Read lumasaaba Luka 11 Bible Online

Luka 11 - lumasaaba bible

Luka 11

¹Lulwoola, Yesu aba nga ali khuloomba mu shifwo shitweela, mutweela khu baleekelwa beewe wamuloma ari, “Nafwe n'ukhuleekele khuloomba nga Yokana n'aleekela baleekelwa beewe khuloomba.”

²Yesu waabaloma ari, “Ni muba nga muloomba, muloma muri, ‘Paapa, Khayo lisiina lyoowo likhosefu liisibwemo lukoosi, buyiinga bwoowo bwiitse.

³Ukhuwe buli ndaalo biilyo byeesi khukana.

⁴Ukhwiyakhile bibyoonako byeefwe, nga nafwe nikhwiyakhila buli mutweela ukhukholakho buubi, ne ukhakhuyila mu khukhonjelesebwa ta.’ ”

⁵Lwanyuma Yesu waloma baleekelwa beewe ari, “Ne manya naanu khwiinywe uli ni musaale weewe, isi atsyayo mu shilo khukari, wamuloma ari, ‘Musaale, n'untsikhopeyo bukaati butaru,

⁶lwekhuuba iliyo musaale wase uwama khwoola iwase, ne mbaawo she khuulya sheesi inyala khuura mu moni tseewe ta.’

⁷Ne musaale weewe uli mu ntsu wamwiilamo ari, ‘Ukhandaambisa ta. Lulwiitsi lwekaliwilewo khaale, ise ni babaana baase khwakonele. Ni nashiryo ise shinyala khukhwinyukha khukhuwa shishiindu shoosi ta.’

⁸Imbaboolela ndi, ikhaba nga umusaani uyu s'enyukha wamuwa, lwekhuuba ali musaale weewe ta, ne khulwe khumuŋuunya tsifuunda ngali, enyukha wamuwa byoosi byeesi akana.

⁹“Nashiryo, imbaloma ndi, ni muloombe muliweebwa; muweentse mulinyoola; mukhonyake ni lulwiitsi lulibekuliwilawo.

¹⁰Lwekhuuba buli muundu yeesi uloomba aweebwa; ni nooyo uweentsa anyoola; ni nooyo ukhonyaka lulwiitsi lulikulibwawo.

¹¹Naanu mwiinywe uli paapa, nga umwaana weewe wamuloombile inyeeni, ulimuwa indemu?

¹²Namwe nga wamuloombile liiki, ulimuwa makhata?

¹³Aso, inywe mumuuli baabi, noola mwamanya khuuwa babaana beenywe biwaanwa bilayi, Paapa weenywe uli mwikulu s'alifuurawo naabi khuuwa Umwoyo Umukhosefu isi ibo babamuloomba?”

¹⁴Ni lwoola, Yesu aba nga awoona shisaambwa shiibi shishaba shakalusa umusaani khuuba wawuma. Ne ni sharura khu musaani, wakanikha, ni babaandu beyaanga.

¹⁵Ne babaandi khu nibo baloma bari; “Oyu awoona kimisaambwa kimibi, khulwa Belizebuli, umukhulu we kimisaambwa kimibi.”

¹⁶Ne babaandi bamukhakilisa kila bakana abokesane khabonelo khe kamakaanga khukhwaama mwikulu isi Wele.

¹⁷Ne Yesu n'amanya bibyambaaso byaabwe, waaloma ari, “Buli buyiinga bwoosi bubwawukhanamwo bwonyene na bwonyene, buba bwoolile khuhela, ni muungo mumubamo khukhwawukhanamo simulama ta.

¹⁸Nashiryo, Sitaani n'aba nga wawukhanilemo yenyene, buyiinga bweewe bulimikhawo buryeena? Lwekhuuba inywe muloma muri, ise mboona kimisaambwa kimibi khulwe kamaani ka Belizebuli.

¹⁹Ise n'imba nga mbiwoona khulwe kamaani ka Belizebuli, baloondeleli beenywe babiwoona khulwe kamaani ka naanu? Nashiryo, nibo kila balibakhalila kumusaango.

²⁰Ne noola abe ise mboona kimisaambwa kimibi lwe kamaani ka Wele, shino shokesana shiri, Buyiinga bwa Wele bwa bwaamalile khaale khubeetsila.

²¹“Noola umuundu we kamaani, esabikha bye busoolo byeewe bibimala, waliinda lumako lweewe mu lukoosi, bibiindu byeewe biba byaliindibwile bulayi.

²²Ne umuundu umufuura kamaani n'amwibwaakala, wamuwula, abukula bye busoolo byeewe byoosi, abe byeesi eyikina, wayila bibiindu wabikabananisamo.

²³Uyo yeesi ukhali atweela ni nase, niye umusiku wase, ni nooyo ukhabuusanisila atweela ni nase ta, asalanisaka.”

²⁴“Ne shisaambwa shiibi ni shirura mu muundu, shikyeendaana mu bifwo bibikhalimo kameetsi ta, nga shiweentsa ekhuwolela. Ne ni shilekha khunyoola ta, shilomela shisheene shiri; ‘Khangoboleyo mu ntsu mweesi naama.’

²⁵Ni shikobola, shinyoola intsu nga intseye bulayi, nga ibonekha bulayi.

²⁶Shiryo shirura shelayo, shareera bisaambwa bibiindi musaafu bibishifuurakho buubi, byenjila byaaba mubweenemwo. Aso bibyakamayo by'omuundu uyo biba biibi naabi khufuurisakho bibyanyoowa.”

²⁷Yesu n'aba nga akanikha khu biindu bino, umukhasi mutweela mwituuli lye babaandu waalomela angaaki ari, “Nga ali ni khabi maayi woowo uwakhusaala, luundi wakhununisa.”

²⁸Ne Yesu waamwiilamo ari, “Ne khufuurira ilala bali ni khabi abo babaawulila Ilomo ya Wele, baakikholelakho.”

²⁹Ulwo kamatuuli ke babaandu ni keloosela khukhwiitsa, Yesu weloosela nga aloma ari, “Nga baabi babaandu be kumuboolo kuno! Nibo baweentsa khabonelo khe kamakaanga, ne mbaawo khabonelo khe kamakaanga khakhalibaweebwa ta, khurusakho khabonelo kha Yona.

³⁰Aryo nga Yona n'aba khabonelo isi babaandu be Nineve, n'Umwaana w'Omuundu naye aryo nga n'aliba khabonelo isi babaandu be kumuboolo kuno.

³¹Khu shifukhu she khuukhalilakho kumusaango, umuyiinga umukhasi, uwaama imwaalo we shiibala, alinyukha akhalile babaandu be kumuboolo kuno kumusaango kubafuure, lwekhuuba aakyeenda khukhwaama luwaande lutweela lwe shiibala, nga akana khuurekeeresa bye kamakhula ka Solomoni. Ne bona ari ufuurisakho Solomoni ali ano.

³²Naluundi khu shifukhu she khuukhalilakho kumusaango, babaandu be Nineve, balimikha atweela ni babaandu be kumuboolo kuno, babafuurise kumusaango, lwekhuuba nibo bebiiyisa bibyoonako byaabwe, lwanyuma lwe khuuwulila Yona nga ababoolela. Ne bona ufuurisakho Yona ali ano.

³³“Mbaawo umuundu uwaambisa itaala, lwanyuma wakira imuluungu ta, namwe wakifumalikhakho shishipo ta. Ne akira khu shisiindi nio akile buli muundu uwinjila mu ntsu abone buwaanga.

³⁴Itaala iye kumubili kwoowo nitso tsimoni tsoowo. Tsimoni tsoowo ni tsiba tsindayi, kumubili kwoowo kwoosi kuba kwetsuule buwaanga. Ne tsimoni tsoowo ni tsiba tsiimbi, ni kumubili kwoowo kwoosi kuba kwetsuule shishiilima.

³⁵Nashiryo, khakakho khukhwiliinda khubona uri, buwaanga bubukhulimo, sibwikyela shishiilima ta.

³⁶Nashiryo, noola kumubili kwoowo kwoosi kuba kwetsuule buwaanga, nga mbaawo shisiintsa shoowo na shitweela shishiili mu shilima ta, kane kumubili kwoowo kwoosi kwitsule buwaanga nga itaala ni yaburukha yakhumulikhila buwaanga bwayo”.

³⁷Yesu n'amala khukanikha bino, Umufarisaayo mutweela wamuloomba ari atsye alyekho biilyo iweewe. Aryo Yesu waatsya wikhala aasi khuulya.

³⁸Ne Umufarisaayo n'abona Yesu nga wikhaale alya nga ashiili khusaaba mukhono ta, weyaanga.

³⁹Kila Umukasya aloma ari, “Inywe Bafarisaayo mumiliisa khu ngaaki khwe shikhopo ni sowaani, ne mukari mweenywe mwetsuulemo bulyakhani ni bulosi.

⁴⁰Inywe babaandu basilu, mwaambaasa muri Wele uyo uwakhola khu ngaaki s'ali niye uwakhola ni mukari ta?

⁴¹Ne ni muwaaneyo khwiibyo bibiili mu shikhopo ni mu sowaani, isi bataambi, biryo byoosi kane bibe bimiliwu isi muli.

⁴²“Nga she kumutaambo isi inywe Bafarisaayo! Muwa Wele shisiintsa shitweela she liikhumi sh'ebyo bibiŋaayisa ni bibiluluwisa tsinyanyi nga bitungulu ni bibintsaali, byeesi mukyesa, ne mwebilila khuuba baŋali isi basheenywe, ni khuukana Wele. Bino mwandibeele nga mubikhola akhali khukhwibilila bibiramile bibiindi ta.

⁴³“Nga she kumutaambo isi nywe Bafarisaayo! Lwekhuuba mukana bitsoloŋo bye angaaki mu ntsu tsye khukhwisaayilamo, luundi mukana khusheesebwa ni shiriifwa mu butale.

⁴⁴Nga she kumutaambo isiinywe Bafarisaayo! Lwekhuuba muli nga tsiŋani tsikhelulukhilila ta, tseesi babaandu bakyeendelakho, ne nga sibamanya ta.”

⁴⁵Kila mutweela khu baleekeli be kamakaambila ka Musa amwiilamo ari, “Umuleekeli n'uloma uryo, ni nafwe uba wakhukhomelemo.”

⁴⁶Yesu wiilamo ari: “Ne nga she kumutaambo isi inywe nanywe baleekeli be kamakaambila ka Musa! Lwekhuuba mutwiikha babaandu babaandi bisutwa byeesi bakhanyala khusuta ta, ne inywe mwabeene nga simunyala ni khukhwinyusa lulwaala khubayeetakho ta.

⁴⁷Nga she kumutaambo isi inywe! Lwekhuuba mwombekhela baŋoosi tsiŋani tsindayi, baŋoosi beene beesi bakuuka beenywe beera.

⁴⁸Nashiryo inywe muwandalasa nga mukakasa byeesi bakuuka beenywe baakhola nga beera baŋoosi, inywe mwombekha tsiŋani tsaabwe.

⁴⁹Nilwe lomo yino, kila Wele mu makyesi keewe aloma ari, ‘Ndibarumanila baŋoosi, ni baarume, ni khubeenebo, baliirakho balala, ni babaandi babakubyeenge.’

⁵⁰Nashiryo babaandu be kumuboolo kuno baliweebwa shitaambiso lwe kamafuki ke baŋoosi boosi kakatsutsukha khukhwaama iburakikhilo we shiibala,

⁵¹khukhwaama khu mafuki ka Abeli, khukhwoolela ilala khu mafuki ka Zekariya, uweriibwila akari e shisheeso ni shifwo shikhosefu mu Lisaayilo Likhulu. Ni shisheene, imbaboolela ndi, kumuboolo kuno kuliweebwa shitaambiso lwe kamafuki kakatsutsukha.

⁵²“Nga she kumutaambo kumukali isi inywe baleekeli be kamakaambila ka Musa! Lwekhuuba mwayila shifuungo shishikulawo kumulyaango kwe khumanya. Inywe mwabeene simwinjila ta, ni naabo babakana khukhwinjila, inywe mubakhingilila.”

⁵³Lwanyuma Yesu n'arura mu ntsu, baleekeli be Kamakaambila ka Musa ni Bafarisaayo bamwibwakaala nga bamukhaabisa lukali, ni khumureebelesa bibiindu bikali,

⁵⁴nga sheesi batsiililila nikhwo khumukhakilisa nio babone nga aloma shishiindu shiibi.