Read lumasaaba Mako 9 Bible Online

Mako 9 - lumasaaba bible

Mako 9

¹Yesu weloosela waabalomela ari, “Ilala, ilala, imbaboolela indi, iliwo batweela khuubo babemikhile ano, babaakhalibonakho khuufwa ta, khukhwoolisa ni balibona Buyiinga bwa Wele, nga bwiitsa ni kamaani.”

²Lwanyuma nga abirerewo bifukhu bisesaba, Yesu waatsya ni Petero, Yakobo ni Yokana, waabayila khu lukiingi luleeyi, baaba iyo bonyene. Nga bali ibweene iyo, Yesu waakalusibwa shifwaani sheewe nga babona.

³Bikwaaro byeewe byekyela biwaanga tselelele, nga bimweekhamweekha. Mbaawo khu shiibala shishiindu shishinyala shaasiinga bikwaaro byaaba biwaanga nga ibyo ta.

⁴Khaangukho abonekhawo Eliya ni Musa nga balikho bakanikha ni Yesu.

⁵Kila Petero aloma Yesu ari, “Umuleekeli, nga shilayi ifwe khuuba nga khuli ano! Khayo khwombakhe bisari bitaru, nga shitweela shishoowo, shishindi sha Musa, ni shishindi sha Eliya.”

⁶Petero aaloma aryo khulwekhuuba abe bye khuuloma byaamukoraanile, khulwe shiriiso shikali.

⁷Lwanyuma abonekhawo namufweeli, ni shishiniini sha namufweeli mweene shaabafuusilisa. Kila likono lyaama mu namufweeli yuno nga liloma liri, “Uyuno ali Umwaana wase umukanwa, ni mulondelele byeesi ababoolela.”

⁸Khaangukho bari balola iyi ni neeyi, baalekha khubona umuundu yeesitsana nga ali ni nabo ta, akhali Yesu yenyene.

⁹Ne Yesu ni baleekelwa beewe ni baaba nga beekha aasi khukhwaama khu lukiingi, waabakhoonyakilila ari balekhe khuboolelakho umuundu yeesi bibiindu byeesi baabona ta, khukhwoolisa nga Umwaana w'Omuundu waalamukhile khukhwaama mu bafu.

¹⁰Nabo baaliinda shimoonyo isho, baalekha khushisalanisa ta, ne nga bereeba she khuulamukha khukhwaama mu bafu sheesi shimanyisa.

¹¹Baleekelwa bataru tsana ba Yesu baamureeba bari, “Shiina kila baleekeli be Kamakaambila ka Musa baloma bari Eliya akhiile khuunyoowa khukhwiitsa?”

¹²Yesu wabeelamo ari: “Ilala Eliya ali ni khuunyoowa khukhwiitsa khuuŋoonaŋoona bibiindu byoosi. Ni bibyaronebwa bikhosefu sibiloma kh'Umwaana w'Omuundu biri, ali ni khuutaambisibwa lukali naabi naluundi bamwikaane?

¹³Ne imbaŋaŋasa ndi, Eliya waamala khaale khukhwiitsa, ne nga bibyaronebwa bikhosefu ni biloma, baamubirisa buubi.”

¹⁴Yesu n'akobola ni baleekelwa beewe bataru, baabona lituuli lye babaandu likali. Abe baleekeli be Kamakaambila ka Musa balikho bakhaandisana ni nabo.

¹⁵Babaandu boosi ni baabona Yesu beyaanga, kila batima khu mwakaanila.

¹⁶Yesu waabareeba ari, “Abe mulikho mukhaandisana khu shiina ni nabo?”

¹⁷Umuundu khukhwaama mu lituuli lye babaandu kila aloma ari, “Umuleekeli, indeerire umwaana wase is'uli, khulwekhuuba alikho shisaambwa shiibi, shishikhamufukiilila wakanikha ta.

¹⁸Nga shisaambwa shino shaamwinyukhiile, shimuwaamba shaamukhupa aasi, waatutuba lifulo imunwa, waaluma kameeno woomelakho, naluundi waabalikha. Inomele baleekelwa boowo ndi bashitimise shirure khu mwaana wase, ne baalekha khunyala ta.”

¹⁹Kila Yesu abeelamo ari, “Inywe simuli ni khufukiilila ta! Kane imbe ni nanywe khukhwoolisa imbuka shiina? Kane imbekhalilikhe khukhwoolisa liina? Ni mureere ano umwaana uyo.”

²⁰Baareera umwaana isi Yesu. Khaangukho shisaambwa ni shabona Yesu, shakhupa umwaana tsana aasi, wapiringikhaka, waabalikha, waatutuba lifulo imunwa.

²¹Yesu wareeba paapa w'omwaana ari, “Shino shaamukholikhakho khuumala imbuka shiina?” Paapawe welamo ari, “Khukhwaama mu bwaana.

²²Kimiluundi kimikali kumutuuma mu mulilo ni mu meetsi, nga kukhakakho khumwiira. Ne abe noola iliwo sheesi unyala wakhola, n'ukhuwaambile shiisa ukhuyeete.”

²³Yesu waamureeba ari, “Uri noola unyala? Imbaawo shishinyala shakhaasisa umuundu uli ni khufukiilila ta.”

²⁴Khaangukho kila paapawe w'omwaana tsana alomela angaaki ari, “Ifukiilila! Ikhaba nga khufukiilila khwase khuli khukyeekhe, ne n'unjeete.”

²⁵Ne Yesu n'abona nga lituuli lye babaandu likali lilikho libuusana, wakhookhela shisaambwa shiibi khuutsya. Waashilomela ari, “Shisaambwa shishikhakanikha ta, naluundi shimiinyi, ikhulakila khuumururakho utsye. Naluundi ukheetsa welakho wamukobolatsakakho luundi ta.”

²⁶Shisaambwa shiibi tsana shaalila ni likono lye angaaki, shaamukhola waabalikha, shaamururakho, ne umusoleeli waarama busa nga ali nga ufwiile. Ni babafuurisa bukali baaloma bari, “Wafwiile.”

²⁷Ne Yesu waamuwaamba kumukhono waamwinyusa, umusoleeli wenyukha weema.

²⁸Nga Yesu ni baleekelwa beewe baamalile khukhwinjila mu ntsu, kila bamureeba bari, “Lwashiina ifwe khukhaasikhanile khuutimisa kusaambwa ukwo?”

²⁹Yesu welamo ari, “Kusaambwa kwe saambo yino imbaawo isaambo iye khuukutimisa ta, akhali nga waraambisile khuuloomba.”

³⁰Yesu ni baleekelwa beewe baama ibweene iyo belooselayo baatsya, nga babirira mu Galilaaya. Walekha khukana umuundu yeesi khumanya shino ta,

³¹khulwekhuuba abe alikho aleekela baleekelwa beewe. Wabaleekela ari, “Umwaana w'Omuundu balimuwaanayo mu mikhono kye babaandu bamwiire. Ne lwanyuma lwe khumwiira, ilibirawo bifukhu bitaru alamukhe khukhwaama mu bafu.”

³²Ne baleekelwa baalekha khumanya sheesi Yesu aba amanyisa ta, ne baarya khumureeba.

³³Ni boola i Kaperunaumu, benjila mu ntsu, kila Yesu abareeba ari, “Mubeele mulikho mukhaandisana shiina khu ntsila?”

³⁴Ne boosi basila busa, khulwekhuuba khu ntsila baaba balikho bakhaandisana oba naanu ufuura bukhulu mu nibo.

³⁵Yesu wekhala aasi walaanga baleekelwa liikhumi na babili, waabaloma ari, “Noola umuundu yeesi akana khuuba unyoowa, ali ni khuuba niye uwakamayo naluundi ali ni khuuba umwakaanisi uwa boosi.”

³⁶Wahaamba umwaana umufwiiti wamwiimisa akari abwe. Kila atiila kamakhono keewe khu mwaana uyo waaloma ari,

³⁷“Buli uyo yeesi uwakaanila akhaba umwaana umufwiiti nga yuno mu lisiina lyase, aba wantsakaanile ise. Na buli muundu uwuntsakanila ise, aba wakaaniile uyo uwanduma ise.”

³⁸Yokana waalomela Yesu ari, “Umuleekeli, khunyoolile umuundu nga atimisa kimisaambwa kimibi nga araambisa lisiina lyoowo, khwamwakamisa khulwekhuuba s'ali mutweela khusi ifwe ta.”

³⁹Ne Yesu wakobolamo ari, “Mukhamwakamisa ta; khulwekhuuba imbaawo umuundu unyala khuukhola bye kamakaanga mu lisiina lyase, ate ndi khaangu akho waanganikhakho buubi ta.

⁴⁰Uyo yeesi ukhali umusiku isi khuli ta, aba ali khu luwaande lulweefwe.

⁴¹Khulwekhuuba ilala ise mbaboolela inywe ndi, umuundu yeesi ukane abawatsake akhaba shikopo she kameetsi ke khunywa, khulwekhuuba muli baloondeleli ba Kristo, alifuna kumukheemba.”

⁴²Yesu weloosela waaloma ari, “Umuundu yeesi n'akane akile mutweela khu bakyeekhe bano babafukiilila mus'iise boneke, shaandibeele shilayi umweene uyo khuubowebwa lusisi mumilo atuumibwe mu nyaantsa.

⁴³Noola kumukhono kwoowo kukila iwe waakhola bibyoonako, kukhalekho ukutuume. Khulwekhuuba shiba shilayi iwe khukhwinjila mu bulamu nga uli ni kumukhono mutweela, khuminyisa n'uba ni kamakhono koombi ne watuumibwa mu mulilo kukukhasima ta.

⁴⁴Ibweene iyo iliyo tsinyeende tsitsikhafwa ta, ni kumulilo kukhasima ta.[14]

⁴⁵Noola shikyele shoowo shikila iwe waakhola bibyoonako, shikhalekho ushituume. Khulwekhuuba shiba shilayi iwe khukhwinjila mu bulamu nga uli ni shikyele shitweela, khuminyisa n'uba ni bikyele bibili, ne watuumibwa mu kumulilo kukukhasima ta.

⁴⁶Ibweene iyo iliyo tsinyeende tsitsikhafwa ta, ni kumulilo ku khasima ta.

⁴⁷Noola imoni yoowo ikila iwe wakhola bibyoonako, kirusemo ukituume. Khulwekhuuba shiba shilayi iwe khukhwinjila mu Buyiinga bwa Wele nga uli ni moni indweela, khuminyisa n'uba ni tsimoni tsibili, ne watuumibwa mu mulilo kukukhasima ta.

⁴⁸Ibweene iyo iliyo tsinyeende tsitsikhafwa ta, ni kumulilo kukukhasima ta.

⁴⁹Khulwekhuuba buli mutweela balimutsukhakho kumulilo kumupyeluuse musaambo niyo ndweela nga n'upyeluusa isaayilo.

⁵⁰“Kumuunyu kumukhelekho kumulayi; ne itsamu n'iwamo, unyala khukisamo luundi? Ni mubaatsake nga kumukhelekho, nio munyalise khumenya mu lukoosi na buli mutweela.”