Read lumasaaba Luka 22 Bible Online

Luka 22 - lumasaaba bible

Luka 22

¹Ulwo kamayiiya ke kimikaati kikhasiila kakalaangibwa bari Kamayiiya ke Khuubirakho kaaba kali aambi khukhwoola.

²Basaayi bakhulu ni baleekeli be Kamakaambila ka Musa, bakhala kamakyesi ke khukhwiira Yesu mu shimoonyo busa, lwekhuuba baarya lwe babaandu.

³Lwanyuma Sitaani wenjila mu Yuda, uwalaangiwa Isikalyoti, mutweela khu baleekelwa liikhumi na babili.

⁴Aryo Yuda waarurayo waatsya waboolanila atweela ni basaayi bakhulu, ni bakhulu be basilikhale babaaliinda Lisaayilo Likhulu, nga ni kane amuweyo isi bali.

⁵Nabo bekhoya, balakaana ni khumuwa tsinusu.

⁶Yuda wafukiilila, aryo wahentselesa imbuka iye khuwayo Yesu isi bali, nga lituuli lye babaandu shililiwo ta.

⁷Lwanyuma shifukhu she kamayiiya ke kimikaati kikhasiila shoola; khweesi baaba baakha berirakho khasheese khe khushebulililakho Kamayiiya ke Khuubirakho.

⁸Yesu warumana Petero ni Yokana, nga abaloma ari, “Ni mutsye mukhuŋoonaŋonele ekhuliila Kamayiiya ke Khuubirakho.”

⁹Nabo bamureeba bari, “Ukana khutsye khukaŋoonaŋonele waheena?”

¹⁰Naye Yesu waabaloma ari, “Bona, ni munaba nga mwinjila mu shiriimba, inabawo umusaani uneetsa nga wetyukhile isoongwe iye kameetsi abakaanane, umweeneyo mumulondelele, khukhwoolesa mu ntsu isi kane enjilemo.

¹¹Muryo mulome umweene intsu muri, ‘Umuleekeli akhureeba ari, shiseenge shiili ena mweesi niye ni baleekelwa beewe banaliila Kamayiiya ke Khuubirakho?’

¹²Umweeneyo kane abokese shiseenge shikali she khungaaki shishiŋoonaŋonewele, mutsye mubweenemwo muŋoonaŋoone.”

¹³Baryo baatsya, banyoola nga ni bili bibyeene byeesi Yesu abaloma, baŋoonaŋoona Kamayiiya ke Khuubirakho.

¹⁴Inyaanga ni yoola, Yesu wekhala aasi khuuliila atweela ni baarume beewe.

¹⁵Wabaloma ari, “Ise nakanile naabi khuliila atweela ni nanywe Kamayiiya ke Khuubirakho nga ishiili khutaambisibwa ta.

¹⁶Lwekhuuba imbaboolela ndi, singene indyekho luundi ni nanywe kamayiiya kano khukhwoolesa ni kalyoolelela mu Buyiinga bwa Wele.”

¹⁷Aryo Yesu wabukula shikhopo, wasiima Wele, waaloma ari, “Ni mwakaanile shino mukabanane,

¹⁸lwekhuuba imbaboolela ndi, khukhwaama shaleelo, siindinywakho luundi ni nanywe khu byaamo bye kumusabibu, khukhwoolesa Buyiinga bwa Wele ni bulyoola.”

¹⁹Lwanyuma wabukula kumukaati wasiima Wele, wakumenyulamo, wabawa nga aloma ari, “Kuno nikwo kumubili kwase, kukuwanibwileyo khulweenywe. Ni mukholatsake muryo lwe khukhushebulilatsaka ise.”

²⁰Musaambo niyo ndweela ni baamala khuulya she ashilo, wabawa shikhopo nga aloma ari, “Shikhopo shino nisho shishiŋaŋasa Indakaano ya Wele imbya ikholebwele lwe kamafuki kaase kakatsutsukha khulweenywe.”

²¹“Ne bona, kumukhono kwooyo unandyamo luwomelo kuli atweela ni nase khu shikabilo.

²²Ilala Umwaana w'Omuundu alikhuutsya nga ni shakholebwa ni Wele, ne kumutaambo kwamunyoolele umuundu uyo umulyamo luwomelo!”

²³Shino shakila baleekelwa bareebana bonyene na bonyene bari naanu khu nibo ukane akhole shishiindu nga shino.

²⁴Lwanyuma abalukhawo tsikhaando mu baleekelwa nga baloma bari naanu khu nibo uwaambaasibwa khuuba umukhulu khufuura.

²⁵Yesu waabaloma ari, “Bayiinga be kamanaambo bawula babaandu baabwe, ni naabo babaaba ni bunyala khu baandi balomewakho khuuba nibo bayeeti baabwe.

²⁶Ne inywe simuli muryo ta. Khurusakho uyo ufuura bukhulu mwiinywe niye abe nga umukyeekhe; n'umuraangilisi abe nga niye umwakaanisi.

²⁷Ne naanu umukhulu khufuurisa? Uyo uwikhala aasi khuulya, namwe uyo uwakaanisa she khulya? S'ali uyo uwikhala aasi khuulya? Ne bona ise indi umwakaanisi akari mwiinywe.

²⁸Inywe muli babaandu abo babemikhile ni nase mu bikosi byase byoosi.

²⁹Ni nase imbawa inywe buyiinga nga Paapa n'abumba ise,

³⁰nio muliile luundi munyweele khu shikabilo shase mu Buyiinga bwase. Naluundi mulikhala khu bitsoloŋo bye shiriifwa, mukhalile bikuuka liikhumi na bibili bya Isiraeli kimisaango.”

³¹Yesu waaloma ari, “Simoni, Simoni, Sitaani wekontseleele afukiilisibwe nio abaseese inywe mweesi nga iŋaano.

³²Ne ise nakhuloombeele iwe Simoni, indi khufukiilila khwoowo khulekhe khuwawo ta. Ne n'ulimala khukalukha, ukumisatsaka bandaayo.”

³³Ne Petero welamo ari, “Umukasya, ise neŋoonaŋonele khuutsya ni nawe mu bubowe ni mu khufwa.”

³⁴Yesu wamwiilamo ari, “Petero ikhuboolela ndi, itwaya inaba nga ishiili khukholyookha ta, iwe kane untsikaane tsifuunda tsitaru uri akhumanya ise ta.”

³⁵Lwanyuma Yesu waabaloma ari, “Ise ni nabarumana inywe ibulafu khuutsya nga simuli ni busawu bwe tsinusu, namwe tsisawu ta, namwe nga ni mwatsya akhali bilaalo ta, mwabakho ni sheesi mwikoomba?” Nabo belamo bari, “Mbaawo ta.”

³⁶Yesu waabalomela ari, “Ne ari khayo buli muundu uuli ni khasawu khe tsinusu atsye nakho, ni nooyo uuli ni sawu yeewe atsye nayo, ne uyo ukhali ni lurima ta, akulise ingubo yeewe alukule.

³⁷Lwekhuuba imbaboolela ndi bibyaronebwa biri, ‘Aabaalibwila atweela ni babonaki,’ isho shaakha khukhwoolelela mus'iise. Ilala, ibyo bibyaronebwa khusiise byaakha khukhwoolelesebwa.”

³⁸Kila baleekelwa baloma bari, “Umukasya, bona tsindima tsibili itsishi.” Naye waabeelamo ari, “Isho shimala.”

³⁹Yesu waarura waatsya khu lukiingi lwe Kimizeyituni, nga niyaba isaambo yeewe, ni baleekelwa beewe baamuloondakho.

⁴⁰Ne n'ola mu shifwo isho, waabaloma ari, “Ni muloombe Wele mulekhe khukhwinjila mu khukhonjelesebwa ta.”

⁴¹Ne niye waabarurakho libaanga nga isi umuundu anyala khuutsukutsa libaale khukhwoola, waafukhama aasi, waaloomba Wele,

⁴²nga aloma ari, “Paapa, noola ukana, n'undusekho shikhopo shino she kumutaambo, ne akhuba nga ise ni ngana ta, ne iwe sheesi ukana shikholebwe.”

⁴³Malayika waamubonekhela nga aama mwikulu nga amukumisa.

⁴⁴Ni butsiina nga buli bukali mu mwoyo kweewe, weloosela khuuloomba, ni lukyesi lweewe lwaba nga kamafuki kakaaroonya aasi.

⁴⁵Aryo wenyukhawo esi aaba aloombela, welayo isi baleekelwa beewe, waabanyoola nga baakonele lwe kumutaambo kumukali.

⁴⁶Waabareeba ari, “Lwashiina mukona? Ni mwinyukhe muloombe, nio mulekhe khwinjila mu khukhonjelesebwa ta.”

⁴⁷Ne Yesu n'aba nga ashikanikha aryo, lituuli lye babaandu lyaarura, ni Yuda, mutweela khwiibo liikhumi na babili, nga waabaraangiliile, wesyeenda aambi isi Yesu, waamukwa mu shifuba.

⁴⁸Ne Yesu waaloma ari, “Yuda, ulya mu Mwaana w'Omuundu luwomelo nga umukwa mu shifuba?”

⁴⁹Baleekelwa babaaba bali ni Yesu ni baabona shishiitsya khubawo, baaloma bari, “Umukasya, ari khureme ni tsindima tseefwe?”

⁵⁰Aryo mutweela khu nibo waaremakho khukhuru khuulayi khw'omwakaanisi w'Omusaayi ufuura bukhulu.

⁵¹Ne Yesu waaloma ari, “Ikhabayo shiindi shishifwaanana shiryo ta.” Aryo wawaamba khukhuru khw'Omwakaanisi uyo, waamuwonesa.

⁵²Lwanyuma Yesu waaloma basaayi bakhulu ni baraangilisi be basilikhale be Lisaayilo Likhulu ari, “Mwitsile ni tsindima, ni tsimiimbo, nga babetsiliile umunuuli?

⁵³Buli shifukhu ise nabatsaka ni nanywe mu Lisaayilo Likhulu, ne simwamaamba ta. Ne ari yino niyo isaawa yeenywe luundi niyo imbuka ye bunyala bwe shishiilima.”

⁵⁴Baryo bawaamba Yesu, baamuyila mu ntsu y'omusaayi ufuura bukhulu, ni Petero naye waba nga wabaloondelele inyuma aleeyikho.

⁵⁵Ne ni baamala khukhwaasa kumulilo akari mu lwaanyi, boosi bekhala aasi atweela. Petero naye wekhala atweela ni nabo.

⁵⁶Ne umukhaana mutweela umwakaanisi n'amubona Petero nga wekhaale abuwaanga bwe kumulilo, wamwofwasa bulayi, waaloma ari, “N'umusaani uyu naye abatsaka ni naye.”

⁵⁷Ne Petero wekaana nga aloma ari, “Mukhas'iwe, ise umuundu uyo simumanya ta.”

⁵⁸Lwanyuma lwe mbuka ifwiiti iri, umuundu ukuundi wamubona, waaloma ari, “Ni nawe uli mutweela khu nibo.” Ne Petero welamo ari, “Musaaniwe, sishilikho shiryo ta.”

⁵⁹Lwanyuma lwe saawa nga ndweela khubirawo, umuundu ukuundi wamunialilisa ni kamaani nga aloma ari, “Mu ŋali umuundu uyu naye abeele ni Yesu, lwekhuuba naye ali umu Galilaaya.”

⁶⁰Ne Petero welamo ari, “Musaaniwe, ise simanya iwe byoloma ta.” Ne n'aba nga ashikanikha aryo, itwaya yakholyookha.

⁶¹Umukasya weshebukha, walolelela Petero. Ni Petero naye washebulila shilomo sheesi Umukasya aba wamulomile ari, “Shaleelo, itwaya inaba nga ishiili khukholyookha ta, ni nawe kane untsikaane tsifuunda tsitaru.”

⁶²Aryo Petero waarura ibulafu, walila lukali kamasika.

⁶³Ne babaandu babaaba baliindile Yesu nga umubowe, barakikha khumutyabila nga bamukhupa.

⁶⁴Bamubiimbakho mu moni, bamureebelesa bari, “Iwe khola buŋoosi! Khuboolele, naanu ukhupile?”

⁶⁵Baamulomakho ni bibiindu bibiindi biikali nga bamufwotsola.

⁶⁶Awo antsye ni bwasha, lukhobo lwe basakhulu be Bayudaaya, basaayi bakhulu, ni baleekeli be kamakaambila ka Musa babuusana atweela, baryo bareera Yesu mu lukhobo lwaabwe.

⁶⁷Kila bamuloma bari, “Khuboolele noola iwe uli Kristo.” Yesu wabeelamo ari, “Ni kane imbaboolele, singene mufukiilile ta.

⁶⁸Luundi ningene imbareebe shireebo, singene muntsilemo ta.

⁶⁹Ne khukhwaama khu saawa yino, Umwaana w'Omuundu atsya khwikhala khu mukhono kumulayi kwa Wele Umunyali wa byoosi.”

⁷⁰Baryo kila boosi bamureeba bari, “Nikhwo khuloma khuri, iwe uli Umwaana wa Wele?” Yesu wabeelamo ari, “Nga ni mulomele, ise niye.”

⁷¹Kila nabo baloma bari, “Ari khukanila shiina ndi bujulisi bubuundi? Lwekhuuba ifwe fwabeene khwawuliile byeesi umweene ama khuloma.”