Read lumasaaba Mako 6 Bible Online

Mako 6 - lumasaaba bible

Mako 6

¹Yesu n'ama awo waatsya mu shiriimba she waabwe she Nazareesi. Baleekelwa beewe baamuloondakho.

²Shifukhu sha Sabato ni shoola, Yesu waatsya waarakikha khuuleekela mu ntsu iye khukhwisaayilamo. Babaandu bakali baamurekeeresa nga beyaanga naabi nga bereeba bari, “Bibiindu bino byoosi umusaani uyu abyaamisa waheena? Amisa waheena kamakhula ni kamaani ke khuukhola bye kamakaanga bino?

³Uyuno s'ali umubeetsi naluundi umwaana uwa Malyamu? Babandaaye sibali nibo Yakobo, Yosese, Yuda ni Simoni? Bakooko beewe sibamenya ni nafwe mu shiriimba shino?” Babaandu bamwikaana lweebyo byeesi aba nga akhola.

⁴Ne Yesu waabalomela ari, “Buli oosi isi umuŋoosi atsya bamwiisamo shiriifwa, khuurusakho isi asaalikha sibamwisamo shiriifwa ta. Akhaba mu balebe beewe ni be muungo beewe nabo sibamwisamo shiriifwa ta.”

⁵Shino shakila Yesu walekha khukholelayo bye kamakaanga byoosi ta, khurusakho ndi ara kamakhono khu batsiina bafwiiti bari, wabawonesa.

⁶Shamwiyangisa naabi khubona ari babaandu sibali ni khufukiilila ta. Yesu waatsya nga aleekela mu byaalo bibibotokhelele.

⁷Lwanyuma walaanga baleekelwa beewe liikhumi na babili atweela, wabarumana ari batsye babilibili. Wabawa kamaani ke khutimisa kimisaambwa kimibi.

⁸Wabalakila khulekha khusuta shishiindu shoosi ta, nga batsya lukyeendo, akhali imiimbo iye khukhwitiila. Waabalomela khuulekha khuusuta biilyo, namwe iwootswa, namwe tsinusu ta.

⁹Waabalomela ari bakwaare tsisapata, ne balekhe khusuta bikwaaro bibili ta.

¹⁰Waababoolela luundi ari, “Nga mwaatsiile aango w'omuundu ne baabakaanile, ni mumenye mubweene umwo khukhwoolisa ni mulirura mu shisiintsa isho.

¹¹Ni mwoola mu shifo ne baalekha khubakaanila namwe baalekha khukhwakaanila buurume bwenywe ta, nga mururayo musisakula lufuumbi[4] luluuli mu bikyele byeenywe.”

¹²Ni nashiryo baatsya baboolela babaandu bari bali ni khukhwibiiyisa bibyoonako byaabwe, bakobole isi Wele.

¹³Baatimisa kimisaambwa kimibi kimikali khukhwaama mu baandu, naluundi baawonesa baatsiina bakali, nga babahakha kamafura.[5]

¹⁴Yesu n'afuma lukali khu shaalo, n'umuyiinga Herode[6] naye woola khuuwulila bibimuwaambakho. Kila babaandu balala baloma bari, “Yokana Umubatisa waalamukhile khukhwaama mu bafu. Shino nisho shishikila anyalisa khuukhola bye kamakaanga bino byoosi.”

¹⁵Ne babaandi baaloma bari, “Uyuno ali Eliya.”[7] Babaandi baaloma bari, “Yuno ali umuŋoosi nga mutweela khu baŋoosi be khaale.”

¹⁶Ne Herode n'awulila bibiwaamba khu Yesu kila aloma ari, “Yuno ali ni khuuba Yokana Umubatisa! Nalakila baamuremakho kumurwe, ne ari waalamukhile khukhwaama mu bafu.”

¹⁷Makiboole Herode aabukula naluundi waayila Herodiya khuuba nga umukhasi weewe. Herodiya yuno aaba umukhasi uwa Filipo, wandaaye uwa Herode. Yokana Umubatisa waalomela Herode ari, “Shifuniaaka likaambila iwe khuubukula umukhasi uwa waandayo, waamwikesa umukhasi uwoowo.” Ne khulwe khuukana khusangaasa Herodiya, Herode aalakila bawaamba Yokana Umubatisa baamubowa mu mapuusu.

¹⁸

¹⁹Shino shakila Herodiya wahaambila Yokana Umubatisa lirima, nga akana amwiire, ne nga s'anyala ta,

²⁰khulwekhuuba abe Herode arya Yokana Umubatisa, nashiryo waamuliinda buulayi. Herode aamanya ari Yokana Umubatisa ali umuundu umulayi naluundi umukhosefu. Akhaba bibiindu bikali byeesi Yokana Umubatisa aalomatsaka abe biyaangisa Herode, ne aakana naabi khuurekeeresa Yokana mweene.

²¹Ne Herodiya ikhabi yaamuwaamba khu shifukhu shitweela nga Herode waakholeele bakyeni beewe kamayiiya, nga ashebulilakho shifukhu she kamasaalikha keewe. Abe walaangile babaandu baarye khukhwaama mu buyiinga bweewe, ni baraangilisi be basilikhale, ni babaandu be angaaki khukhwaama mu Galilaaya.

²²Ne umwaana umukhaana uwa Herodiya n'etsa isi baaba washina, wekhoyesa Herode naabi ni bakyeni beewe. Kila umuyiinga Herode alomela umukhaana ari, “Loomba shishiindu shoosi sheesi ukana, kane ishikhuwe.”

²³Wetsuba nga aloma ari, “Sheesi uloomba shoosi kane ishikhuwe, abe waakhaloomba uri ikhukhalilekho shisiintsa she buyiinga bwase.”

²⁴Umukhaana waarura ibulafu waatsya waareeba maayi weewe ari, “Inoombe indi ambe shiina?” Maayi weewe waamwilamo ari, “Loomba akhuwe kumurwe kwa Yokana Umubatisa.”

²⁵Umukhaana tsana waakobola waangu isi umuyiinga, waaloomba nga aloma ari, “Ingana wumbe aluno ari kumurwe kwa Yokana Umubatisa nga kuli khu lweelo.”

²⁶Umuyiinga wesonisa naabi khulwe byo byeesi aaba waamalile khuloma. Ne waalekha khukana khufuniaaka shishitsubo isho abe sheesi amalile khukhwitsubila umukhaana mu moni tsye bakyeni beewe ta.

²⁷Ni abweene awo, umuyiinga waalakila umusilikhale khuutsya khureera kumurwe kwa Yokana Umubatisa. Umusilikhale waatsya mu mapuusu wakhalakho kumurwe kwa Yokana,

²⁸waakureera nga kuli khu lweelo, waakuwa umukhaana; umukhaana naye waakuwa maayi weewe.

²⁹Baleekelwa ba Yokana Umubatisa ni baawulila bari beerire Yokana, baatsya baasuta kumulaambo, baatsya baamusiikha.

³⁰Lwanyuma baarume bakobola isi Yesu, bamuboolela ibyo byoosi byeesi bakhola ni byeesi baleekela.

³¹Ne Yesu waabaloma ari, “Ni mwiitse khutsye mu shifo shishikhalimo babaandu ta, muwolekho.” Yesu aloma aryo khulwekhuuba abawo babaandu bakali nga beetsa ni batsya, shalekha khunyalisila baleekelwa khuwolakho namwe khuulyakho biilyo ta.

³²Benjila mu likhoŋolo baatsya mu shifo abe isi banyala khuuba bonyene.

³³Ne bakali khuubo babaababona nga batsya, bamanya busa abe shifwo sheesi balikho batsyamo. Nashiryo babaandu khukhwaama mu biriimba baatimila busa khu bikyele, benyoowa mu shifwo isho, nga Yesu ni baleekelwa beewe bashiili khukhwoolayo ta.

³⁴Yesu n'arura mu likhoŋolo waabona lituuli lye babaandu likali liitsa wabawaambila shiisa. Khulwekhuuba baaba nga kamasheese kakakhalikho umwaayi ta. Waarakikha khubaleekela bibiindu bikali.

³⁵Nga antsye bulikho bwilabula, baleekelwa beewe beetsa is'ali kila bamulomela bari, “Shiifwo shino shayitala busa, naluundi antsye bulikho bwilabula;

³⁶siibula babaandu batsye mu byaalo ni biifwo bibibotokhelele, beweentseleyo she khulya.”

³⁷Ne Yesu wabeelamo ari, “Inywe mwabeene ni mubawe she khulya.” Baleekelwa bamureeba bari, “Iwe s'ubona uri shikoombesa tsi dinari[8] bitoondo bibili khukula kimikaati kikimala babaandu bano ta?”

³⁸Yesu waabaloma ari, “Ni mutsye mubone; muli ni kimikaati kyeenga?” Ni baamala khubona nga bakoboole bamuloma bari, “Khuli ni kimikaati kiraano, ni tsinyeeni tsibili.”

³⁹Yesu waabalomela ari balome babaandu bekhaale aasi khu bunyaasi, mu matuuli.

⁴⁰Bekhala aasi mu matuuli, buli libira nga lilimo babaandu shitoondo shitweela oba kamakhumi karaano (150).

⁴¹Yesu waabukula kimikaati kiraano ikyo ni tsinyeeni tsibili tsya tsana. Wenyusa tsimoni mu ngaaki waabiloombela ikhabi. Waamenyulakamo kimikaati, waakiwa baleekelwa beewe khuukikabila babaandu. Musaambo niyo indweela, waamenyulakamo tsinyeeni tsibili tsya tsana, shaanyalisila buli mutweela khuufunakho.

⁴²Boosi baalya bekura.

⁴³Baleekelwa ba Yesu babuusanisa buubuya bwe kimikaati ni tsinyeeni bibyarama, betsusa bibiipo liikhumi na bibili.

⁴⁴Babaalya biilyo bino baaba boola basaani bikana biraano (5,000).

⁴⁵Khaangukho Yesu waalomela baleekelwa beewe khuuniina mu likhoŋolo, bakhalise batsye shanjelekha, i Besusaida, nga niye umweene ashisiibula lituuli lye babaandu.

⁴⁶N'amala khuusibula babaandu, waniina khu lukiingi khuutsya khuloomba.

⁴⁷Antsye ni bwaba bwilabula, likhoŋolo abe lyatsiile aleeyi abweene, ne Yesu nga ashiili yenyene khu liloba ndulo khwe nyaantsa.

⁴⁸Yesu waabona nga baleekelwa beewe balikho bakhaka ni kamaani makali khukyendesa likhoŋolo, khulwekhuuba abe imbewo ingali ilikho iwuutsa nga ibaama ibweeni. Antsye ni bwaba nga buli aambi bukana khusya, Yesu weetsa isi bali nga alikho akyeendela khu meetsi. Abe akana khu babirakho busa,

⁴⁹ne ni baamubona nga akyeendela khu meetsi, bambaasa bari shisimu, bahariina.

⁵⁰Boosi baamubona, baaba ni khuurya khukali naabi. Ne khaangu akho waabakanikhayo ari, “Mukharya ta, ise Yesu,”

⁵¹Wenjila mu likhoŋolo khutsya ni nabo, ni abweene awo imbewo ingali iyo yakama. Balondeleli beewe shino shabeyangisa naabi,

⁵²khulwekhuuba abe bakhaasikhanile khushuusakho kimyoyo kyaabwe, nga sibanyala nakhumanya bulayi ilomo iwaamba khu mikaati ta, ni kamakhulu kakaaba mu khuliisa babaandu bikana biraano ta.

⁵³Nga baamalile khuukhalisa inyaantsa boolile khu lwoomu, boola aambi ni shiriimba she Genesareeti, baalekha abweene awo likhoŋolo lyaabwe nga baliboyile khu shitsaangi.

⁵⁴Nga barura mu likhoŋolo, khaangu akho babaandu bofwaasamo Yesu.

⁵⁵Babaandu baarakikha khuutima mu bisiintsa bibibotokheleele khuureera balwaale baabwe nga baabalisile khu saamba. Bayilatsaka balwaale mu buli shifo sheesi baawulila bari Yesu alimo.

⁵⁶Buli oosi isi Yesu aatsya, oba mu byaalo, namwe mu biriimba, baareera balwaale abulafu, nga bamuloomba bari batiilekho busa khu ngubo yeewe. Abo boosi babatiilakho khu Yesu bawonesebwa.