Read lumasaaba Luka 17 Bible Online

Luka 17 - lumasaaba bible

Luka 17

¹Yesu waloma baleekelwa beewe ari, “Bibiindu bibikhongelesa babaandu wakila boneka, bili ni khubawo, ne kumutaambo kwamunyoolile uyo ubireera.

²Ne shandiminyisile bulayi, umuundu uyo khubowebwa lusisi luboofu mu milo, atuumibwa mu nyaantsa, khufuurisa niye khureerera mutweela khu bakyeekhe bano khukhwoneka.

³Nashiryo ni mwiliinde mwabeene, noola wandaayo wonakile, mwikiitse, ne noola webiiyisile, mwiyakhile.

⁴Ne noola wonakile is'uli tsifuunda musaafu mu shifukhu sheene shitweela, ne buli fuunda weetsa is'uli, nga aloma ari, ‘Nebiiyisile,’ wakha khumwiyakhila.”

⁵Baarume baloma Umukasya bari, “Iwe n'ukhulooselekho ifwe khufukiilila khweefwe.”

⁶Umukasya waabaloma ari, “Muba nga mubeele ni khufukiilila khukyeekhe nga khamiitso kaladaali, abe munyala mwaalomela kusaala kuno muri, ‘Syuukha, utsye, wibyaale mu nyaantsa.’ Nakwo kwandibawulile.”

⁷Yesu weloosela ari, “Naanu mwiinywe unyala khuuba n'umwakaanisi ulimisa, namwe uwaayisa kamasheese; ne n'ama mu nimilo, unyala wamuloma ari, ‘Yikhala aasi ulye ta?’

⁸S'anyala wamuloma ari, ‘Inengekharengekhele biilyo, wibowe, wiŋooneŋoone untsakaanise she khulya, imale khuulya ni khuunywa, ne lwanyuma nio nawe ulye luundi unywe?’

⁹Niye anyala khusiima umwakaanisi lwekhuuba wakholele shamulomele khukhola?

¹⁰Ni nanywe muryo, nga mwaamalile khukhola byoosi byeesi babalomile khukhola, mulome muri, ‘Ifwe khuli babakaanisi busa babaakhandyakhiile ta, khwakholile busa shishikhwakhila khukhola.’ ”

¹¹Yesu n'aba nga atsya i Yerusalemu, wabirira khu lwakha luluuli akari a Samariya ni Galilaaya.

¹²Ne n'aba nga enjila mu shaalo shitweela, basaani liikhumi be bikeenge bamwakaanana, bemikha aleeyikho,

¹³bayokesela angaaki nga baloma bari, “Yesu! Musakhulu! Khuwaambile shiisa!”

¹⁴Yesu n'ababona, waabaloma ari, “Ni mutsye, mwiyokesane isi basaayi.” Ne ni baaba nga batsya, bawonesebwa.

¹⁵Ne mutweela khu nibo n'abona ari wawonesebwele, washuukha, wakobolayo, nga ayokesela angaaki, nga aruuya Wele.

¹⁶Wamayo, wakwa aasi ebikyele bya Yesu, wamusiima. Umweene yuno aba Umusamariya.

¹⁷Yesu wareeba ari, “Sibabeele liikhumi babawonesebwele? Ne syeenda bali lwaheena?

¹⁸Sibabonekhakho na mutweela khukobola, baruuye Wele, akhali umuutswa yuno?”

¹⁹Lwanyuma Yesu wamuloma ari, “Yinyukha utsye, khufukiilila khwoowo khwakhuwonesele.”

²⁰Shifukhu shitweela, nga Bafarisaayo bareebile Yesu bari Buyiinga bwa Wele bwiitsa liina, Yesu wabeelamo ari, “Buyiinga bwa Wele sibwiitsa nga bweyokeselele ta.

²¹Namwe babaandu khuloma bari, ‘Bona ubushi,’ namwe bari, ‘Bona ubwoshi’ ta. Lwekhuuba Buyiinga bwa Wele buli mus'iinywe.”

²²Lwanyuma waloma baleekelwa beewe ari, “Imbuka ilyoola isi mulikanila khubona shitweela khu shifukhu sh'Omwaana w'Omuundu, ne simulishibonakho ta.

²³Babaandu baliloma bari, ‘Bona uyo,’ namwe bari, ‘Bona ali ano.’ Mukhatsyayo nga mutima khubaloondakho ta.

²⁴Lwekhuuba nga khumulikha ni khumweekhamweekha ni khukhosesa likulu, khukhwaama khu luwaande lutweela khukhwoola khu luwaande luluundi, n'Umwaana w'Omuundu naye aliba aryo khu shifukhu sheewe.

²⁵Ne khunyoowa akhila khutaambisibwa naabi, naluundi ni babaandu be kumuboolo kuno bamwikaane.

²⁶“Nga ni shaba mu bifukhu bya Nowa, shiryo nga ni shiliiba mu bifukhu ibyo by'Omwaana w'Omuundu.

²⁷Babaandu baaba nga balya, nga banywa, nga bakhwa, luundi nga bakhwalikha, khukhwoolesa khu shifukhu khweesi Nowa enjilila mu likhoŋolo. Lwanyuma kameetsi ketsula, kasalasala, kabahesa boosi.

²⁸“Shikhaabe shiryo nga ni shaba khu bifukhu bya Loti. Babaandu baaba nga balya, nga banywa, nga bakulisa, nga bakula, nga babyaala, nga bombekha.

²⁹Ne khu shifukhu khweesi Loti arurira mu Sodoma, kumulilo ni bunoro byalakala khukhwaama mwikulu, byabahesa boosi.

³⁰“Shiliiba shiryo khu shifukhu khweesi Umwaana w'Omuundu alibonekhelakho.

³¹Khu shifukhu isho, umuundu yeesi uliba khu ntsu khu ngaaki, ne bibiindu byeewe nga bili mu ntsu mukari, akheekha khuutsya khubirusamo ta. Shitweela ni nooyo uliba ibulafu mu nimilo, akhakobolayo ingo ta.

³²Ni mukhebulile bibyakholekha khu mukha Loti.

³³Buli muundu yeesi ukhakakho khuwonesa buulamu bweewe, alibufwilwa. Ni nooyo yeesi ufwilwa buulamu bweewe, alibuwonesa.

³⁴Imbaboolela ndi mu shilo sheenesho, babaandu babili baliba bakonele khu bulili butweela, mutweela aliyilibwa, ne ukuundi alilekhebwa.

³⁵Bakhasi babili baliba nga basyeera atweela khu lusisi, mutweela aliyilibwa, ne ukuundi alilekhebwa.

³⁶Basaani babili baliba mu nimilo, mutweela aliyilibwa, ne ukuundi alilekhebwa.”

³⁷Baleekelwa bamureeba bari, “Umukasya, ne bilikholekha waheena?” Yesu wabeelamo ari, “Ahaba kumulaambo, abweenewo, nio esi tsingosya tsibuusanila.”