Read lumasaaba Luka 13 Bible Online

Luka 13 - lumasaaba bible

Luka 13

¹Mu mbuka iyo, batweela khu baandu babaabawo, baboolela Yesu khu biwaamba khu baandu be Galilaaya beesi Pilato eera, ni kamafuki kaawe, wakatubaasa ni tsisaayilo tseesi bawayo isi Wele.

²Yesu welamo ari, “Mwaambaasa muri ba Galilaaya ibo baaba babonaki naabi khufuura ba Galilaaya babaramile, lwekhuuba bataambisibwa musaambo yino?

³Mbaboolela indi taawe! Ne ni mulilekha khukhwibiiyisa, nanywe mulihela mweesi musaambo iyo.

⁴Namwe abo liikhumi na shinaane beesi intsu yakwakho i Siloamu yabeera. Mwaambaasa muri nibo baaba baboonaki naabi khufuurisa babaandu babaaramile boosi, babaaba mu Yerusalemu?

⁵Mbaboolela ndi taawe! Ne nanywe ni mulilekha khukhwibiiyisa, mulihela mweesi musaambo iyo.”

⁶Aryo Yesu waababoolela lusimo luno ari: “Aabawo umusaani uwaba ni kusaala kweewe kukwaana bibyaamo kweesi balaanga bari ku figi, abe kweesi aabyaala mu mukuunda kweewe. Lwanyuma waatsya waweentsakho bibyaano, ne waalekha khunyoolakho ta.

⁷Kila aloma umuraambi we mu mukuunda kweewe ari, ‘Bona, mu miiko kitaru mbeele niitsa ano, khuweentsa bibyaano khu kusaala kuno ku figi, ne nalekha khunyoolakho ta. Kureme ukukwiise aasi. Lwashiina kwonakisa busa liiloba?’

⁸“Umuraambi welamo ari, ‘Musakhulu, kusaala kuno n'ukulekhekho kumwiiko kuundi mutweela kwonyene, nase kane ingwakilile, inguremo kamasisye.

⁹Ne noola kumwiiko kukwiitsa kuba kwamile bibyaano, shilayi. Ne noola ta, lwanyuma ulikurema.’ ”

¹⁰Khu shifukhu sha Sabato shitweela, Yesu aba aleekela mu ntsu iye khukhwisaayilamo.

¹¹Ne mwabamo umukhasi uwalemala khumala kimiiko liikhumi na shinaane, nga shisaambwa shiibi shamutorwasa. Umukhasi yuno aba wayifuumba, nga s'anyala weema wekolola na khafwiiti khoosi ta.

¹²Ne Yesu n'amubona, wamulaanga, wamuloma ari, “Mukhas'iwe, wakangululiwile khukhwaama mu bulwaale bwoowo.”

¹³Wamurakho kamakhono keewe, lubaluba, umukhasi wakwalasibwa, aryo kila waruuya Wele.

¹⁴Ne lwekhuuba umuraangilisi wentsu ye khukhwisaayilamo shamukhalasa naabi, lwa Yesu khuwonesela khu shifukhu Sabato, waloma babaandu ari, “Iliwo bifukhu bisesaba byeesi khwakhila khuraambilakho kimilimo, nashiryo ni mwiitse khu bifukhu byeenebyo nio muwonesewe, ne akhuba khu shifukhu sha Sabato ta.”

¹⁵Umukasya wamwiilamo ari, “Inywe babemiliisa busa khu ngaaki! Buli mutweela khwiinywe s'anyala khukaangulula iyeeyi yeewe, namwe isikilya yeewe khu Sabato, khukhwaama isi iliila, waakiyila khukinyweesa kameetsi?

¹⁶Ne sishaakhila umukhasi yuno, umukhaana wa Iburayimu, isi Sitaani abe amenyesele nga umubowe khumala kimiiko kino liikhumi na shinaane, khukangululibwa mu bubowe ubwo khu Sabato?”

¹⁷Yesu n'amala khuloma aryo, basiku beewe kamaŋaanyu kabawaamba busa, ne babaandu boosi bekhoya lw'ebyo bye kamakaanga byeesi Yesu akhola.

¹⁸Lwanyuma Yesu wabareeba ari, “Buyiinga bwa Wele bufwaanana na shiina? Kane imbufwaananise na shiina?

¹⁹Bufwaana nga khamiitso kaladaali,[6] kheesi umuundu abukula wabyaala mu mukuunda kweewe, kharyo khatsowa, khekyela kusaala, ni binywiinywi bye mu ngaaki byombekhamwo biiswi khu sakya tsakwo.”

²⁰Luundi Yesu wareeba ari, “Buyiinga bwa Wele mbufwaananisa na shiina?

²¹Bufwaana nga kamamela keesi umukhasi abukula watubaasa mu ndubi tsitaru tse buufu bwe ŋaano, khukhwoolesa bwoosi ni bwasiila.”

²²Yesu n'aba nga atsya i Yerusalemu, wabira mu biriimba ni mu byaalo nga aleekela.

²³Umuundu mutweela waamureeba ari, “Umukasya babaandu bakyeekhe bari babakane bawonesebwe?” Yesu welamo ari,

²⁴“Ni mukhakekho naabi nga esi munyala khukhwinjilila mu mulyaango kumunyelele. Lwekhuuba mbaboolela ndi bakali balikhakako khukhwinjila ne sebalinyala ta.

²⁵Khukhwaama umweene intsu n'alimala khukhwinyukha khukhwikalawo lulwiitsi, mulimikha ibulafu mukhonyake, nga mwikontselela muri, ‘Musakhulu n'ukhwikulilewo.’ Ne naye alibeelamo ari, ‘Ise simanya isi mwaama ta.’

²⁶“Ulwo nanywe mulimwiilamo muri, ‘Ifwe khwaliilatsakila luundi khwanyweelatsakila atweela ni nawe, luundi iwe waleekelelatsakila mu mikhoosi kyeweefwe.’

²⁷“Naye umweene intsu indi abeelemo ari, ‘Ise simanya isi mwaama ta! Ni muundurewo, inywe mweesi mumuukhola bye bubwoonaki.’

²⁸ “Iyo iliiba khulila ni khukhwilumaka kameeno, ni mulibona Iburayimu ni Isaaka, ni Yakobo, ni baŋoosi boosi, nga bali mu Buyiinga bwa Wele, ne inywe mwabeene nga mwatuumiwile ibulafu.

²⁹Ni babaandu baliitsa nga baama ibwama nyaanga, ni bukwa nyaanga, imwaalo we shiibala, ni ngaaki we shiibala, baryo bekhale khu mwikhoyo mu Buyiinga bwa Wele.

³⁰Baryo ibo babaali bamalilisayo, baliba babanyoowa, ni naabo babanyoowa, baliba babamalilisayo.”

³¹Mu mbuka nyeneyo batweela khu Bafarisaayo biitsa isi Yesu bamuloma bari, “Rura mu shifwo shino utsye ahaandi, lwekhuuba Herode ali khuukana khuukhwiira.”

³²Yesu waabeelamo ari, “Ni mutsye muboolele ishipwe iyo muri, ‘Bona ise imboona kimisaambwa kimibi, luundi imbonesa babaandu shaleelo ni kumukaamba, ne khu shifukhu she khataru, indyoolelesa kumulimo kwase.’

³³Ne shitweela busa, ndikhukhwiloosela shaleelo ni kumukaamba, ni shifukhu shishilakho, lwekhuuba sishinyalikha Umuŋoosi khukhwiribwila ahandi ta, khurusakho mu Yerusalemu.

³⁴“O Yerusalemu! Yerusalemu! Iwe uwiira baŋoosi, wakhupa kamabaale ibo babarumaniwa is'uli. Tsifuunda tseenga tseesi nakanila khubuusanisa babaandu boowo, nga ingokho ni buusanisa bunywiinywi bwayo mu ndaha tsayo n'enga iwe siwafukiilila ta!

³⁵Bona, intsu yoowo yalekhewele nga likubili busa. Ikhukakasa ndi s'ulimbonakho luundi ta, khukhwoolesa n'uli loma uri, ‘Ali ni khabi uyo uwiitsila mu lisiina ly'Omukasya.’ ”