Read lumasaaba Luka 14 Bible Online

Luka 14 - lumasaaba bible

Luka 14

¹Lutweela khu shifukhu sha Sabato, Yesu waatsya mu ntsu y'Omufarisaayo, uwaba mutweela khu bawuli, khuulya biilyo. Ne babaandu baaba bamwilolelesa lukali.

²Aabawo umusaani mutweela iburaangisi weewe uwaba wabiimba bikyele ni kamakhono keene.

³Yesu wareeba baleekeli be Kamakaambila ka Musa ni Bafarisaayo ari, “Shili shilayi khuwonesela khu shifukhu sha Sabato namwe ta?”

⁴Ne nibo basila busa. Kila Yesu wawaamba umusaani wamuwonesa, wamulekha waatsya.

⁵Lwanyuma Yesu wabareeba ari, “Naanu khwiinywe unyala khuuba n'umusoleeli weewe, namwe iyeeyi yeewe, nga shitweela khu nibyo shakwiile mwilowo, ukhanyala wabirusamo khaangu akho khu shifukhu sha Sabato?”

⁶Ne nibo balekha khunyala khumwiilamo mu mulomo yino ta.

⁷Lwanyuma n'abona bakyeni babalaangiwa nga berobolela biifwo bye biriifwa, waababoolela lusimo luno ari:

⁸“Noola umuundu yeesi waakhulaangile khu mayiiya ke bukhwaale, ukhatsya wekhala khu shitsoloŋo she angaaki ta, winyoola nga inyala khuubayo umuundu ukhufuura iwe shiriifwa ulaangiwile.

⁹Ni nooyo ubalaangile inywe mweembi, anyala weetsa waakhuloma iwe ari, ‘Sikulila yuno shiifwo shino.’ Iwe uryo ni khuswala khukali, wutsya khukhwikhala mu shifwo she nyuma.

¹⁰Ne ni baba nga bakhulaangile, tsya wikhale mu shifwo she nyuma, ni nooyo ukhulaangile kane etse is'uli, akhulome ari, ‘Mulebe, yinyukha wisyende ano mu shifwo she mu moni.’ Ni nawe kane ufune shiriifwa shikali, mu moni tse bakyeni babaandi.

¹¹Lwekhuuba buli muundu yeesi uwiniinisa, alikhisibwa aasi; ni nooyo uwiyisa aasi, aliniinisibwa angaaki.”

¹²Lwanyuma Yesu waloma umulaangile khu mayiiya ari, “N'uba wateekhele kamayiiya ke she kumuusi, namwe she ashilo shikali, ukhalaangatsaka basaale boowo, namwe babandaayo, namwe balebe boowo, namwe babesanwa boowo bayindifu ta, lwekhuuba n'ukhola uryo, nabo kane bakhulaange, baryo babe nga bakhuliyila, lw'ebyo byeesi wabakholela.

¹³Ne n'uteekha kamayiiya, ulaangatsaka bataambi, ni babaakataala, ni baaleme, ni baabofu,

¹⁴ni nawe uliweebwa ikhabi. Lwekhuuba nibo sibali ni she khuukhuliyila ta, ne Wele niye ulikhuliyila khu shifukhu she khuulamukha khwe bakhosefu.”

¹⁵Kila mutweela khuubo babekhala ni naye nga balya, n'awulila bilomo ibyo, waaloma Yesu ari, “Nga ali ni khabi umuundu uyo uliba khu mayiiya mu Buyiinga bwa Wele.”

¹⁶Yesu welamo ari, “Aabawo umusaani mutweela uwateekha kamayiiya kamaboofu kameene, walaanga babaandu bakali.

¹⁷Isaawa iye khurusa kamayiiya ni yoola, waarumana umwakaanisi weewe mutweela, khuutsya aboolele bakyeni beewe baalaange ari, ‘Ni mwiitse, lwekhuuba bibiindu byoosi biŋooneŋoone khaale.’

¹⁸“Ne boosi buli mutweela waarakikha khukhwisonesa. Uwanyoowa waaloma ari, ‘Nakulile liiswa lyase, nakhiile khuutsya khuulibona. Inoomba untsiyakhile.’

¹⁹Ukuundi waaloma ari, ‘Nakulile tsiyeeyi tsase tsiraano, indikho intsya khutsitsema. Inoomba untsiyakhile.’

²⁰N'ukuundi naye waaloma ari, ‘Nio naama khukhwa umukhasi, ni nashiryo, sinanyalile khukhwiitsa ta.’

²¹“Umwakaanisi waakobolayo, waaboolela umukhulu weewe bino byoosi. Umukhulu we intsu waakhalala naabi, kila aloma umwakaaanisi ari, ‘Rura khaangu utsye mu mikhoosi ni mu ntsila tse mu shiriimba, ureere ano, bataambi, babakataala, ni baabofu, ni baaleme.’

²²Kila umwakaanisi aloma ari, ‘Musakhulu, sheesi undakiile naashikholile ne ishiliyo biifwo.’

²³“Umukhulu uyo waaloma umwakaanisi ari, ‘Rura utsye mu mikhoosi, ni mu ntsila tse mu byaalo, ubawanyiinye boosi beetse, nio manya intsu yase yitsule bakyeni.

²⁴Imbaboolela ndi, mbaawo na mutweela khuubo babaalaangiwa, ulikhoombakho khu mayiiya kaase ta.’ ”

²⁵Babaandu bakali ni baaba bakyeenda ni Yesu batsya, weshebukha isi bali waabaloma boosi ari,

²⁶“Mbaawo umuundu uwiitsa isiindi, unyala khuuba umuleekelwa wase ta, khurusakho nga wabiiyiile paapawe, ni maayiwe, umukyelemawe ni babaana, babandaaye, ni bakooko; ilala ni khutubaasakho bulamu bweewe bubweene.

²⁷Ni nooyo ukhakane asute kumusalaba kweewe anoondelele, s'anyala khuuba umuleekelwa wase ta.

²⁸Lwekhuuba naanu mus'iinywe ukana khukhwombekha intsu ye goroofwa, ukhanyoowa khukhwikhala aasi, wabalilila bibikanibwa, ni khubona nga ali ni tsinusu tsitsimala khumalilisa intsu?

²⁹Lwekhuuba n'alekha khukhola aryo, asimama kumusiinji, kweesi akhalinyala khumalilisa intsu ta. Ni naabo babaalibona shino, balimutsekhelela,

³⁰nga baloma bari, ‘Umusaani uyu, arakikha khukhwombekha intsu, ne bona s'anyala khumala kumulimo kweewe ta.’

³¹“Namwe muyiinga shiina uba nga akana khuutsya mu busoolo n'umuyiinga ukuundi, ukhanyoowa khukhwikhala aasi, khubona nga oba kane anyale busoolo nga ali ni basilikhale bikana liikhumi, khusoolanisa ibo babaali bikana kamakhumi kabili?

³²Ne n'abona nga s'akane anyale ta, akaanisa buurume isi umuyiinga ukuundi uyo, abe esi atsya khusoolana naye, nga ashiili aleeyi, nga amuloomba abewo lukoosi.

³³Musaambo niyo ndweela, mbaawo na mutweela khwiinywe, unyala khuuba umuleekelwa wase, nga wakhulekha byoosi byaali nabyo ta.”

³⁴Yesu weloosela nga aloma ari: “Kumuunyu kuli kumulayi, ne kumuunyu kweene ni kuwamo itsamu, kunyala kuryeena khuukobosebwamo itsamu luundi?

³⁵Kuba sikushaakha luundi ta, bakutuuma busa, lwekhuuba sikulimo kumukaso isi liiloba namwe isi isiina ta. Uyo uuli ni kamaru ke khuuwulila, n'awulile.”