Read lumasaaba Luka 18 Bible Online

Luka 18 - lumasaaba bible

Luka 18

¹Lwanyuma Yesu waababoolela lusimo luno, nga abaleekela ari, baakhila khuuloomba busheele akhali khuuluwa ta.

²Waaloma ari, “Aabawo umukayi we kimisaango mu shiriimba shitweela uwaba nga s'arya Wele ta, namwe khukhwinaanayo isi umuundu yeesi ta.

³Ne aabaawo namulekhwa mutweela mu shiriimba sheene isho, uwabuya nga etsa is'ali, nga amuloma ari, ‘N'ungaye isi umusiku wase.’

⁴“Khuumala imbuka ndeeyikho, umukayi yuno s'akana khuushikhola ta. Ne lwanyuma waaloma mu mwoyo kweewe ari, ‘Ne ikhaba nga s'indimo khuurya Wele ta, namwe khukhwiinaanayo isi umuundu yeesi ta,

⁵ne lwekhuuba namulekhwa yuno wanduwisile lukali, kane imukaye nio alekhe khukhwiitsatsaka khukhundaambisa ta.’ ”

⁶Kila Umukasya eloosela nga abaloma ari, “Ni muwulile umukayi yuno ukhola bye bubwoonaki sheesi aloma.

⁷Aso, Wele s'aliyeeta khukaya barobole beewe babamulilila kumuusi ni mu shiilo? Kane ayile imbuka indeeyi nga siwabayeetile ta?

⁸Mbaboolela ndi alibakaya khaangu naabi. Ne Umwaana w'Omuundu n'aliitsa alinyoola khufukiilila khu shiibala?”

⁹Luundi ndi Yesu waboolela lusimo luno isi babaandu babeyambaasatsakakho khulwawe babeene khuuba bakhosefu, nga baleekelesa babaandi.

¹⁰Waloma ari, “Babaandu babili baatsya mu Lisaayilo Likhulu khuloomba. Mutweela khu nibo aba Umufarisaayo, n'ukuundi aba umubuusanisi we kumusolo.

¹¹Umufarisaayo weema waloomba bilomo bino ari, ‘Wo Wele ise ikhusiima iwe, lwekhuuba ise s'indi nga babaandu babaandi ta, babaali banuuli, si bali babeyikinwa ta, bayeyani, namwe nga umubuusanisi we kumusolo yuno ta.

¹²Ise Imbuya ntsala bifukhu bibili mu Sabiti, luundi ise imbaanayo shisiintsa shitweela she liikhumi, khu byoosi byeesi ndi nabyo.’

¹³“Ne umubuusanisi we kumusolo weema aleeyikho, walekha khukana ni khukhwinyusa tsimoni tseewe mu ngaaki mwikulu ta, ne wekhupa mu shifuba mweewe, nga aloma ari, ‘Wo Wele, n'umambile shiisa, ise umwonaki.’

¹⁴“Imbaboolela ndi, umusaani uyu akobolayo ingo weewe nga Wele wamwililemo, khuminyisa ukuundi uyo Umufarisaayo. Lwekhuuba buli uwiniinisa angaaki, alisibwa aasi, ni nooyo uwiyisa aasi, aliniinisibwa angaaki.”

¹⁵Babaandu babaandi bareera babaana baabwe isi Yesu abarekho kamakhono keewe. Ne baleekelwa beewe ni baabona baryo babarafuyila.

¹⁶Ne Yesu walaanga babaana bafwiiti is'ali nga aloma ari, “Ni mulekhe babaana bafwiiti beetse is'indi, mukhabareesa ta, lwekhuuba Buyiinga bwa Wele buli bwe babaali nga bano.

¹⁷Ilala mbaboolela ndi, umuundu yeesi ukhakaanila Buyiinga bwa Wele nga Umwaana umufwiiti, s'alibwingilamo na khakyeekhe ta.”

¹⁸Umuraangilisi mutweela Umuyudaaya wareeba Yesu ari, “Umuleekeli umulayi, ikhole shilayi shiina, nio ninjile mu bulamu bukhawawo?”

¹⁹Yesu wamwiilamo ari, “Lwashiina unaanga ise uri umulayi? Mbaawo na mutweela yeesi umulayi ta, khurusakho Wele yenyene poli.

²⁰Kamakaambila wakamanya: ‘Ukhayeyana ta, ukheera ta, ukheeba ta, ukhaapa umuundu washoowo liyino ta, wisatsakemo paapawo ni maayiwo shiriifwa.’ ”

²¹Umusaani welamo ari, “Ibyo byoosi naabiwaamba khukhwaama mu busooleli bwase.”

²²Ne Yesu n'awulila aryo wamwiilamo ari, “Ushitaambakho shishiindu shitweela shonyene: n'utsye, ukulise bibiindu byoosi byeesi uli nabyo, ukabile bataambi, ni nawe uliba ni buyiindifu mwikulu. Lwanyuma wiitse unondekho.”

²³Ne umusaani n'awulila aryo, kumutaambo kwamuwaamba lwekhuuba aba umuyindifu naabi.

²⁴Yesu wamulolelela, wamuloma ari, “Nga shihangafu, umuundu umuyindifu khukhwinjila mu Buyiinga bwa Wele.

²⁵Shili shaangu naabi iŋamya khuubirira mu mwanya kwe mpiso, khuminyisa umuyindifu khukhwinjila mu Buyiinga bwa Wele.”

²⁶Ne babaandu babaabawo ni bawulila shino, bareeba bari, “Ari naanu, unyala khuwonesebwa?”

²⁷Ne Yesu wabeelamo ari, “Bibikhanyalikha isi babaandu, binyalikha isi Wele.”

²⁸Lwanyuma Petero wamwiilamo ari, “Bona ifwe khwalekha tsiingo tseefwe, khwetsa khukhulondelela iwe.”

²⁹Yesu wamuloma ari, “Ilala mbaboolela ndi, mbaawo umuundu uwalekha tsiingo tseewe, namwe umukyelema, namwe babandaaye, namwe basaali, namwe babaana, lwe Buyiinga bwa Wele,

³⁰ukhaliwebwa bikali khufuurakho mu muboolo kuno, naluundi mu muboolo kukwiitsa, khufuna buulamu bukhawawo ta.”

³¹Yesu wayila baleekelwa beewe liikhumi na babili andulo, waabaloma ari, “Bona, khulikho khuniina i Yerusalemu, na buli shiindu shoosi sheesi baŋoosi baarona shishiwaamba khu Mwaana w'Omuundu, shilyoolelela.

³²Aliwaanibwayo isi babaandu Banaambo, balimutyabila, bamubirise musaambo ikhaakhila ta, bamufuutsekho kamare.

³³Balimunyweekha tsikhoba, lwanyuma bamwiire. Ne khu shifukhu she khataru, alilamukha khukhwaama mu bafu.”

³⁴Baleekelwa beewe balekha khumanyakho khu bilomo ibyo na shitweela ta, lwekhuuba kamakhulu kaabyo kaaba kababisiwilekho, balekha khumanya byeesi aloma ta.

³⁵Ne Yesu n'aba nga ali aambi khukhwoola i Yeriko, abaawo umusaani umubofu abe uwikhaale khu ndulo khwe ntsila nga asabilisa.

³⁶Umubofu yuno n'awulila lituuli lye babaandu libirawo, wareeba nga akana amanye shishiitsya mu moni.

³⁷Bamuboolela bari, “Yesu uwe Nazareesi, niye uli khubirawo.”

³⁸Kila alookhela angaaki ari, “Yesu Umwitsukhulu wa Dawudi, n'umambile shiisa.”

³⁹Ne babaandu babaaba baraangile, bamukhookhela bari asile busa. Ne niye weloosela khulookha naabi nga aloma ari, “Mwaana wa Dawudi! N'umambile shiisa!”

⁴⁰Yesu wemikha, walakila ari bamureere is'ali. Ne umubofu n'etsa ambi, Yesu waamureeba ari,

⁴¹“Ukana ise ikhukholele shiina?” Umusaani umubofu wamwiilamo ari, “Umukasya ingana khubona.”

⁴²Yesu wamwiilamo ari, “Mbo n'ubone, lwe khufukiilila khwoowo wawonesebwile.”

⁴³Lubaluba, tsimoni tseewe tsabimbukha, waloonda khu Yesu, nga aruuya Wele. Ni babaandu boosi ni babona shino, nabo baruuya Wele.