Read lumasaaba Luka 21 Bible Online

Luka 21 - lumasaaba bible

Luka 21

¹Yesu wenyusa tsimoni waabona bayindifu nga bara biwaanwa byaabwe mu sanduuku iye Lisaayilo Likhulu.

²Aryo waabona namulekhwa umutaambi nga naye aramo bu nusu bweewe bubili bwonyene.

³Yesu waaloma ari, “Ilala imbaboolela ndi, namulekhwa yuno umutaambi wareeremo shikali khufuurisa babaandi babaramile boosi.

⁴Lwekhuuba bano boosi babukuule khu bikali byeesi bali nabyo baara mu sanduuku, ne umukhasi yuno mu butaambi bweewe, waawaanileyo byoosi by'ali nabyo bye buulamu bweewe bwoosi.”

⁵Ulwo batweela khu baleekelwa beewe ni baaba bakanikha khu Lisaayilo Likhulu, nga ni lyaba lyayombekhebwa bulayi, ni kamabaale kamamiliwu naabi, ni nebyo bibyawaanibwayo isi Wele; Yesu waaloma ari,

⁶“Bino byoosi byeesi mubona ari, imbuka kane yoole, esi akhalibonekhawo ni libaale na litweela lilirama nga lyemile khu lyashe ta. Kamabaale kano koosi katsya khutuumibwa aasi.”

⁷Baryo bareeba Yesu bari, “Umuleekeli, bino byoosi bilibawo liina? Naluundi khabonelo shiina khakhalyokesana khari ibyo byoosi bili aambi khukhwoolelesebwa?”

⁸Yesu welamo ari, “Ni mwitsililise, mulekhe khukosaasibwa ta. Lwekhuuba bakali baliitsa mu lisiina lyase, nga baloma bari, nibo ise, luundi nga baloma bari, ‘imbuka yoolile.’ Mukhabaloondelelatsaka ta.

⁹Ne ni muliwulila busoolo ni khutabukha, mukharyatsaka ta. Bibiindu bino byoosi byaakha khunyoowa khubawo, ne intsakamo shiili iyawangu ta.”

¹⁰Lwanyuma waalooselakho ari, “Linaambo lilinyukhila linaambo lyashe, ni buyiinga bulinyukhila buyiinga bubuundi.

¹¹Ilibawo khunikina khukali khwe shiibala, ni mu bifwo bikali mulibamo intsala ni tsindwaale. Naluundi ilibawo bibiriisa bikali, ni bye kamakaanga khukhwaama mwikulu.

¹²“Ne bino byoosi nga bishiili khubawo ta, balibawaamba inywe, babakubyeenge, babawaaneyo mu muntsu tsye khukhwisaayilamo, ni khubowebwa mu mapuusu. Balibayila isi bayiinga n'isi bawuli lwe lisiina lyase.

¹³Ne yino iliba ikhabi yeenywe khubawa nibo bujulilwa.

¹⁴Kale muryo ni mumalilile mu myoyo kyeenywe khulekha khurya ta, nga mwaambaasa muri kane mwiwotsekho muryeena ta.

¹⁵Lwekhuuba ise samweene indibawa inywe bilomo ni kamakyesi byeesi basiku beenywe bakhalinyala khukhaandisa namwe khubiloba ta.

¹⁶Inywe mulilibwamo luwomelo ni basaali beenywe, ni babandaayeenywe, ni balebe beenywe, ni basaale beenywe. Ni babaandi khwiinywe baliribwa.

¹⁷Babaandu boosi balibabiiyila lwe lisiina lyase.

¹⁸Ne mbaawo ni lutsuune lwe khu mirwe kyeenywe na lutweela lulihela na khafwiiti khoosi ta.

¹⁹Mukhwikhalilikha khweenywe mulinyoola buulamu.

²⁰“Ne ni mulibona Yerusalemu nga shebotokhelelwe ni kamaye ke basilikhale, ulwo mumanya muri khuhela khwasho khuli aambi.

²¹Ulwo babaaliba mu Yuda baakha belukhile mu bisiintsa bye tsingoongo; ne ibo babaaliba mu shiriimba bashiruremo; ni naabo babaaliba mu shaalo bakhenjila mu shiriimba ta.

²²Lwekhuuba bino nibyo bifukhu bye shitaambiso khukhwoolelesa bibyaronebwa.

²³Isi bakhasi babaaliba bisoombo, ni naabo babaaliba nga banuunisa mu bifukhu ibyo, nga kuliba kumutaambo. Lwekhuuba ilibawo kumutaambo kumukali mu shiibala, ni lirima lya Wele isi babaandu be linaambo lino.

²⁴Baliribwa ni lurima, luundi baliyilibwa nga babowe mu manaambo koosi, ni Yerusalemu shilisambililwa ni Banaambo khukhwoolesa imbuka yaabwe inyene iyarobolebwa n'iliwakho.

²⁵“Ne alibawo bubonelo khu nyaanga ni khu mweesi, ni khu nieniesi, ni khu shiibala kamanaambo koosi kaliiba mu khwiyembelela, ni khuurya lwe khuwoolela ni khukululukha khwe nyaantsa.

²⁶Babaandu baliyengukhaka lwe shiriisa, ni lwe khukhwiyembelela ibyo byoosi bibiitsya khubawo mu shiibala shoosi, lwekhuuba kamaani ke mwikulu kalitengasibwa.

²⁷Khu mbuka iyo, nio babone Umwaana w'Omuundu nga etsila mu namufweeli ni kamaani ni shiriifwa shikali.

²⁸Ne bino byoosi ni biba nga birakikha khubawo, mukangamukha mwinyuse kimirwe kyeenywe, lwekhuuba khuwonesebwa khweenywe khuba khuli aambi.”

²⁹Lwanyuma Yesu waababoolela lusimo luno ari, “Ni mubonele khu kusaala ku figi ni khu bisaala bibiindi byoosi.

³⁰Muryo ni mubona nga bisisinakho luundi kamasaafu, mumanya muri biseela bye kumunaane bili aambi.

³¹Musaambo niyo ndweela, ni nanywe ni mulibona ibyo nga bibawo, mumanyatsaka muri Buyiinga bwa Wele buli aambi.

³²“Ilala imbaboolela ndi kumuboolo kuno sikuliwawo na khafwiiti ta, khukhwoolesa ibyo byoosi ni bilibawo.

³³Likulu ni shiibala biliwawo, ne bilomo byase sibiliwawo na khafwiiti khoosi ta.

³⁴“Ni mwiliinde kimyoyo kyeenywe kilekhe khukhwimalila khu mulyulyu, ni khumeela, ni khukhwiyembelela bibiindu bye mu bulamu buno ta, nio shifukhu isho shilekhe khuboolakho nga akhumanya ta.

³⁵Lwekhuuba shilyoola khu baandu be mu shiibala shoosi nga kumureko.

³⁶Ni nashiryo, ni mube meeso imbuka yoosi, nga muloomba Wele busheele, nio munyale khukhwilukha ibyo byoosi bibiitsya khubawo, ni khunyalisa khukhwimikha mu moni tsy'Omwaana w'Omuundu.”

³⁷Aryo Yesu buli shifukhu kumuusi ekhalatsaka mu Lisaayilo Likhulu nga aleekela, ne ni bwelabulatsaka aruratsaka n'atsya khu lukiingi lulaangiwa bari lwe kimisaala Kimizeyituni.

³⁸Babaandu boosi bawuunatsaka kumutikhinyi khuutsya is'ali mu Lisaayilo Likhulu khumurekeeresa.