Read lumasaaba Luka 10 Bible Online

Luka 10 - lumasaaba bible

Luka 10

¹Lwanyuma lw'ebyo, Umukasya waarobola babaandi kamakhumi musaafu na babili, waabarumana khuutsya babili, babili, khuumwinyoowayo ibweeni, mu buli shiriimba, na buli shifwo abe esi umweene atsya khuutsyamo.

²Waabaloma ari, “Likyesa likali, ne babaakyesa bakyeekhe. Nashiryo ni muloombe Umukasya umweene we likyesa arumane baraambi babaandi mu likyesa lyeewe.

³Ni mutsye ana ari, bona mbarumana inywe nga kamasheese kamaana akari mu bitsuutse.

⁴Mukhayila khasawu khe tsinusu, namwe isawu ye bisutwa, namwe bilaalo, namwe mukhasheesa umuundu yeesi mu ntsila ta.

⁵Na buli ntsu isi mwinjilamo, munyoowa khuloma muri, ‘Lukoosi lube mu ntsu muno.’

⁶Noola mu ntsu umwo mulimo umuundu uwasiima lukoosi, khuusheesa khweenywe khwe lukoosi kane khurame khu niye. Ne noola ta, kane lukoosi lukobole isi muli.

⁷Muramatsaka mu ntsu nyene iyo, nga mulya luundi nga munywa shoosi sheesi babawa, lwekhuuba umuraambi akhila kumukheemba kweewe. Mukhakyeendaana kimilyango ta.

⁸Ni muba nga mwenjiile mu shiriimba ne babakaanila, ni mulye shoositsana sheesi babawa.

⁹Muwonese balwaale babaaliyo, mubalome muri, ‘Buyiinga bwa Wele bwetsile isi muli.’

¹⁰“Ne buli shiriimba sheesi mutsyamo, ne baalekha khubakaanila ta, mutsye mu mikhoosi kye mu shiriimba isho, mulome muri,

¹¹‘Ni lifukhuulu lye mu shiriimba sheenywe, liliwaambile khu bikyele byeefwe, khulibasisakulila mwabeene,[5] ne ni mumanye muri, Buyiinga bwa Wele bwabesyendeele ambi.’

¹²Mbaboolela inywe ndi, khu shifukhu she khuukhala kumusaango, Wele aliwaambila shiriimba Sodoma shiisa khuminyisa shiriimba isho.

¹³“Nga she kumutaambo kumukali isi iwe Korazini! Nga she kumutaambo isi nawe Besusaida! Lwekhuuba bye kamakaanga bibyakholewela mus'iinywe, biba bibyakholewela i Tuulo, ni Sidoni, khali bayibiiyisa bibyoonako khaale, nga bekhala behanyakakho likoshe, nga bakwaarire bitsina khukhwokesanisa bari bebiiyisile bibyoonako.

¹⁴Ne Wele aliwaambila Tuulo ni Sidoni shiisa khu shifukhu she khuukhalilakho kimisaango khufuurisa inywe.

¹⁵Ni nawe, Kaperunaumu, wakana wamweene khukhwiniinisa mwikulu? Taawe, wutsya khwikhisibwa aasi i makoombe.”

¹⁶Yesu waaloma baleekelwa beewe ari, “Uyo ubarekeeresa inywe aba warekeeresile ise, ne uyo uwikaana khuubarekeeresa inywe, ni nase aba waantsikaanile. Ni nooyo uwuntsikaana ise, aba wekaanile uyo uwanduma ise.”

¹⁷Baarume tsana kamakhumi musaafu na babili bakobola ni kumwikhoyo, nga baloma bari, “Umukasya, ikhaba ni kimisaambwa kimibi kyakhuwulila mu lisiina lyoowo.”

¹⁸Yesu wabeelamo ari, “Nabona Sitaani nga awanukha nga luweni, khukhwaama mwikulu.

¹⁹Ne bona ise naabaweele inywe bunyala bwe khusaamba khu ndemu, ni makhata, ni khu maani koosi k'omusiku, naluundi inywe imbaawo shishinyala shabakholakho buubi mu saambo yoosi ta.

²⁰Ne mukhekhoya lwekhuuba kimisaambwa kimibi kibawulila ta, ne ni mwikhoye lwekhuuba kamasina keenywe karonewele mwikulu.”

²¹Mu saawa nyeneyo, Yesu nga wetsuule Umwoyo Umukhosefu, wekhoya, waaloma ari, “Paapa Umukasya we likulu ni shiibala, ikhusiima lwekhuuba bino wabibisa be kamakyesi ni baleekele, uryo wabibimbulila bababeele babaandu babusheele busa. Niabweene Paapa, shino yaba khusiima khwoowo.

²²Paapa, wayimba ise bibiindu byoosi, naluundi imbaawo na mutweela umanyile nga umwaana n'ali ta, khurusakho Paapa, luundi imbaawo umanyile Paapa nga n'ali ta, khurusakho Umwaana, ni naabo beesi Umwaana akhalawo khumubabimbulila.”

²³Lwanyuma Yesu weshebukha isi baleekelwa beewe waabaloma mu shimoonyo ari, “Nga muli ni khabi inywe khubona bibiindu byeesi mubona!

²⁴Lwekhuuba mbaboolela ndi, baŋoosi bakali ni bayiinga baakana khubona inywe byeesi mubona ari, ne sibabibonakho ta, ni khuwulila byeesi inywe muwulila ari, ne sibaabiwulilakho ta.”

²⁵Lulwoola abaawo umuleekeli we kamakaambila mutweela uweetsa isi Yesu khumukhakilisa, nga amureeba ari, “Umukasya nakhila khukhola shiina nio inyoole buulamu bukhawawo ta?”

²⁶Umukasya wamwiilamo ari, “Sharonebwa shiryeena mu makaambila? Kaloma karyeena?”

²⁷Umusaani welamo ari, “Sharonebwa shiri, kanaatsaka Umukasya Wele woowo, ni kumwoyo kwoowo kwoosi, ni bulamu bwoowo bwoosi, ni kamaani koowo koosi, luundi ni bibyambaaso byoowo byoosi; naluundi ukanatsake umwesanwa woowo nga iwe ni wikana wamweene.”

²⁸Yesu wamwiilamo ari, “Wakobolemo bulayi. Kholatsaka uryo, ni nawe kane ube umulamu.”

²⁹Ne lwekhuuba umuleekeli we kamakaambila akana khukhwiyokesana bulayi bweewe, wareeba Yesu ari, “Umwesanwa wase niye naanu?”

³⁰Yesu wamwiilamo ari, “Aabawo umusaani mutweela, uwaba nga aama i Yerusalemu nga eekha i Yeriko, waakwa mu banuuli, baamwabulamo tsingubo, baamukhupaka, baamulekha nga awootsawootsa busa.

³¹Ne lwanyumakho, aabawo umusaayi uwaba ali khuubira mu ntsila iyo, ne n'abona umusaani umukhupe, waamutataya, waabirawo khu luwaande luluundi, waatsya.

³²Luundi aabawo umusaani umu Levi, uweetsa mu shifwo sheenesho, waalola khu musaani umukhupe, waamutataya, waabirawo busa, waatsya.

³³Ne Umusamariya mutweela naye uwaba abira mu ntsila iyo, woola isi umusaani umukhupe. Ne n'amubona waamuwaambila shiisa,

³⁴waatsya is'ali, waabowelela kamakoontsyo, nga waamalile khuukatsukhakakho kamafura kakaawonesa atweela ni fiini. Lwanyuma waara umusaani umukhupe khu sikilya yeewe, waamureera mu ntsu iye bukono, waamuliindilayo.

³⁵Ni bwasha khu shifukhu shisheelakho, waabukula tsidinari tsibili, waatsiwa umuliindi wentsu ye bukono, waamuloma ari, ‘N'ulwaalise umusaani yuno, ne tsinusu tseesi kane ube waabirisilemo, nga nakoboole ikhaakhuliipe.’ ”

³⁶Kila Yesu areeba umuleekeli we kamakaambila ka Musa ari, “Aso naanu khu basaani bataru bano, isi waambaasa khuuba umwesanwa w'omusaani uwakwa mu banuuli?”

³⁷Umuleekeli wamwiilamo ari, “Uyo uwamukholela bye shiisa.” Kila Yesu amwiilamo ari, “Nawe n'utsye ukholatsake uryo.”

³⁸Ni lwoola, Yesu ni baleekelwa beewe, baaba batsya mu ntsila, weetsa khu shaalo shitweela khukhwabakho umukhasi uwalaangiwa Maliza, uwamwakaanila mu ntsu yeewe.

³⁹Maliza aba ni yaayawe umukyeekhe uwalaangiwa Malyamu, uwekhala aasi aambi ni bikyele by'Omukasya, nga arekeeresa khuleekela khweewe.

⁴⁰Ne Maliza waba mwiyembelefu naabi, lwe khubiraana khukali, lwe tsiŋoonaŋoona. Weetsa isi Yesu wamuloma ari, “Umukasya iwe siwinaanayo khubona nga yaaya wase wandekheele ise senyene khukhola bubwakaanisi bwe she khulya ta? Mulome etse anjeete.”

⁴¹Umukasya wamwiilamo ari, “Maliza! Maliza! Wariire luundi weyembeleele lwe bibiindu bikali.

⁴²Ne walekha khumanya uri, shishiindu shitweela shonyene nisho shishikaniwa ta; Malyamu warobolewo shifuura buulayi, nisho shikhalekhe khumurusibwakho ta.”