Read lumasaaba Luka 15 Bible Online

Luka 15 - lumasaaba bible

Luka 15

¹Lutweela babuusanisi be kumusolo ni babonaki biitsa ambi khurekeeresa Yesu.

²Ne Bafarisaayo ni baleekeli be Kamakaambila ka Musa, beŋuluŋuunya nga baloma bari, “Umusaani uyu, akaanila babonaki, luundi walya ni nabo.”

³Shikila Yesu abakanikhila lusimo luno ari:

⁴“Muundu shiina mus'iinywe, n'aba ni kamasheese keewe shitoondo shitweela, ne khwakoraanakho litweela, ukhanyala waalekha ako kamakhumi syeenda na syeenda mu kyeewa, waatsya nga aweentsa lisheese litweela ilyo lilikoraanile, khukhwoolesa n'alinyoola?

⁵N'enga waalinyoolile, ekhoya waalisuta khumayi keewe.

⁶N'enga wolile ingo, alaanga basaale ni babesanwa beewe, nga abaloma ari, ‘Ni mwiitse khwikhoyele atweela, lwekhuuba nanyoolile lisheese lyase abe lilyakoraanile.’

⁷“Mbaboolela ndi musaambo niyo ndweela, ilibayo kumwikhoyo mukali mwikulu, lw'omwonaki mutweela uwibiiyisa, khuminyisa ibo kamakhumi syeenda na syeenda balayi, babaakhakhila khukhwibiiyisa ta.”

⁸Aryo Yesu waababoolela lusimo luluundi ari: “Namwe mukhasi shiina n'aba ni tsinusu tseewe liikhumi, ne waakosakho ndweela, ukhaburusa itaala, weeya intsu, waheentsela ilala bulayi, khukhwoolesa n'akinyoola?

⁹N'enga wakinyoolile, alaanga basaale ni babesanwa beewe atweela, nga abaloma ari, ‘Ni mwiitse khwikhoyele atweela, lwekhuuba nanyoolile inusu yase abe iyakoraanile.’

¹⁰Mbaboolela ndi, ni musaambo niyo ndweela, bamalayika ba Wele bekhoya lwooyo, umwonaki mutweela uwibiiyisa.”

¹¹Yesu weloosela ni lusimo luluundi nga aloma ari: “Aabawo umusaani mutweela, uwaba ni basooleli beewe babili.

¹²Umuro waaloma paapawe ari, ‘Paapa, n'umbe kumukabo kwe bibiindu byase.’ Aryo paapawe wabakabananisamo bibiindu byeesi abe ali ni nabyo mu bulamu bweewe.

¹³“Lwanyuma lwe bifukhu bikyeekhe biri, umuro tsana waabuusilisa bibiindu byeewe byoosi byeesi aaba nabyo, wataala waatsya mu shiibala she aleeyi. Ibweeneyo, wasalanisilayo bibiindu byeewe musaambo imbi.

¹⁴Ulwo n'amala khuusalanisa bibiindu byoosi, intsala ingali yaakwa mu shiibala isho shoosi, aryo waarakikha khuutaambataamba.

¹⁵Kila atsya khuraambila mutweela khu baandu be mu shiibala isho, naye uwamusiindikha mu maayilo keewe khuutsya khuliisa tsimbiitsi.

¹⁶Nga ali iyo, wakana ari khali aliile khu makhobola keesi tsimbiitsi tsalilakho, n'enga mbaawo uwamuwakho khakhaandu khoosi ta.

¹⁷“Lwanyuma weyambaasa umweene nga aloma ari, ‘Baraambi ba paapa wase boosi bali ni bye khuulya bikali. Ne bona ise ingana khufwila ano intsala!

¹⁸Kane ise ninyukhe ano intsye isi paapa imulome ndi, paapa ise nayonaka isi Wele mwikulu, n'isi iwe.

¹⁹Sinakhila luundi khulaangibwa umwaana woowo ta. N'umbirise ise nga mutweela khu baraambi boowo.’

²⁰“Ni abweene awo, wenyukha warakikha lukyeendo khukhwiila isi paapawe. Ne aba nga ashiili aleeyikho ni ingo, paapawe wamubona, waamuwaambila shiisa, wamutimayo, wamukwa mu shifuba.

²¹Umusooleli tsana waloma paapawe ari, ‘Paapa, ise nayonaka isi Wele mwikulu, n'isi iwe. Sinakhila luundi khulaangiwa umwaana woowo ta.’

²²“Ne paapawe waloma babakaanisi beewe ari ‘Yuubakho! Reera khaangu ingubo ifuura bulayi mu mukwaarise. Mu mukwaarise intsiyi khu lwaala lweewe, ni bilaalo mu bikyele byeewe.

²³Lwanyuma mutsye mureere ikhaafu inere mukisale. Khakhulye khwikhoye!

²⁴Lwekhuuba umwaana wase yuno, abeele wafwa, ne ana ari, ali mulamu, abeele wakoraana, ne ana ari watuyikhaane.’ Nashiryo, barakikha khuulya ni khukhwikhoya.

²⁵“Bino biba biryo, umusoleeli weewe umukhulu aba s'ali ingo ta, nga ali mu mukuunda. Ne n'aba nga akobola, nga ali aambi ni ntsu, wawulila kimyeenya kiyiliimba, ni khushiina.

²⁶Kila alaanga mutweela khu bakaanisi, waamureeba ari, ‘Makhuuwa shiina ano?’

²⁷Umwakaanisi wamwiilamo ari, ‘Wandaayo wakoboole, ni paapawo wamwiriire ikhaafu inere, lwekhuuba wakoboole nga mulamu, luundi umulayi.’

²⁸“Wandaaye umukhulu yuno wakhalala naabi, wekaana ni khukhwinjila mu ntsu. Kila paapawe arura ibulafu, wamwikontselela ari enjile mu ntsu.

²⁹Ne niye waloma paapawe ari, ‘Bona kimiiko kino kyoosi tsana, ise imbeele nga ikhuraambila iwe nga sikhuminyaalilakho byeesi undakila na khafwiiti khoosi ta. Ne mbaawo sheesi waambakho akhaba ni khameeme khari, nase nikhoyakho ni basaale baase ta.

³⁰Ne bona umwaana woowo yuno, uwatsya wonakisila bibiindu bye mu bulamu bwoowo byoosi khu bamalaaya, n'akoboole ingo, iwe wamwiirira ikhaafu inere.’

³¹Paapawe wamwiilamo ari, ‘Mwaana wase, iwe uli ano ni nase tsindaalo tsoosi, na buli shitweela shoosi sheesi indi nasho shishoowo.

³²Nashiryo, abe shikhwakhila ifwe khuteekha kamayiiya khwikhoye, lwekhuuba wandaayo yuno abeele wafwa, ne ana ari mulamu, abeele wakoraana, ne ana ari watuyikhaane.’ ”