Read lumasaaba Luka 20 Bible Online

Luka 20 - lumasaaba bible

Luka 20

¹Khu shifukhu shitweela mu bifukhu ibyo, Yesu n'aba nga aleekela babaandu mu Lisaayilo Likhulu, luundi nga aboolela kamakhuuwa kamalayi, basaayi bakhulu ni baleekeli be kamakaambila ka Musa, atweela ni basakhulu beetsa is'ali, bamuloma bari,

²“Khuboolele, uli na bunyala shiina bubukila iwe wakhola bibiindu bino byoosi? Naanu uwakhuwa iwe bunyala buno?”

³Yesu wabeelamo ari, “Nase khambareebe shireebo; ni mumboolele,

⁴Khubatisa khwa Yokana khwaama mwikulu namwe khwaama mu baandu?”

⁵Kila bakanikhanamo bonyene na bonyene nga baloma bari, “Ni kane khulome khuri, khwaama mwikulu, kane akhulome ari, ne lwashiina mukhaamufukiilila?

⁶Ne ni kane khulome khuri, khwaama mu baandu, babaandu kane bakhuupe kamabaale lwekhuuba bashiŋaŋasila ilala bari, Yokana Umubatisa aba Umuŋoosi.”

⁷Kila belamo bari, “Sikhumanya eena esi khwaama ta.”

⁸Ni Yesu naye waabeelamo ari, “Ni nase singene imbaboolele nywe bunyala shiina bubukila nakhola bibiindu bino ta.”

⁹Nga bashirekeeresa bilomo bino, Yesu weloosela nga ababoolela lusimo luno ari: “Aabawo umusaani mutweela uwabyaala kumukuunda kweewe kwe kimisabibu, waakupaangisa isi baalimi, waatsya mu shiibala she aleeyi, khuumalayo imbuka.

¹⁰Ne imbuka ye likyesa ni yoola, waarumana umwakaanisi weewe mutweela isi baalimi, ari bamuwekho khu byaamo bye mu mukuunda kwe kimisabibu. Ne balimi beesi apaangisa, baakhupaka umwakaanisi uyo, baamuwoona busa na shiindu twa.

¹¹Aryo weloosela khuurumanayo umwakaanisi ukuundi, ne ni nooyo baamukhupa, baamubirisaka shifwaabi, baamuwoona busa na shiindu twa.

¹²Luundi ndi waarumanayo umwakaanisi uwe khataru, oyu baamukhupa kamakuma, baamukholowa ibulafu.

¹³“Lwanyuma umweene mukuunda waaloma ari, ‘Ne ari kane ikhole ndyeena? Kane indumeyo umwaana wase isi ingana naabi, winyoola niye kane bamuwe shiriifwa nga bamuboone.’

¹⁴“Ne baalimi ni baabona umwaana bekutila atweela bonyene bari, ‘Oyu niye umusikha, ni mwiitse khumwiire, busikha buno manya bwaba bubweefwe.’

¹⁵Baryo baamuwaamba baamutuuma ibulafu we kumukuunda, baamwiira.” Lwanyuma Yesu waabareeba ari, “Mwaambaasa muri baalimi ibo, umweene mukuunda alibakhola aryeena?

¹⁶Aliitsa ahese baalimi ibo, ni kumukuunda akuwe babaandu babaandi.” Ne babaandu ni baawulila bilomo bino, baloma bari, “Taawe, bikhaba biryo ta.”

¹⁷Yesu waabalola kila abaloma ari, “Ne shiina sheesi shisharonebwa shino shimanyisa, shishiiloma shiri, ‘Libaale lyeesi babombekhi bekaana nilyo lilyekyela lye musoonda?’

¹⁸Buli muundu yeesi wukwa khwibaale lino, alifuniakikhaka mu bipatu, ni nooyo isi libaale lino lilikwakho, lilimubulyungulaka busa.”

¹⁹Baryo baleekeli be Kamakaambila ka Musa, ni basaayi bakhulu, baweentselesa isaambo yeesi banyala bamuwaambilamo khaangu akho, lwekhuuba baamanya bari, akanikha lusimo luno nga lubawaamba khu nibo. Ne baarya babaandu.

²⁰Ne ni baaba nga bashimwayilisa baryo, barumana babeeyi babekalusa khuuba babaandu balayi, nio akile bamuwaambilise mulomo tseewe, nio bari bamuwaaneyo isi buwuli bwa gafana.

²¹Baryo babeeyi bano babaakhakilisa bamureeba bari, “Umuleekeli, ifwe khwaamanya khuri iwe uleekela luundi ukanikha bya ŋali, ate ndi s'uromboosa mu baandu ta, ne uleekela kumukhoosi kwa Wele nga wimikha muŋali.

²²Nashiryo, khuboolele, shilayi ifwe khuuwa kumusolo isi Kayisaali, namwe ta?”

²³Ne Yesu waba nga waamanyile luwomelo lwe mu myoyo kyaabwe, waabaloma ari,

²⁴“Ni muntsokese idinari. Shifwaani shino shishiilikho, ni burone buno bya naanu?” Nabo bamwiilamo bari, “Bya Kayisaali.”

²⁵Kila Yesu abeelamo ari, “Aso, bya Kayisaali, ni mubiwe Kayisaali, ni bya Wele, mubiwe Wele.”

²⁶Nabo balekha khunyalisa khumuwaambilisa mwiibyo byeesi aloma mu lubuula ta. Ne beyaanga busa ibyo byeesi abeelamo, basila busa.

²⁷Ulwo balala khu Basadukaayo nga nibo babaloma bari, mbaawo khulamukha khwe baafu ta, beetsa isi Yesu, nabo bamureeba bari,

²⁸“Umuleekeli, ifwe Musa akhuronela likaambila ari, ‘wandaaye w'omuundu n'afwa, ne walekha namulekhwa, ne nga bakhusaala babaana ta, wandaaye w'omusaani umufu, aakha wiila khu namulekhwa, asaalile wandaaye babaana.’

²⁹Aso abaawo be buulebe musaafu; umukiboole wakhwa umukhasi, ne wafwa nga sibasaalile babaana ta.

³⁰Wandaaye uwe khabili wamwiilakho,

³¹n'uwe khataru naye aryo, khukhwoolesa musaafu boosi ni bamwiilakho ne baafwa nga mbaawo umwaana ta.

³²Lwanyuma lwa boosi, umukhasi naye wafwa.

³³Ari iwe waambaasa urye, imalamukha ke bafu, umukhasi yuno aliiba mwene wa naanu khu nibo? Lwekhuuba boosi musaafu baaba ni naye nga umukhasi waabwe.”

³⁴Yesu waabeelamo ari, “Babaandu be khu shiibala khuno, bakhwa luundi bakhwaalikha.

³⁵Ne abo babaakha khuulamukha khukhwaama mu bafu babe baalamu mu shiibala isho, sibalikhwa namwe sibalikhwaalikha ta,

³⁶lwekhuuba baliiba sibashiifwa luundi ta. Ne baliiba nga bamalayika luundi baliba babaana ba Wele, lwekhuuba baliba baalamukhile khukhwaama mu bafu.

³⁷Ni Musa naye okesanisa ari baafu balilamukha khukhwaama mu bafu, nga n'okesana mu byaronebwa khu shitsakha she kamawa nga shaburukha; akanikha khu Mukasya ari, ‘Wele wa Iburayimu, Wele wa Isaaka, luundi Wele wa Yakobo.’

³⁸Lwekhuuba Wele niye s'ali Wele we baafu ta, ne ali Wele we balamu.”

³⁹Batweela khu baleekeli be Kamakaambila baloma bari, “Umuleekeli walomele bulayi.”

⁴⁰Baloma baryo lwekhuuba mbaawo uwanyalisa khumureeba luundi bireebo bibiindi ta.

⁴¹Lwanyumakho ndi, Yesu waabaloma ari, “Babaandu banyala baryeena khuloma bari, Kristo Umwitsukhulu wa Dawudi?

⁴²Dawudi umweene mu burone bwe Tsizabuli aloma ari, ‘Umukasya aloma Umukasya wase ari, yikhala khu mukhono kwase kumulayi,

⁴³khukhwoolesa ni ndikalusa basiku boowo khuuba shitsoloŋo sheesi usambakho bikyele byoowo.’

⁴⁴Ari bona, noola Dawudi umweene amulaanga ari Umukasya, ari anyala aryeena khuuba umwaana weewe?”

⁴⁵Awo babaandu boosi ni baaba nga bashimurekeeresa, Yesu waloma baleekelwa beewe ari,

⁴⁶“Ni mwitsililise baleekeli be Kamakaambila ka Musa babakana naabi khukyenda nga bakwaarire tsingubo tsindeeyi, luundi bakana naabi khusheesebwa mu butale, ni khukhwikhala khu bitsoloŋo bye angaaki mu ntsu tsye khukhwisaayilamo, ni mu bifwo bye shiriifwa khu mayiiya.

⁴⁷Luundi banuula bibiindu mu ntsu tsye banamulekhwa, luundi besaaya Wele lwe khukhwiyokesana nga baloomba lukali. Babeenebo balikhalilwa kumusaango kukufuura bukali.”