Read lumasaaba Luka 19 Bible Online

Luka 19 - lumasaaba bible

Luka 19

¹Yesu ni enjila mu Yeriko, aba nga abiramo busa.

²Mu shiriimba umwo, mwabamo umusaani ulaangiwa Zakayo, uwaba umukhulu we babuusanisi be kumusolo, uwaba umuyindifu naabi.

³Niye wakhalawo khubonakho Yesu nga n'ali, ne walekha khunyalisa ta, lwe babaandu bakali, ate niye abe ali umuundu umwiimbi.

⁴Kila atimaka, waraangila ibweeni, waniina khu kusaala kukhuyu, nio akile amubone, lwekhuuba Yesu aba alikhuutsya khuubirira khu ntsila iyo.

⁵Ne Yesu n'ola mu shifwo isho, wakalama khu ngaaki waloma Zakayo ari, “Yiikha khaangu, lwekhuuba shaleelo, shintsakhila khukhwikhala mu ntsu yoowo.”

⁶Naye khaangu akho wiikha, wakaanila Yesu ni kumwikhoyo.

⁷Ne babaandu ni baabona shino beŋuluŋuunya, baloma bari, “Umusaani uyu watsiile nga umukyeni mu ntsu y'omuundu umwonaki.”

⁸Ne Zakayo wenyukha weema, waalomela Umukasya ari, “Bona Umukasya, aluno ari, shisiintsa she bibiindu byase kane ishiwe bataambi, ne noola nalyakhana shishiindu shabeene shoosi mu bubeeyi, kane ishilihe kimiluundi kine khuminyisakho.”

⁹Yesu wamuloma ari, “Zakayo, shaleelo, buwonesi bwetsile mu ntsu yoowo muno, lwekhuuba, umusaani yuno, naye umwaana wa Iburayimu.

¹⁰Lwekhuuba Umwaana w'Omuundu, etsa khuweentsa, ni khuwonesa, isho shishaba shakoraana.”

¹¹Ni bawulila bilomo bino, Yesu weloosela khubaboolela lusimo luno lwekhuuba aba ali aambi ni Yerusalemu, naluundi baaba bambaasa bari Buyiinga bwa Wele butsya khubonekhelawo khaangu akho.

¹²Kila abaloma ari: “Aabawo umusaani we shiriifwa uwatsya mu shiibala she aleeyi, khuufuna buyiinga, nio lwanyuma akobole.

¹³Walaanga liikhumi khu bakaanisi beewe, waabawa tsinusu tsitsoola liikhumi nga buli mutweela inusu ndweela. Waabaloma ari, ‘Ni musubulemo tsinusu tsino, khukhwoolesa ni ndikobola.’

¹⁴“Ne babaandu be mu shiibala sheewe abe baamubiiyila, baarumana buurume khuumwoongakho isi aatsya nga buloma buri, ‘Ifwe sikhukana umusaani uyu khuuba umuyiinga weefwe ta.’

¹⁵“Nga waamalile khuufuna buyiinga waakobola. Waalakila balaange babakaanisi batsana, beesi aawa tsinusu, khukhwiitsa is'ali, nio amanye kamafuurisa keesi buli mutweela aafuna mu khusubula.

¹⁶“Uwanyoowa weetsa ali, waaloma ari, ‘Musakhulu, inusu yoowo isi waamba naafunilemo tsitsiindi liikhumi.’

¹⁷Kila umukhulu weewe amuloma ari, ‘Uryoo! Waanyala iwe umwakaanisi wase umulayi, lwekhuuba waba umwiyikinwa mu biindu bikyeekhe, aso ikhuwa bunyala khu biriimba liikhumi.’

¹⁸“Uwe khabili naye weetsa, waaloma ari, ‘Musakhulu, inusu yoowo isi waamba naafunilemo tsitsiindi tsiraano.’

¹⁹Uyo naye umukhulu waamuloma shitweela sheene ari, ‘Ni nawe ikhuwa bunyala khu biriimba biraano.’

²⁰“Umwakaanisi ukuundi weetsa, waaloma ari, ‘Musakhulu, lola, inusu yoowo iyishiina, abe naakibowa mu khakubo, naakisiikha.

²¹Nakhurya iwe, lwekhuuba iwe, uli umuundu umuwaangafu, wiyilila sheesi ukhaarawo ta, luundi ukyesa sheesi ukhaamiitsa ta.’

²²“Umukhulu weewe waamwiilamo ari, ‘Iwe umwakaanisi umumoyaani, kane ikhukhalile kumusaango nga niima khu byaamile mukhanwa mwoowo. Iwe ni wamanya uri ise ndi umuundu umuwaangafu, nga niyilila sheesi ikhaarawo ta, luundi injesela isi ikhaamiitsila ta.

²³Shiina shishakhulobela iwe khuuwa babaasuubula inusu yase? Khali nga ni niitsile, nandifunilekho kamafuurisa.’

²⁴“Kila aloma abo babaaba beemile awo ari, ‘Ni mumurusekho inusu iyo, mukiwe uyo uuli ni tsinusu liikhumi.’

²⁵“Ne nibo baamwiilamo bari, ‘Musakhulu, ne niye ali ni tsinusu liikhumi khaale.’

²⁶“Umukhulu welamo ari, imbaboolela inywe ndi, buli muundu ulikho ni shishiindu shoosi, aliweebwa khuumulooselakho, ne isi uyo ukhali na shoosi ta, ni khafwiiti abe kheesi ali nakho khalimurusibwakho.

²⁷Ne baasiku baase abo, babaakhaangana ise khuuba umuyiinga waabwe ta, ni mubareere ano, muberire mu moni tsase.”

²⁸Nga Yesu waamalile khuukanikha bino, waaraangila, waaniina i Yerusalemu.

²⁹Ne n'aba nga ali aambi khukhwoola i Betifage, ni Besaniya, khu lukiingi lulaangiwa bari lwe Kimisaala kimizeyituni, warumana babili khu baleekelwa beewe,

³⁰nga abaloma ari: “Ni mutsye mu shaalo shibali ibweeni, ne nga mwinjilamo, kane munyoole isikilya nga yabowebwele awo, isi umuundu yeesi akhekhalatsakakho ta. Inyene iyo, mukyabule, mukinderere ano.

³¹Ne umuundu yeesi n'abareeba ari, ‘Lwashiina mukyabula?’ Inywe mumuloma muri, Umukasya akikana.”

³²Abo beesi arumana baatsya banyoola nga n'abalomela.

³³Ne ni baaba nga bakyabula, babeene be sikilya, babareeba bari, “Lwashiina mwabula isikilya iyo?”

³⁴Nabo babeelamo bari, “Umukasya akikana.”

³⁵Baryo, bareera isikilya isi Yesu, baakyalakho bikwaaro byaabwe, bayeeta Yesu khuukikhalakho.

³⁶Ne n'aba nga atsya, baalaka bikwaaro byaabwe khu mukhoosi.

³⁷Aryo n'etsa aambi ni Yerusalemu, khu mukhoosi kukwikhilila khu lukiingi lwe kimisaala Kimizeyituni, lituuli lyoosi lye baleekelwa beewe barakikha khubuyila Wele ni kumwikhoyo, mu makono ke angaaki, lwe bye kamakaanga byoosi byeesi baabona, nga baloma bari:

³⁸“Wele awe ikhabi Umuyiinga uwitsila mu lisiina ly'Omukasya. Lukoosi lube mwikulu ni shiriifwa shibe isi Wele.”

³⁹Kila batweela khu Bafarisaayo babaaba mwituuli, baloma Yesu bari, “Umuleekeli, rafuyila baleekelwa boowo basile.”

⁴⁰Yesu wabeelamo ari: “Mbaboolela ndi, nibo ni kane basile busa, kamabaale kane kayokese.”

⁴¹Yesu ni esyeenda aambi ni shiriimba Yerusalemu, washibona, walila khulwe khushitsiinikhanila,

⁴²nga aloma ari, “Iwe uba nga uwamanya khu shifukhu shino, shiina shinyala khukhureerera lukoosi! Ne ana ari shakhubisiwilekho.

⁴³Bifukhu bilikhwoolela isi basiku boowo balikhwombekhelakho lumako, bakhwibotokhelele, bakhuriiye khu buli lubeka.

⁴⁴Balikhuupa ukwe aasi, atweela ni babaandu boowo babaali mukari mu biseenge byoowo. Mbaawo ni libaale na litweela lyeesi balilekha khu libaale lyashe ta. Lwekhuuba iwe siwamanya imbuka iye khukhwiitsa khwa Wele khukhukyeniyilakho ta.”

⁴⁵Lwanyuma, Yesu wenjila mu Lisaayilo Likhulu, warakikha khuwoonamo ibo, babaaba bakulaana,

⁴⁶nga abaloma ari: “Sharonebwa shiri, ‘Intsu yase kane ibaatsake intsu ye khuuloombelamo, ne inywe mwaakikalusile khuuba lifuluma lye banuuli.’ ”

⁴⁷Aryo buli shifukhu Yesu waba nga aleekelatsaka mu Lisaayilo Likhulu. Ne basaayi bakhulu ni baleekeli be Kamakaambila ka Musa, ni baraangilisi be babaandu, baaba bakhakakho naabi khukhwiira Yesu.

⁴⁸Ne baalekha khunyala khubona isaambo shiina ta, lwekhuuba babaandu boosi baamwibowakho nga bamurekeeresa bilomo byeewe.