Tomasi, Yakobo umwaana uwa Alufayo, Tadewo, Simoni abe utsiinikhanila naabi linaambo lyeewe (Zelote),

¹⁹ni Yuda Isikalyoti, uwakelawo walya mu Yesu luwomelo.

²⁰Yesu welayo ingo wenjila mu ntsu. Lituuli lye babaandu likali ndi lyelamo luundi lyabuusana, alekha khubawo akhaba ni khabi iye khuulya biilyo ta.

²¹Baalebe beewe ni baawulila abe bibiili khuutsya mu moni, baatsya bari bamuwambe bamukobose ingo, khulwekhuuba abe babaandu balikho baloma bari, “Wonekhile kumurwe.”

²²Kila batweela khu baleekeli be Kamakaambila ka Musa babaama i Yerusalemu baloma bari, “Umusaani uyu alikho shisaambwa sha Belizebuli, umuraangilisi uwe kimisaambwa kimibi. Akhaba kimisaambwa kimibi akiwoona khukhwaama mu baandu nga eyeetisa kamaani ka Belizebuli.”

²³Yesu walaanga babaandu bamwibotokhelela, kila arakikha khubakanikhayo nga araambisa tsisimo. Waareeba ari, “Sitaani anyala khuutimisa Sitaani uwasheewe?

²⁴Noola buyiinga bwaawukhanamo burakikha khukhwisoolanisa bwonyene na bwonyene, si bulinyala bwalama ta.

²⁵Akhaba nga babaandu be muungo mutweela bawukhanilemo, muungo umwo simunyala mwalama ta.

²⁶Musaambo niyo indweela, singa Sitaani esoolanisa umweene naluundi weyawukhanisamo, s'alama ta; aba woolile khuuhela.

²⁷“Mbaawo umuundu unyala waafuna luundi wenjila mu ntsu y'omuundu uuli ni kamaani naluundi waakinjila waanuula bibiindu byeewe ta, akhali nga waanyooyile khubowa umweene mu ntsu kimikosi, nio anyalise khuunuula bibiindu byeewe.”

²⁸Weloosela ari, “Ilala, alala, imbaboolela ndi bibyoonako byoosi byeesi mukhola bilibeyakhilwa akhaba khufwotsola khweesi bakhola.

²⁹Ne uyo yeesi ufwotsola Umwoyo Umukhosefu, s'alifuna shishiyakhilo she shishonako isho ta, aba ali ni kumusaango kukukhawawo ta.”

³⁰Yesu aloma aryo khulwekhuuba abe babaandu balomile bari alikho shisaambwa shiibi.

³¹Maayi uwa Yesu ni babandaaye kila beetsa beema ibulafu. Baarumanisa umuundu khuutsya mu ntsu abalaangile Yesu eetse ibulafu.

³²Kila lituuli lilyaba lyekhaale nga lyamwibotookhelele, liloma liri, “Maayi woowo ni babandaayo ni bakooko bowo bali ibulafu balikho bakhulaanga.”

³³Kila Yesu areeba ari, “Maayi wase ni babandaayase nibo naanu?”

³⁴Kila walola tsimoni webotokhelesa abo abe babamwikhaalewo waaloma ari, “Maayi wase ni babandaayase nibo abashiina.

³⁵Buli muundu ukhola sheesi Wele akana, umuundu uyo aba wandaayase, naluundi umukooko wase, naluundi aba maayi wase.”