Read lumasaaba Luka 12 Bible Online

Luka 12 - lumasaaba bible

Luka 12

¹Nga bili biryo, babaandu bakali babuusana, nga bayindana busa. Yesu warakikha khukanikha, khunyoowa isi baleekelwa beewe, nga abaloma ari, “Ni mwiliinde kamamela ke Bafarisaayo, niko khukhwikholisa khwawe.

²Lwekhuuba mbaawo shishabiimbibwakho shishikhalibonesebwa ta, namwe shishabisibwa shikhalimanyikha ta.

³Ni lwe lomo yino, shoosi sheesi muba nga mwakaanikhiile mu shilima, balishiwulilila mu lubuula; ni sheesi muba mwakaanikhiile mu shifwo shishikisile, mu shiseenge, balishiwulilila khu shisuli khu ngaaki khwe ntsu.

⁴“Luundi mbaboolela inywe basaale baase ndi, mukharya babaandu babeera kumubili busa ta, ne lwanyuma bakhanyala khubakho ni shishiindi sheesi banyala bakhola ta.

⁵Ne kane imbokese uyo isi kane muryatsake: Ni murye Wele, lwekhuuba niye n'amala khukhwiira, ali ni bunyala khutuuma mu mulilo kukukhasima ta. Ii, ilala mbaloma ndi, ni mumurye niye.

⁶Banamundyoole baraano, sibakulisibwamo kamaŋooti kabili? Ne mbaawo na mutweela khu nibo, isi Wele ebilila ta.

⁷Ilala ikhaba litsuune lye khu murwe kwoowo lyoosi lyabaliwa. Nashiryo mukharya ta, lwekhuuba inywe muminyisa bulayi binywiinywi bikali bibyeene.

⁸“Naluundi mbaboolela ndi buli muundu yeesi uwibuula ari ali uwase mu moni tse babaandu, Umwaana w'Omuundu naye alimubuula isi bamalayika ba Wele.

⁹Ni nooyo uwuntsikaanila mu moni tse baandu, naye aryo alikaanibwa mu moni tse bamalayika ba Wele.

¹⁰Na buli muundu yeesi uloma ilomo imbi khu Mwaana w'Omuundu anyala weyakhilwa. Ne uyo ufwotsola Umwoyo Umukhosefu, si bali mwiyashila bibyoonako byeewe ta.

¹¹“Ne ni babareera mu ntsu tsye khukhwisaayilamo, namwe isi babaakhala kimisaango, n'isi bawuli be bunyala boosi, mukheyembelela isaambo iye khukhwiwotsamo ta, namwe she khukhwiilamo ta.

¹²Lwekhuuba mu mbuka nyeneyo, Umwoyo Umukhosefu, kane abaleekele sheesi mwakha mwaloma.”

¹³Mutweela khuubo baaba mwituuli lye babaandu waloma Yesu ari, “Inomele wandaayase khukabanane bye busikha bwa paapa.”

¹⁴Yesu wamwiilamo ari, “Musaaniwe, naanu uwaamba ise bunyaala bwe khubakaya namwe bwe khubakabananisa inywe bibiindu byeenywe?”

¹⁵Aryo Yesu weloosela khubaloma boosi babaabawo ari, “Ni mube meeso, mwiliinde mwabeene, nga simwinjila mu muluungo kwa buli saambo ta. Lwekhuuba buulamu bw'omuundu bwelala, sibuli mu biindu byaali nabyo ta, akhaba nga ali muyindifu arye!”

¹⁶Shikila lwanyuma Yesu waababoolela lusimo luno ari, “Aabawo umusaani umuyindifu mutweela, uwaba ni liiswa lyeewe, lyaama biilyo bulayi.

¹⁷Weyambaasa mu mwoyo kweewe ari, ‘Kane ikhole ndyeena? Lwekhuuba siindi ni ekhubiikha biilyo byase ta.’

¹⁸Lwanyuma waaloma ari, ‘Kane ikhole ndi: Kane ifuniake biirara byase byoosi, nombakhe bibiindi biboofu khufuurisakho, imbikhemo biilyo byase, ni bibiindu byase bibiindi bilayi.

¹⁹Lwanyuma ise nilomele mu mwoyo ndi; nga uli ni bibiindu bilayi bikali byeesi wibikhiile, bye khumala kimiiko mikali. Ari yikhala uwole, ulye, unywe, wikhoye!’

²⁰Ne Wele waaloma ari, ‘Iwe umusilu, shiilo shino, bulamu bwoowo butsya khukhurusibwakho, ari naanu wuutsya khukhwiila khu biindu bino byoosi byeesi wetikiya wamweene?’ ”

²¹Nashiryo Yesu wamalilisa nga aloma ari, “Kane shibe shiryo isi buli mutweela uwibiikhila umweene buyiindifu bwe shiibala, ne nga s'ali umuyindifu mu moni tsa Wele ta.”

²²Lwanyuma Yesu waalomela baleekelwa beewe ari, “Mukheyembelela khu bulamu bweenywe byeesi kane mulye ta, namwe lwe kimibili kyeenywe muri kane mukwaare shiina ta.

²³Lwekhuuba buulamu buli bukhulu naabi bufuurisa biilyo, ni kumubili kuli mukhulu khufuurisa bikwaaro.

²⁴Ni mwaambaase khu binywiinywi bibilaangibwa khoolo. Nibyo sibimiitsa bimiitswa, namwe sibikyesa ta, sibili ni biirara namwe esi bibuunga ta, ne Wele abiliisa. Inywe simufuurira aleeyi binywiinywi ta?

²⁵Naanu khusiinywe unyala khukhwilooselakho kimiiko kikiindi lwe khukhwiyembelela?

²⁶Noola simunyala akhaba shishiindu shikyeekhe busa nga shino ta, lwashiina mwiyembelela lwe bibiindu bibiramile?

²⁷“Ni mwaambaase isaambo isi bimuli bye mwirome bitsowamo, sibiraamba namwe sibikholela bikwaaro ta, ne mbaboolela ndi, ni Solomoni uwaba ni shiriifwa shibiririfu, s'akwaarakho bikwaaro bilayi nga bimuli bino ta.

²⁸Ne oba nga Wele niye ukwaarisa bimuli bino bye mwirome, bibibawo shaleelo, ne kumukaamba byaaba byomile, byatuumibwa mu mulilo, singene anyalise khubakwaarisa inywe, inywe babaali ni khufukiilila khukyeekhe?

²⁹“Ni nashiryo mukhemalila kimyoyo kyeenywe khu byeesi kane mulye, namwe byeesi kane munywe ta, mukheyembelela khu lweebyo ta.

³⁰Lwekhuuba babaandu boosi be mu shiibala bakhamanya Wele, beemalila khu biindu nga bino, ni Paapa weenywe wamanya ari bibiindu bino mubikana.

³¹Ne ni munyoowe muweentse Buyiinga bwa Wele, ni bibiindu bino bibiramileyo kane abibalooselekho.

³²“Mukharya ta, inywe lituuli lye babaandu likyeekhe, lwekhuuba Paapa weenywe musangaafu khubawa inywe buyiinga.

³³Ni mukulise bibiindu byeenywe, mukabile bataambi tsinusu, ni mwinabile mwabeene busawu bwe tsinusu bukhakora ta, mwibikhile buyiindifu bweenywe mwikulu, isi bukhanyala khuwawo ta. Lwekhuuba umwiifwi s'olayo ta, namwe isi tsisilili tsikhanyala tsonakisila ta.

³⁴Lwekhuuba isi buyiindifu bwoowo buba, ibweeneyo niyo yeesi kumwoyo kwoowo nakwo kuba.”

³⁵Yesu weloosela nga aloma ari: “Ni mukwaare mwirekekhe, nga mwebowele kumukhandaala mu shikuute, ni tsitaala tseenywe nga tsaburukha.

³⁶Ni mube nga babaandu babaaliindilila umukoosi waabwe khukobola nga ama khu mayiiya ke bukhwaale, nio nga wakoboole, wakhonyakile khu lwiitsi, bamwikulilawo khaangukho.

³⁷Nga bali ni khabi, babakaanisi ibo beesi umukoosi waabwe anyoola nga bali meeso! Ilala mbaboolela ndi alikwaara bikwaaro bye bubwakaanisi, abasosomolele bekhale balye, niye etse abakaanise.

³⁸Kane shibe she kumwikhoyo isi babakaanisi ibo beesi umukoosi waabwe anyoola nga bali berekefu, akhaba shiilo khukari, namwe nga tsingokho tsikholookha.

³⁹Ne ni mumanye shino muri, umweene ntsu aba umanya imbuka isi umwiifwi kane etsilemo, si yandifukiilisile umwiifwi khufuna intsu yeewe ta.

⁴⁰Ni nanywe muryo mwakhiile khuuba berekefu, lwekhuuba Umwaana w'Omuundu alitsila mu mbuka yeesi mukhamwaambaasilisilamo ta.”

⁴¹Kila Petero areeba ari, “Umukasya, ulikho ukanikha lusimo luno, isi ifwe, namwe isi buli muundu?”

⁴²Umukasya welamo ari, “Naanu niye umwakaanisi umwiyikinwa luundi umukyesi, isi umukoosi weewe akalusa khuuba umuloleleli we babakaanisi beewe babaandi, nga abawa kumukabo kwe biilyo byaabwe mu mbuka inyene?

⁴³Nga ali ni khabi umwakaanisi uyo, isi umukoosi weewe alikobola anyoole nga akhola aryo!

⁴⁴Ilala mbaboolela ndi, umukoosi weewe alimukalusa khuuba umuloleleli we bibiindu byeewe byoosi.

⁴⁵Ne singa umwakaanisi uyo elomela mu mwoyo kweewe ari, ‘Umukoosi wase wekhaaleyo khukhwiitsa,’ aryo warakikha khukhupa babakaanisi baashe basaani atweela ni bakhasi, weela ni mu khulya, ni khuunywa, ni khumeela.

⁴⁶Umukoosi w'omwakaanisi uyo kane akobole, khu shifukhu sheesi umwakaanisi uyo akhamwaambaasilamo ta, ni khu mbuka yeesi akhamanya ta. Umukoosi uyo alimuwa shitaambiso, amuweele atweela kumukabo ni bakhafukiilila ta.

⁴⁷“Ne umwakaanisi uyo umanya byeesi umukoosi weewe akana, ne walekha khwiŋoonaŋoona khubikhola ta, namwe walekha khukhola byeesi umukoosi weewe akana bibyeene ta, alikhupiwa tsimiimbo tsingali.

⁴⁸Ne umwakaanisi ukhamanyile byeesi umukoosi weewe akana ta, ne wakhola bibiindu bibimwakhila khuweebwa shitaambiso, alikhupiwa tsimiimbo njeekhe, lwekhuuba buli muundu uweebwa bikali alikanibwakho bikali, ni nooyo uwabikhisibwa bikali ni babaandu, balimureeba khureera bikali.

⁴⁹“Ise neetsa khureera kumulilo khu shiibala, shandibeele shilayi abe kuba kukurakikhile khukhwaburukha!

⁵⁰Ise indiyo ni khubatisibwa khweesi iniindiliile khubatisibwa, ne nga ndi ni kumutaambo mukali khukhwoolesa ni shilyoolelela.

⁵¹Mwaambaasa muri ise neetsa khureera lukoosi khu shiibala? Taawe! Mbaboolela ndi, ise neetsa khureerera babaandu khukhwawukhanamo.

⁵²Lwekhuuba khukhwaama shaleelo, muungo mumubamo babaandu baraano, kane mwawukhanemo; bataru nga bakhabisa babili, ni babili nga bakhabisa bataru.

⁵³Bano balyawukhanamo: paapa awukhane n'umwaana weewe umusiinde, n'umwaana musiinde awukhane ni paapawe. Maayi awukhane n'umukhaana weewe, n'umukhaana awukhane ni maayiwe. Ni maayi w'omuseetsa awukhane ni mukho mwaana weewe.”

⁵⁴Yesu wakanikha luundi isi babaandu ari, “Nga mwaboone kamafuumbi kaniina khukhwaama ibukwa nyaanga, abweene ni abweene muloma muri, ‘Ifula kane ikwe.’ Iryo yaakhupa.

⁵⁵Luundi ni muwulila imbewo iyaama imwaalo we shiibala muloma muri, ‘Kane bukhafu bubewo,’ ate shaaba shiryo.

⁵⁶Inywe babeeyi, mwamanya khukhwimenielesa shiibala ni likulu nga ni bifwaana, mwaboola nga bubwiile ni kane bube. Lwashiina mukhamanya khuboola kamakhulu ke bisiintsa bino?”

⁵⁷“Ne lwashiina mwabeene mukhekhalilawo shishiindu shituufu she khukhola?

⁵⁸Ne n'uba nga uli khuutsya w'omukayi n'umusiku woowo, khakakho khuŋoona bibiindu byeenywe nga mushiili mu ntsila, nio alekhe khukhukhwekhwesa khukhuyila mu moni tsy'omukayi; nio umukayi alekhe khukhuwaanayo isi umusilikhale, khukhura mu mapuusu ta.

⁵⁹Ikhukakasa ndi, s'ulinyala khururayo ta, khukhwoolesa n'ulimala khuwanda inusu iyakamayo iye likobi.”