Read lumasaaba Mako 5 Bible Online

Mako 5 - lumasaaba bible

Mako 5

¹Yesu ni baloondeleli beewe bakhalisa inyaantsa ilaangibwa Galilaaya, baatsya boola mu shiriimba shishilaangibwa shiri Gerasene.

²Yesu n'amala busa ari khurura mu likhoŋolo, umusaani uwabakho kimisaambwa kimibi watima wamwiitsayo.

³Umusaani yuno abe amenya mu mafuluma abe esi basiikha baafu. Abe umusaani yuno waakhaasila ilala babaandu boosi, nga imbaawo unyala waamubowa ta, akhaba abe khuraambisa kiminyololo.

⁴Abe bakhakakho khaale khumubowa bikyele ni kamakhono nga baraambisa kiminyololo, ne abe bino byoosi abikhalaka wabinyusakho. Ari abe imbaawo umuundu uli ni kamaani ke khumuliindila mu shifo shitweela ta.

⁵Abe kumuusi ni mu shilo ekhala mu biliindwa ni mu njiinji, nga akuukuula naluundi nga umweene ekhalaka ni kamabaale.

⁶Umusaani yuno n'abona Yesu nga ashiili aleeyi, watima wamutsyayo, wafukhama aasi.

⁷Kila akuukuula ni likono likali nga aloma ari, “Yesu, Umwaana wa Wele uwe Angaaki Naabi, ise umeentsakho shiina? Mu lisiina lya Wele, nakhwikontselele ukhambonabonisa ta.”

⁸Umusaani yuno aloma aryo khulwekhuuba abe Yesu walakiile shisaambwa shiibi khumururakho.

⁹Yesu waamureeba ari, “Iwe bakhulaanga bari naanu?” Umusaani welamo ari, “Ise banaanga bari liiye likali; khulwekhuuba khuli bakali.”

¹⁰Kila umusaani ekoontselela Yesu ari akhakitimisa kyaatsya ta.

¹¹Ne aabawo lituuli lye tsimbiitsi, nga lili mu bikiingi nga tsilikho tsaaya.

¹²Kila kimisaambwa kimibi ikyo kikoontselela Yesu kiri akisiindikhe kitsye kiingile mu mbiitsi itsyo.

¹³Yesu waalomela kimisaambwa kimibi ari kitsye. Kimisaambwa kimibi ikyo kyarura mu musaani uyo, kyaatsya kyenjila mu mbiitsi. Lituuli lyoosi lilyaba lyoolisa nga tsimbiitsi kimikaanda kibili, lyaafulumukha, lyaawungukha ilumya, lyaaweela mu nyaantsa, tsaafwa tsoosi.

¹⁴Babaayi be tsimbiitsi itsyo batima baatsya baboolela babaandu be mu shiriimba ni be mu byaalo kamakhuuwa kano. Babaandu nabo beetsa khubona shinaanu shishibelewo.

¹⁵Ni beetsa isi Yesu aba, babona umusaani tsana uwabakho kimisaambwa kimibi nga wekhaale awo, wakwaarire tsingubo, nga ari wekyelile umulamu. Ni babona shino, baaba ni khuurya.

¹⁶Abo babaabawo babona nga umusaani uwabakho kimisaambwa kimibi n'awonesebwa, ni bibyakholikha khu mbiitsi nga ni tsaweela mu nyaantsa, baboolela babaandu nga ni byaba.

¹⁷Kila babaandu barakikha khukhwikontselela Yesu bari arure khu shaalo shabwe atsye.

¹⁸Yesu n'aba nga aniina mu likhoŋolo ari atsye, umusaani esi awoonakho kimisaambwa kimibi kila amwikontselela ari atsye ni naye.

¹⁹Ne Yesu walekha khufukiilila ta, kila amulomela ari, “Kobolayo ingo isi balebe boowo, ubaboolele bibiindu bikali byeesi Umukasya akhukholele, naluundi nga n'akhuwaambiile iwe shiisa.”

²⁰Umusaani waatsya waboolela babaandu be mu biriimba bibilaangibwa biri Dekapoli,[3] bibiindu byeesi Yesu amukholela. Babaandu boosi beyaanga.

²¹Lwanyuma nga Yesu waamalile khukhwinjila mu likhoŋolo wakhalisile watsiile shanjelekha we nyaantsa, nga ashiili khu ndulo khwayo, babaandu bakali babuusanila esi aba.

²²Mutweela khu baraangilisi be mu ntsu ye khukhwisaayilamo, nga lisiina lyeewe bari Yayiro, woola waatsya isi Yesu. Kila afukhamila aasi ibweeni wa Yesu.

²³Wamuloomba nga amuloma ari, “Umwaana wase umukhaana ali buubi, akana khufwa! Ni wiitse umurekho kamakhono kyoowo nga umuloombela, umuwonese.”

²⁴Aryo Yesu waatsya ni Yayiro. Ne lituuli lye babaandu likali lyamulondelela nga liyindakana.

²⁵Mu lituuli umwo mwabamo umukhasi abe uwalwaala khukhwibeena khwe kamafuki khumala kimiiko liikhumi na kibili.

²⁶Abe umukhasi yuno waatsya mu bakaangi bakali ari bamuyeete, ne abe bamuloosela busa butsiina. Abe wasasula tsinusu tseewe tseesi aba ni natso nga akana ari awone, ne abe butsiina bwiloosela busa.

²⁷Umukhasi yuno abe wawulila bibiwaamba khu Yesu. Nashiryo wetsila mu lituuli nga amila imukoongo wa Yesu, watiila khu ngubo yeewe.

²⁸Khulwekhuuba abe walomele mu mwoyo kweewe ari, “Abe nakhatiila busa khu ngubo yeewe shonyene, kane imbonesewe.”

²⁹Khaangukho khukhwibeena khwe kamafuki khwakama, n'umweene wewulila mu mubili ari wawonisibwile butsiina bweesi aba ni nabwo.

³⁰Ni abweene awo Yesu wewulila nga kamaani mwibili mweewe kamuwamo. Kila ashuukha areeba lituuli lye babaandu ari, “Naanu uwaambile khu ngubo tsase?”

³¹Kila baleekelwa beewe bamuloma bari, “Waboone lituuli lye babaandu nga ni lilikho liyindakana, unyala uryeena wareeba uri ‘Naanu uwumambilekho?’ ”

³²Ne Yesu umweene wanyukanyuka khubona naanu ushikholile.

³³Kila umukhasi tsana nga waamanyile bulayi shishiindu shimukholikhilekho, wetsa nga anikina naluundi nga wariire, wafukhama ibweeni wa Yesu. Aryo waboolela Yesu bya ŋali byoosi nga ni byaba.

³⁴Yesu waalomela umukhasi tsana ari, “Mukhaana wase, lwe khufukiilila khwoowo wawonisibwile. N'utsye ni lukoosi, ni bubukhutsiina bwawonele.”

³⁵Yesu n'aba nga ashiloma aryo, abawo babaandu babaama muungo mwa mw'omuraangirisi tsana bamuboolela bari, “Umwaana woowo wafwiile. Shiina kila utaambisa Umuleekeli luundi?”

³⁶Ne Yesu walekha khukhwinaana khu byeesi baloma ta, ne waalomela umuraangilisi uyo ari, “Ukheyembelela ta. Iwe ba busa ni khufukiilila.”

³⁷Yesu walekha khufukiilisa umuundu yeesi khumuloondakho ta, akhali Petero, Yakobo ni yaayawe Yokana.

³⁸Ni boola ango w'omuraangilisi, baabona babaandu bakali, nga besaasala, balila, bakhupa kimibala.

³⁹Kila Yesu enjila mu ntsu abareeba ari, “Lwashiina mwisasala nga mukhupa kimibala? Umwaana siwafwiile ta, akhali ndi alikho akona busa liilo.”

⁴⁰Babaandu bamutsekhelela. Lwanyuma Yesu waloma babaandu boosi khurura antsye. Wayila paapa ni maayi b'omwaana, ni baleekelwa beewe bataru, baatsya isi umwaana umufu aba.

⁴¹Wahaamba kumukhono kw'omwaana kila amuloma ari, “Talitha, koum,” shishimanyisa mu lulomo lu Aramayiki shili, “Namukhaana, yinyukha!”

⁴²Khaangukho umukhaana wenyukha, warakikha khukyenda, khulwekhuuba abe ali uwe kimiiko nga liikhumi na kibili. Buli mutweela weyaanga naabi.

⁴³Yesu waabakhoonyakilila ari bakhaboolelakho umuundu yeesi shishiindu shino ta. Waabaloma ari bawe umukhaana tsana she khuulya.