Read lumasaaba Mako 8 Bible Online

Mako 8 - lumasaaba bible

Mako 8

¹Khu shifukhu shishindi, lituuli lye babaandu ni lyaba nga lyabusaane, Yesu walaanga baleekelwa beewe, waabaloma ari,

²“Shiisa shamambiile babaandu bano, khulwekhuuba babeele ni nase khumala bifukhu bitaru, nga imbaawo sheesi baliilekho ta.

³Ise n'inoma ndi imbasibule busa khukhwilayo ingo nga bali ntsala, kane bayekhelele bakwe mu ntsila. Khulwekhuuba balala bamiile aleeyi.”

⁴Kila baleekelwa beewe bamureeba bari, “Mu mubiimbi muno unyala wamisa waheena biilyo bye khuliisa babaandu boosi bari?”

⁵Yesu wabareeba ari, “Muli ni kimikaati kyeenga?” Nabo belamo bari, “Kili musaafu.”

⁶Kila Yesu alakila lituuli lye babaandu khukhwikhala aasi; wabukula kimikaati tsana musaafu, wakiloombela ikhabi. Nga waamalile khukiloombela ikhabi, wakimenyulamo wakiwa baleekelwa beewe khukikabila babaandu. Baryo bakikabila babaandu khuulya.

⁷Naluundi baaba ni bunyeeni bufwiiti buri. Yesu n'amala khubuloombela bunyeeni ubwo ikhabi, walakila baleekelwa beewe khubukabila babaandu.

⁸Boosi baalya khukhwoolisa ni bekura; lwanyuma babuusanisa buubuya bubwoolisa bibiipo musaafu.

⁹Babaandu babaalya abe boola babaandu nga bikana bine (4,000).

¹⁰Yesu n'amala khuubasibula, waaniina mu likhoŋolo ni baleekelwa beewe baatsya mu shisiintsa shishilaangibwa shiri Dalamanusa.

¹¹Bafarisaayo beetsa isi Yesu bananikha khukhabisana ni naye, nga bamunuutsilisa bari abokese khabonelo khukhwaama mwikulu. Khuno khwaba khumukhakilisa.

¹²Yesu wekhiliisa kumwoyo kila aloma ari, “Shiina kila kumuboolo kwe babaandu bano, kuweentsa she khabonelo khe kamakaanga? Ilala imbaboolela ndi, imbaawo khabonelo khe kamakaanga khakane khokesanisibwe isi muli ta.”

¹³Niye wabalekha awo waatsya. Kila enjila mu likhoŋolo luundi waatsya shanjelekha we nyaantsa.

¹⁴Baleekelwa ba Yesu abe bebiliile khuusuta kimikaati kikiibamala, nga mu likhoŋolo mulimo kumukaati mutweela kwonyene.

¹⁵Kila Yesu abareewula nga aloma ari, “Muli ni khumanya shino: ni mwiliinde; ni mwiliinde kamamela ke Bafarisaayo ni kamamela ka Herode.”[12]

¹⁶Kila bashikutakho bonyene nga baloma bari, “Alikho aloma aryo bari khulwekhuuba sikhwasutile kimikaati ta.”

¹⁷Ne Yesu n'amanya shino waabaloma ari, “Shiina kila mulikho mukanikha khu bye khulekha khusuta kimikaati ta? Simunyala mwamanya sheesi indikho imanyisa ta? Shiina kila kimyoyo kyeenywe kikhawaamba bibiindu mangu ta?

¹⁸Mukhaba nga babafwa tsimoni babaakhabona, namwe nga bamiinyi mu maru babaakhawulila ta. Shiina kila mwibilila mangu muryo?

¹⁹Nga ni namenyulaka kimikaati kiraano mwakabila babaandu bikana biraano, mwabuusa buubuya bubwolisa bibiipo byeenga?” Baamwiilamo bari, “Khwabuusa bibiipo liikhumi na bibili.”

²⁰Waabareeba luundi ari, “Ne ni namenyulakamo kimikaati musaafu mwaakabila babaandu bikana bine, mwabuusa buubuya bubwoolisa bibiipo byeenga?” Bamwiilamo bari, “Bibipo musaafu.”

²¹Kila abareeba ari, “Ari isho sishikila mwaamanya sheesi indi khuulomakho ta?”

²²Yesu ni baleekelwa beewe ni boola i Besusaida, aabawo babaamureerera umusaani uwabofwaala tsimoni. Bekontselela Yesu bari amutiilekho.

²³Yesu wahaamba umusaani uyo kumukhono, waamuyila besyeenda baarura mu shifwo isho baatsya mu shifo shishiindi. Yesu n'amala khuumuwakha kamare khu moni, ni khuumurakho kamakhono, waareeba umusaani tsana ari, “Ari ulikho ubonakho shishiindu shoosi?”

²⁴Umusaani wenyusa tsimoni waamoka, kila aloma ari, “Indikho imbona babaandu nga bakyeenda, ne bafwaanana nga kimisaala.”

²⁵Yesu indi luundi waatiila khu moni tsy'omusaani tsana; kumuluundi kuno umusaani waamoka buulayi. Tsimoni tseewe tsaaba nga tsawonesebwele, aryo waabona buli shiindu buulayi bubweene.

²⁶Yesu waamusiibula khuutsya ingo, ne waamulomela khuulekha khutsya mu shaalo ni khuulekha khuboolelakho babaandu ta.

²⁷Lwanyuma Yesu ni baleekelwa beewe beloosela baatsya boola aambi ni shiriimba shishilaangibwa Kayisaliya Filipi. Ni baaba nga bali khu ntsila batsya, Yesu wabareeba shireebo ari, “Ise babaandu banomakho bari indi naanu?”

²⁸Baamuloma bari, “Babaandu balala baloma bari iwe niye Yokana Umubatisa; babaandi bari iwe niye Eliya; ne babaandi bari iwe uli mutweela khu baŋoosi.”

²⁹Kila Yesu abareeba ari, “Ne inywe muloma ise indi naanu?” Petero waamwiilamo ari, “Iwe niye Kristo.”[13]

³⁰Yesu waabakhoonyakilila ari balekhe khuboolelakho umuundu yeesi bilomo bino bibimuwaambakho ta.

³¹Abweene awo Yesu waarakikha khuuleekela baleekelwa beewe bibiindu bibiitsya khumukholikhakho. Waababoolela ari, “Umwaana w'Omuundu ali ni khutaambisibwa mu saambo tsingali, basaayi bakhulu balimwikaana, ni baleekeli be kamakaambila ka Musa, lwanyuma bamwiire. Ne lwanyuma lwe bifukhu bitaru, alilamukha khukhwaama mu bafu.”

³²Bibiwaamba khu lomo yino, Yesu wabasontsoola sheesi aba amanyisa. Ne Petero wamwisa andulo wananikha khumubiiyisa khulwe khuloma aryo.

³³Ne Yesu ni ishebukha waabona baleekelwa babaandi, kila abiiyisa Petero ari, “Yiila inyuma wase Sitaani! Khulwekhuuba isaambo isi iwe waambaasamo shiili iya Wele ta, ne ili isaambo yeesi babaandu bambaasamo.”

³⁴Yesu walaanga lituuli lye babaandu ni baleekelwa beewe khukhwiitsa is'ali, kila abalomela ari, “Noola umuundu yeesi akana khuuba umulondeleli wase, ni eyikaane umweene, etyuukhe kumusalaba kweewe anoondelele.

³⁵Khulwekhuuba uyo yeesi ukana khuuwonesa buulamu bweewe, alibufwilwa; ne uyo ufwilwa buulamu bweewe khulwase naluundi khulwe Kamakhuuwa Kamalayi, alibuwonesa,

³⁶Mafuurisa shiina keesi umuundu afunamo, khulwe khuwula shiibala shoosi, ne wafwiilwa buulamu bweewe?

³⁷Shiina sheesi umuundu anyala wahaanayo khuusikula buulamu bweewe?

³⁸Umuundu yeesi uwaambibwa kamaŋaanyu khulwase ni khulwe bilomo byase, mu muboolo kuno kwe babaandu babaakharya Wele ta, naluundi babonaki, ni musaambo niyo indweela Umwaana w'Omuundu naye aliwaambibwa kamaŋaanyu khulw'omuundu uyo, n'aliitsa mu shiriifwa sha Paapa, atweela ni bamalayika beewe bakhosefu.”