Read lumasaaba Mako 7 Bible Online

Mako 7 - lumasaaba bible

Mako 7

¹Batweela khu Bafarisaayo ni baleekeli be kamakaambila ka Musa babeetsa khukhwaama i Yerusalemu, baatsya babuusanila isi Yesu.

²Ni bemenielesa baabona bari baleekelwa ba Yesu balya busa nga sibanyoowele khusaaba kamakhono ta.[9]

³Khulwekhuuba Bafarisaayo ni Bayudaaya bakali baaloondelela khuuleekela khwe bakuuka baabwe.

⁴Abe nga baamile mu khatale, sibalya shishiindu shoosi ta, akhali nga baamalile khukhwipyeluusa. Iliwo ni bye kimisilo bibiindi busa bikali byeesi baloondelela, nga isaambo iye khupyeluusa bikopo, tsisoongwe, ni bibiindu bibiindi.

⁵Kila Bafarisaayo ni baleekeli be kamakaambila ka Musa bareeba Yesu bari, “Shiina kila baleekelwa boowo bakhalondelela kimisilo kye bakuuka beefwe, kila balya busa nga mbakhusaaba mukhono ta?”

⁶Yesu welamo ari, “Inywe babekholisa busa, inywe nibo beesi Yisaaya akanikhakho nga n'akhola buŋoosi ari, ‘Babaandu bano bekholisaka busa bari bantsisaaya ise, ne kimyoyo kyaabwe kili aleeyi naabi khukhwaama isi ise;

⁷bamala busa imbuka khukhuntsisaaya ise, ne nga kamakaambila keesi baleekela kali busa ke babaandu.’

⁸“Mulekha khulondelela kamakaambila ka Wele, mwela khuleekela kimisilo kye babaandu busa.”

⁹Yesu weloosela ari, “Nga muli ni isaambo iye kamakyesi yeesi mwakhootsa iye khulekha khulondelela kamakaambila ka Wele, bari nio mulondelele bye kimisilo kyeenywe!

¹⁰Khulwekhuuba Musa aloma ari, ‘Yiisatsakamo paapa woowo ni maayi woowo lukoosi’; naluundi ari, ‘Uyo yeesi ukanikha buubi khu paapa weewe namwe maayi weewe, aakha khukhwiribwa.’

¹¹Ne inywe muloma muri, ‘Umuundu n'alomela paapa weewe namwe maayi weewe ari sheesi nandikhuweele iwe nga buyeeti khukhwaama isi ise shili Kolubani,’[10]

¹²aba sashiili ni bufunisi bwe khuyeeta paapawe namwe maayi weewe ta.

¹³Ni nashiryo mwisa likaambila lya Wele andulo muri nio mulondelele bye bakuuka beenywe. Iliwo ni bibiindu bibiindi bikali busa biibi byeesi mukhola bibifwaana nga bino.”

¹⁴Yesu walaanga lituuli lye babaandu luundi kila aloma ari, “Mweesi ni murekeerese byeesi inoma, naluundi mubimanye bulayi.

¹⁵Imbaawo shishiindu shishinjila munda mw'omuundu shishimukhola wekyela umunyaalu ta; akhali bibiindu bibyaama munda mukari mw'omuundu nibyo bibimwonakisa.

¹⁶Uyo yeesi uli ni kamaru ke khuwulila n'arekeerese.”[11]

¹⁷Nga Yesu walekhile lituuli ibulafu wenjiile mu ntsu, kila baleekelwa beewe bamureeba khu biwaamba khu khukanikha nga araambisa tsisimo.

¹⁸Kila abeelamo ari, “Ari akhaba nanywe simuli ni kamakyesi ta? Simubona muri sheesi umuundu alya shenjila munda, seshikila waba umunyaalu ta,

¹⁹khulwekhuuba shinjila munda, ne akhuba mu mwoyo ta, shishimanyisa shiri shikyelawo sharura mwibili shaatsya mu khayu ta?” Mu khuloma aryo, Yesu amanyisa ari bibiliibwa byoosi sibilikho buubi ta.

²⁰Kila eloosela ari, “Isho shishaama mu mwoyo kw'omuundu nisho shishikila waba umunyaalu.

²¹Khulwekhuuba bibiindu bibyaama mu mwoyo nibyo: bibyambaaso binyaalu, buyeyani, bubwiifwi, khukhwira,

²²buyeyani, khuuba ni kumukhono kumuleeyi, ni bibiindu bibiindi biibi nga; bubeeyi, kumulyuulyu, libuba, khukhomyaasa, khukhwibona ni busilu.

²³Bibiindu bino byoosi byaama mu mwoyo kw'omuundu, naluundi nibyo bibikila umuundu waba umunyaalu.”

²⁴Lwanyuma Yesu waama awo waatsya mu bisiintsa bye Tuulo ni Sidoni. Nga wolile iyo, wenjila mu ntsu nga s'akana babaandu bamanye bari aliwo ta, ne shitweela busa baamanya bari aliwo.

²⁵Ne khaangu akho, umukhasi uwaba n'umwaana weewe umukhaana nga umulwaale, khulwekhuuba abe kimisaambwa kimibi kyamuwaambile, n'awulila ari Yesu wolile awo, waatsya waamufukhamila mu bikyele.

²⁶Umukhasi uyo aba Umuyonaani, nga aama mu shisiintsa shishilaangibwa shili Foyinisiya she mu Siriya. Kila ekontselela Yesu ari atimise kimisaambwa kimibi khukhwaama khu mwaana weewe.

²⁷Ne Yesu wamuloma ari, “Biilyo banyoowa khuuwa babaana be ango. Seshiba shilayi khubukula biilyo bye babaana babituumila tsiimbwa ta.”

²⁸Umukhasi wamwilamo ari, “Niabweene Umukasya. Ne ni tsiimbwa natso tsilya buubuya bubuukwa aasi khukhwaama khu meetsa ye babaana.”

²⁹Yesu wamwilamo ari, “Khulwe khuloma uryo, ari ni wileyo; shisaambwa shiibi sharurire khu mwaana woowo.”

³⁰Kila umukhasi uyo elayo ingo, wanyoola nga umwaana weewe ali mu bulili wakonele, nga shisaambwa shiibi isho shamururirekho shatsiile.

³¹Yesu waama i Tuulo, waabirira mu Sidoni, nga alola kwe inyaantsa Galilaaya. Waabirira mu shisiintsa she biriimba liikhumi, shishilaangibwa shiri Dekapoli.

³²Kila bamureerera umusaani nga ali umumiinyi, naluundi amiimikila. Bekoontselela Yesu bari amuwaambekho kamakhono amuwonese.

³³Yesu wahaamba umusaani uyo waamwisa andulo, baaba bonyene busa. Kila ara tsintsala tseewe mu maru k'omusaani. Nga waamalile, wafuutsa kamare waakahakha khu lulimi lw'omusaani tsana.

³⁴Wenyusa tsimoni waalola mu ngaaki, kila ekhiliisa kumwoyo nga aloma ari, “Efufata,” shishimanyisa shiri, “Ni wikukhe.”

³⁵Khaangu akho, kamaru keewe keekukha, ni lulimi lwaakangulukha, waananikha khuukanikha buulayi.

³⁶Yesu waabakhonyakilila ari balekhe khuboolela umuundu yeesi ta. Ne nga esi eloosela khubakhonyakilila, ni nabo esi beloosela khusalanisa bilomo ibyo.

³⁷Shishiindu shino shabeyangisa naabi kila baloma bari, “Buli shiindu sheesi akhola shili shilayi. Bona ekula ni kamaru ke bamiinyi bawulila, ni babamimikila bakanikha.”